ཡུལ་ནས་སློབ་གྲྭ་བར་འཐེན་པའི།།
གྱ་གྱུའི་རྐང་ལམ་དེ་བརྒྱུད་དུས།།
དཔེ་ཁུག་ཆུང་ཆུང་གི་རྡོག་ཁྲེས།།
མ་ཐེག་འཁུན་སྒྲ་ཞིག་ཤོར་སོང༌།།

ཀ་ཁའི་སྦྱོར་ཀློག་གི་དབྱངས་རྟས།།
ཞོགས་པའི་ཉི་གཞོན་དེ་བསུ་དུས།།
ཡངས་པའི་ཤེས་རིག་གི་རྒྱལ་ཁམས།།
མིག་གི་དགའ་སྟོན་དུ་མངོན་འོང༌།།

བྱ་དངོས་ཙག་ཙིག་ཅིག་བརྩད་ནས།།
སློབ་གྲོགས་ཕན་ཚུན་གྱི་བར་ལ།།
ཁ་འཛིང་ལག་འཛིང་རེ་བྱས་པ།།
སེམས་ནས་བརྗེད་ཐབས་རང་མི་འདུག།

རྟག་ཏུ་རྩེད་འཇོ་ལ་གཡེང་སྟེ།།
ལས་བྱ་བསྒྲུབ་རྒྱུའང་བརྗེད་པས།།
རྒན་གྱི་ཁྲིད་དབྱུག་གི་ཉེས་ཆད།།
ལག་པའི་མཐིལ་ངོས་ལ་བབས་སོང༌།།

ཕ་མའི་དངུལ་ཁྲག་ལས་ཐོན་པའི།།
སྒོར་མོ་དུ་ཆང་ལ་བརྗེས་པ།།
དྲན་པའི་མེ་ལོང་དུ་འཁོར་ཚེ།།
སྙིང་ལ་ན་ཟུག་ཅིག་སྐྱེས་བྱུང༌།།

རྩོམ་རིག་ལྷ་མོ་ཡི་འཛུམ་ཞལ།།
སློབ་གསེང་འཚོ་བའི་ཁྲོད་མཇལ་བྱུང༌།།
ཁོ་མོའི་དར་བབ་ཀྱི་ལང་ཚོ།།
ང་ཡི་འཚོལ་སྙེག་ཏུ་གྱུར་སོང༌།།

ལོ་ཟླའི་བརྩེགས་རིམ་གྱི་ཁྲོད་ནས།།
སྨྱུ་གུའི་རྩེ་མོ་དེ་ཟད་ཀྱང༌།།
བསླབ་པའི་ཤེས་ཡོན་གྱི་རྨང་རྡོ།།
བརྟན་པོ་སླེབས་པ་རང་མི་འདུག།
                                       2008—7---3

རྩོམ་ཁུངས། མཚན་ལམ་རིང་མོ།