དགེ་ལེགས་ལུང་རྟོགས་དར་གྱི་ཤམ་བུ་འབུམ།།
ཐུགས་བསྐྱེད་རྩིབས་མ་སྟོང་གིས་ཉེར་བཏགས་པས།།
ཉེས་བརྒྱའི་ཚ་གདུང་སེལ་བའི་འཕྲིན་ལས་གདུགས།།
སྐལ་ལྡན་རྒྱ་མཚོའི་གཙུག་ན་མངོན་པར་མཐོ།།

མཁྱེན་བཟང་གཤོག་ཡངས་བསྐྱོད་པའི་ཟློས་གར་གྱིས།།
ལྔ་རིག་རླབས་ཀྱི་འཁོར་ལོར་རྩེན་བཞིན་དུ།།
ཤེས་བྱའི་གཏིང་མཐའ་མཚོལ་བའི་གསེར་གྱི་ཉ།།
དགེ་འདུན་པདྨའི་མཚོ་ཆེན་མཛེས་པའི་རྒྱན།།

མཁས་རྒུའི་རྣམ་དཔྱོད་སྐྱེད་མའི་ཚལ་ཡངས་ལས།།
འོངས་པའི་སྙན་བརྒྱུད་ལེགས་བཤད་སྦྲང་རྩིའི་ཆབ།།
འདོད་རྒུར་འཁྱིལ་བའི་ཐུགས་གསུང་བུམ་པ་དཀར།།
བློ་གསལ་བུང་བའི་ཚོགས་ཀྱི་ཉེར་འཚོའི་གཞི།།

ཞི་དུལ་བག་ཡོད་འདབ་སྟོང་ལེགས་བཞད་ཅིང༌།།
ལྷག་བསམ་བསུང་ཞིམ་ཕྱོགས་ཀྱི་མཐར་སོང་བ།།
གཞན་ཕན་ཟེའུ་འབྲུ་གཡོ་བའི་པད་དཀར་མོ།།
ལྗོངས་འདིའི་གཙུག་རྒྱན་ཉིད་དུ་ཅི་ཡང་འཛུམ།།

རིགས་ཞེན་ལ་རྒྱའི་རི་མོ་གཡས་སུ་འཁྱིལ།།
མ་རྨད་ཐབས་མཁས་དབྱངས་ཀྱི་སྙིང་བོས་ཕྱུག།
བྱང་སེམས་དཀྱིལ་འཁོར་ཟླུམ་པོའི་དུང་དཀར་ཆེ།།
ངན་རྟོག་གཉིད་ལས་སློང་བའི་བྱེད་པོར་བསྔགས།།

ཁ་བའི་མེ་ཏོག་འཛུམ་པའི་ཞིང་ཁམས་ཀྱི།།
ཆོས་སྲིད་ཟུང་གི་བྱ་གཞག་འོ་མའི་མཚོ།།
སྤེལ་བའི་སྙིང་སྟོབས་དཔལ་བེའུ་དམ་པའི་རྒྱ།།
སྣ་ཚོགས་སྙིགས་མའི་རྐྱེན་གྱིས་གཞོམ་གཞིག་བྲལ།།

ལང་ཤོར་ཀླ་ཀློ་མུ་སྟེག་གཞན་སྡེའི་དཔུང༌།།
ཐབས་ཤེས་འཕྲུལ་གྱི་ཆོ་གས་ཕམ་བྱས་ཏེ།།
མི་མཐུན་ཕྱོགས་ལས་རྒྱལ་བའི་རྒྱལ་མཚན་ཆེ།།
རང་བསྟན་དབུ་འཕངས་རྒྱས་པའི་དཔྱིད་དུ་བསྒྲེངས།།

གསང་གསུམ་ནོར་བུའི་ལྟེ་བ་ལས་བཀྱེས་པའི།།
ཀུན་བཟང་སྤྱོད་པའི་རྩིབས་མ་བྱེ་མ་བརྒྱས།།
མཛེས་པ་རབ་བྱིན་ལེགས་མཛད་འཁོར་ལོའི་འགྲོས།།
འཛམ་གླིང་འཛིན་མའི་ཁྱོན་ལ་བསྐོར་གྱུར་ཅིག།

རྩོམ་ཁུངས། ༢༠༠༢ལོའི་གངས་རྒྱན་མེ་ཏོག༣