བུ་ཆུང་གི་ཚབ་ཏུ་རང་ལ་བྲིས་པ།
སྲེད་པའི་མེ་འོབས་ཀྱི་རྟིང་དུ།།
འདོད་པའི་སྣུམ་ཁུ་ཞིག་བླུགས་ཏེ།།
གང་འདོད་འཐམ་འཁྱུད་ཀྱི་གཞུང་དུ།།
རྣམ་ཤེས་འཁྱམ་པོ་ཞིག་བཅུག་སོང༌།།

འདོད་པའི་ལོངས་སྤྱོད་ཀྱི་སྦུབས་སུ།།
ལས་ངན་རྣམ་ཤེས་ཤིག་འཁོར་སྟེ།།
འཁོར་བའི་དཔྱང་ཐག་གི་ངོས་སུ།།
མྱ་ངན་འཁུན་སྒྲ་ཞིག་བཞག་སོང༌།།

འཇིག་རྟེན་སྣང་བ་ཡི་བར་ནས།།
རྩེད་འདོད་དགའ་མ་ལ་འཁོར་ཞིང༌།།
སྲེད་པའི་མེ་འོད་དུ་བསྡེབས་ཏེ།།
ཚེ་སྲོག་ལྷག་མ་ཞིག་ལས་བྱུང༌།།

འཇིག་རྟེན་དཀར་ངོགས་སུ་འབྱོར་དུས།།
བརྩེ་བའི་དྲོད་ཁོལ་དེ་མ་ཐོབ།།
བུ་ཆུང་བསམ་མེད་ཀྱི་འཚོ་བ།།
སྡུག་གི་མུན་ནག་ཏུ་འདྲེས་སོང༌།།

ཉམ་ཆུང་མི་ལུས་ཞིག་ལས་ན།།
བྱམས་བརྩེའི་རང་མདངས་ཤིག་ལོས་དགོས།།
བུ་ཕྲུག་ཕ་མེད་དུ་གྱུར་བས།།
འཚོ་བའི་བདེ་སྐྱིད་དེ་མ་མཐོང༌།།

ཕ་འཛོམས་མ་འཛོམས་ཀྱི་བུ་ཕྲུག།
སྤྲོ་དགའི་སྣང་བ་ཡིས་བཟི་འདུག།
ཕ་མེད་ཁེར་རྐྱང་དུ་ལུས་པས།།
མཆི་མ་རྐང་སྣེ་ལ་ཟགས་བྱུང༌།།

དྭངས་གསལ་རྣམ་ཤེས་ཀྱི་སྟེང་དུ།།
སྨྲ་བརྗོད་རང་དབང་ཞིག་ཐོབ་ཡོད།།
ཕ་མེད་དྭ་ཕྲུག་ཏུ་ལུས་པས།།
ངག་གི་སྨྲ་བརྗོད་དེ་བོར་སོང༌།།

སྐྱིད་སྐྱིད་བདེ་བདེ་རུ་སྣང་བའི།།
འཚོ་བར་བྲོ་བ་ཞིག་མི་འདུག།
བྱམས་སྐྱོང་མ་ཐོབ་པའི་བུ་ལ།།
སྙིང་རྗེ་སྒོམ་མཁན་ཞིག་མི་འདུག།

ཨ་མའི་ལུས་དྲོད་ཀྱིས་བསྐྱངས་པའི།།
བུ་ཆུང་ལས་ཅན་ཞིག་རེད་འདོད།།
ཨ་ཕ་མཐོང་ས་ན་མེད་པས།།
དཔའ་ཡ་དཔུང་རོགས་ཤིག་མི་འདུག།

ཁ་ཡ་ན་ཟླ་ཚོའི་གྲལ་ནས།།
ཁ་བདེ་ལྕེ་བདེ་ཞིག་མ་འཁྱོངས།།
ལོ་ཆུང་བྱིས་པ་ཚོའི་ཁྲོད་ནས།།
སྤྲོ་དགའི་འཛུམ་མདངས་ཤིག་མ་བསྟན།།

རྒྱུ་འབྱོར་ལོངས་སྤྱིད་ཀྱི་ཕྱོགས་སུ།།
ཧེབ་ཀྱི་རྟ་ཁ་ཞིག་བསྐོར་མེད།།
ཨ་ཕའི་ལུས་དྲོད་ཀྱི་སྣང་བ།།
སེམས་ཀྱི་ལོངས་སྤྱོད་དུ་འདོད་ཡོད།།

ཤེས་རིག་དར་ཆ་ཞིག་མི་དགོས།།
མཐོན་པོའི་གོ་ས་ཞིག་མི་དགོས།།
གསེར་དངུལ་རྒྱན་ཆ་ཞིག་མི་དགོས།།
ཕ་མའི་བྱམས་བརྩེ་ཞིག་འཐོབ་དགོས།།
༢༠༡༠ལོའི་ཟླ་གསུམ་པའི་ཚེས༢༥ཉིན་གུང་སློབ་མའི་མལ་ཁང་དུ་ད་ལྟའི་བུ་ཆུང་གི་རྣམ་པར་བལྟས་ཏེ་འགྱོད་གདུང་དྲག་པོ་ཞིག་དང་མཉམ་དུ་སྦྱར།

རྩོམ་ཁུངས། ངེད་དྲ་བ།