དུས་གསུམ་སངས་རྒྱས་ཀུན་འདུས་ཀྱི་ངོ་བོ།།

རྩ་བའི་བླ་མ་རྣམས་གསུམ་དེ་མཁྱེན་ནོ།།

བདེ་མེད་འཁོར་བའི་བཙོན་ར་འདི་གཏོར་ནས།།

རྣམ་གྲོལ་གདོད་མའི་རྒྱལ་ས་ལ་སྐྱོལ་ཅིག།

ད་ལྟ་བདག་གི་མིག་ལམ་ལ་སྣང་བའི།།

ཚུལ་མིན་འགྲོ་བའི་བྱ་སྤྱོད་དེ་མཐོང་ཚེ།།

འདི་མིན་ཞིང་ཁམས་གཞན་དག་ལ་སྐྱེ་བའི།།

སྨོན་པ་དྲག་པོ་འདེབས་རན་ལ་སླེབས་འདུག།

བླ་མ་རྣམས་ཀྱིས་དམ་ཆོས་དེ་བཙོང་ནས།།

བརྗིད་ལྡན་ལྷ་ཁང་བརྩེགས་ཐབས་ལ་འབད་འདུག།

དག་པའི་ཞིང་ལ་ལྷ་ཁང་གིས་ཕོངས་ནས།།

འཇིག་རྟེན་འདི་རུ་སྐུ་སྐྱེ་རུ་ཕེབས་སམ།།

དགེ་འདུན་རྣམས་ཀྱིས་རྟེན་རྙིང་དག་བཙོང་སྟེ།།

བཟོ་གྲྭ་མགྲོན་ཁང་རྒྱག་རྒྱུ་དེ་བསྒོམ་འདུག།

ལྷར་བཅས་སྟོན་པ་ཟས་གཙང་གི་སྲས་པོས།།

བསླབ་སྡོམ་བཅའ་ཁྲིམས་འདི་འདྲ་ཞིག་མཛད་དམ།།

ཉིས་བརྒྱ་ལྔ་བཅུའི་ཁྲིམས་ལྡན་གྱི་དགེ་སྤྱོང་།།

གྲྭ་ཆུང་རྣམས་ཀྱི་བརླ་ཤ་དེ་མ་རྩོད།།

ལྷག་མ་དང་པོ་ཉིན་བཞིན་བྱུང་ན།།

ཚུལ་ལྡན་དགེ་སྤྱོང་མིང་ཙམ་ལས་ཅི་ཡོད།།

གོས་དཀར་ལྕང་ལོ་ཤིགས་ཤིག་ཏུ་གཡོ་བའི།།

སྔགས་པ་རྣམས་ཀྱི་ཁ་ཕོ་དེ་མ་སྔ།།

ན་ཆུང་སྙིང་རྩ་འགུག་ནུས་ཙམ་མེད་པའི།།

མངོན་སྤྱོད་བྱ་བ་ཅི་འདྲ་ཞིག་ཡིན་འོང་།།

མཛེས་མ་འགའ་རེས་ལྟོ་གོས་ཀྱི་ཆེད་དུ།།

ཉིན་མཚན་མེད་པར་སྒེག་ཉམས་ཤིག་བཏོད་དེ།།

རྒྱུན་ཆད་མེད་པར་རྐུར་ཚོང་ལ་འབད་འདུག།

མཛང་མའི་བྱ་བ་འདི་འདྲ་ཞིག་ཡིན་ནམ།།

སྐྱེས་པ་འགའ་ཞིག་ཤྭ་ཁང་དུ་སོང་ནས།།

གཅེས་པའི་བུ་དང་ཆུང་མ་བཅས་ཤོར་དེ།།

ཆང་སྐྱུར་འཐུང་ཞིང་མལ་ས་ན་བརྒྱལ་འདུག།

ཡ་རབས་ཕོ་རྒོད་བྱ་བ་དེ་ཡིན་ནམ།།

ཁ་ཡག་ཞེ་རྩུབ་རོང་འཚམས་ཀྱི་སློབ་མས།།

བླ་མ་དགོངས་པ་ནམ་རྫོགས་ལ་སྒུག་ནས།།

བླ་མའི་ཕྱག་རྒྱ་ཐོབ་ཐབས་ལ་འབད་པ།།

གསང་སྔགས་སློབ་དཔོན་བསྟེན་ཚུལ་དང་མཐུན་ནམ།།

མགོ་རིལ་གྲྭ་བས་མགོ་རིལ་གྱི་ཨ་ནེ།།

ངོ་ཤེས་མེད་པའི་གྲོང་གསེབ་ཏུ་ཁྲིད་ནས།།

ཁྱིམ་པ་ཕོ་མོའི་སྤྱོད་པ་དེ་སྐྱོང་གི།

བཙུན་པའི་མཛད་པ་འདི་འདྲ་ཞིག་ཡིན་ནམ།།

གྲྭ་བའི་ཕྱག་ན་བུ་གསོད་ཀྱི་སྨན་རྫས།།

ཨ་ནེའི་རུམ་ན་ཕྱི་རྒྱལ་གྱི་མཇེ་ཚབ།།

ཀུན་གྱི་རྒྱབ་ན་ཆོས་གོས་དང་རྣམ་སྤྱར།།

ཤྰཀྱའི་རྗེས་འཇུག་འདི་འདྲ་ཞིག་ཡིན་ནམ།།

དད་འདུན་ཡོད་ཅེས་རང་སྟོད་ལ་བྲེལ་བའི།།

སྤྱིན་བདག་སྐྱེ་བོས་དཀར་སེར་གྱི་སྡེ་གཉིས།།

དབྱེ་བ་མི་ཤེས་སྐུར་འདེབས་ཀྱིས་སྨོད་པ།།

སྐྱབས་འགྲོའི་བསླབ་སྡོམ་ཤེས་པ་དེ་ཡིན་ནམ།།

སོ་ཐར་བྱང་སེམས་གསང་སྔགས་ཀྱི་སྡོམ་ལྡན།།

དམ་པའི་ཚུལ་ཅན་འདི་འདྲ་ཞིག་མ་ལགས།།

རྒྱ་བལ་གྲྭ་སྨྱོན་འགའ་ཞིག་གི་སྤྱོད་པ།།

སྨྲས་པ་ཡིན་གྱིས་ཐམས་ཅད་ལ་མ་ཡིན།།

མུར་སྨྱོན་གཏམ་འདི་རྒྱ་ཁབ་དང་འདྲ་བས།།

སྐྱོན་ལྡན་ཞིག་གི་མིག་ནང་ལ་འཛེར་སྲིད།།

མཁས་པ་འགའ་ཞིག་ཐུགས་ཕམ་ཡང་བཟོ་སྲིད།།

སྐྱེ་བོ་འགའ་རེ་བཞག་གད་ཡང་སློང་སྲིད།།

སྨྲས་པའི་གཏམ་འདི་ངག་འཆལ་དུ་སྲིད་ན།།

སྟོབས་བཞིའི་སྒོ་ནས་བླ་མ་ལྷར་བཤགས་སོ།།

སྐྱོན་ལྡན་རེ་ཟུང་ལོག་ལམ་ལས་ལྡོག་ན།།

དེ་ཡི་དགེ་བ་འགྲོ་ཀུན་ལ་ཐོབ་ཤོག།

རྩོམ་ཁུངས། ཀཿཐོག་སྤྲུལ་སྐུ་པདྨ་དབང་ཆེན་གྱི་སྙན་རྩོམ་ཐོར་བུ།