དབོན་ཞང་རྡོ་རིང་ལ་མཇལ་བ།

སྔོན་ནས་བྱུང་བ་གསལ་བའི་ངོ་མཚར་གཟུགས།།

སྟོན་གྱི་ན་བུན་བཞིན་དུ་རབ་རིབ་ཙམ།།

ལྷ་སར་ཐོག་མར་འབྱོར་བའི་སྤྲོ་སྣང་ཡང་།།

རྡོ་རིང་འདི་དང་མཇལ་དུས་དེ་མུར་ཡལ།།

བདེན་པའི་མེས་པོ་དྲན་པའི་གདུང་བ་དེ།།

འཁྱམ་པོས་མཛེས་མ་དྲན་པའི་དོ་ཟླ་མིན།།

དྲན་རྟེན་འདྲ་པར་ལེན་པའི་སྐུ་མགྲོན་ལ།།

ཚོར་སྣང་ག་འདྲ་ཡོད་པ་ངས་མ་ཤེས།།

 ཐོ་ཐོ་གཙང་པོའི་ཟམ་ཆེན།

ཁ་བ་རླུང་དང་འདྲེས་ནས་རྩེད་འཇོར་རོལ།།

ནུབ་རི་ས་སྲོད་ཁྲོད་ན་སྟོང་འཇགས་སེ།།

ཟམ་ཆེན་ཁ་རུ་འགྲེང་ནས་བལྟས་ན་ཡང་།།

མེས་པོ་བཞུད་པའི་ཞབས་རྗེས་མཐོང་མ་བྱུང་།།

དུས་ཀྱི་བསེར་བུས་ཁོང་འདར་ཡང་ཡང་བྱིན།།

མེས་པོ་དྲན་པའི་དབུགས་རིང་ཡང་ཡང་ཤོར།།

མདོ་དབུས་གཅིག་ཏུ་སྦྲེལ་བའི་བརྩེ་ཞེན་གྱིས།།

ཟམ་ཆེན་འདི་ཉིད་སྙན་ངག་སྲོག་ཏུ་ཞུགས།།

གདང་ལ་རི་བོ།

རྒྱ་སྟག་ངར་སྐད་ཚ་ཡང་ཝ་བྲོས་བྱེད།།

འབྲོང་རྒོད་མཐོ་སར་གནས་ཀྱང་ཀུམ་ནས་འཆི།།

འདི་ནི་གཞན་མགོ་བསྐོར་བའི་གཏམ་རྒྱུད་དེ།།

འཕྲུལ་གྱི་རྟ་ཕོས་ལག་མཐིལ་ཙམ་དུ་བསྒྱུར།།

གདང་ལ་རི་བོ་རབ་མེད་གཙང་པོ་བཞིན།།

མདོ་དབུས་ཡུལ་ཁམས་དུམ་བུར་བཅད་ན་ཡང་།།

ཆོལ་གསུམ་སྤུན་ཟླ་སྤྲིན་གྱི་ཕྲེང་བ་བཞིན།།

མཐོ་ཡང་འགོག་པའི་གོ་སྐབས་གཏན་དུ་དབེན།།

 དགའ་ལྡན་དགོན་ནས་

     ལྷ་སའི་སྐྱིད་ཆུ་ལ་བལྟས་པ།

མཆོད་ཆང་ཚིམ་པར་རོལ་བའི་སྐྱེས་པ་བཞིན།།

གྱུ་གྱུའི་འགྲོས་ཀྱིས་འུར་ཟིང་མེད་པར་བཞུར།།

རྒྱང་ནས་རྒྱང་དུ་བཞུར་བའི་སྣེ་མོ་ན།།

སྔོ་མེར་འཁྱིལ་བའི་མཚོ་ཞིག་ཡོད་དམ་ཅི།།

མཚམས་སྤྲིན་དམར་པོས་མདངས་ཀྱིས་བྱུགས་པ་ན།།

གནས་ཡུལ་འགྲིམ་པའི་སྙིང་གི་མཛའ་མོ་བཞིན།།

དྭངས་ཤིང་བསིལ་བའི་གཉུག་མའི་ངང་ཚུལ་དེ།།

བདག་གིས་རྙེད་མིན་སོམ་ཉི་སྟོང་གིས་བཅིངས།།

རྩོམ་ཁུངས། ༢༠༠༧ལོའི་གངས་རྒྱན་མེ་ཏོག