ཚོགས་གཉིས་འདབ་སྟོང་གྲོལ་བའི་གུར་ཁྱིམ་དུ།།
སྒྲིབ་གཉིས་གདོད་ནས་དག་པ་ཟས་གཙང་སྲས།།
དོན་གཉིས་ལྷུན་གྱིས་གྲུབ་པའི་བྱིན་རླབས་རྒྱུན།།
བདག་ཅག་མཁའ་མཉམ་འགྲོ་བའི་གསོས་སུ་ཕོབས།།

སྡུག་བདེན་འཁོར་བའི་ཉེས་དམིགས་མ་མཐོང་ལ།།
ཁ་མིག་དབང་བོ་སྐྱོན་གྱིས་གོས་པ་མིན།།
ངུར་སྨུག་ཆུང་ནས་བགོས་པའི་གྲྭ་རྐྱང་ང་།།
ཆོས་ནོར་གཉིས་མེད་མི་ཡི་ལྷག་མ་ཉིད།།

འ་འུར་འདུ་འཛི་སྟོང་བའི་དབེན་གནས་སུ།།
ཟས་དང་ནོར་གྱིས་ལོངས་སྤྱོད་ཆོབ་དཀའ་ཡང་།།
བཅོས་དང་བསྒྱུར་དུ་མེད་པའི་ཕྱག་ལེན་ཁྲོད།།
དགེ་སྐུལ་བཙན་པོའི་དབྱུག་པ་ལན་མང་ཉོས།།

ལུས་ལ་རྣམ་ཀུན་འབྲལ་མེད་ཆོས་ཀྱི་གོས།།
སེམས་ལ་འདུལ་ཁྲིམས་ཉིས་བརྒྱའི་ལྕགས་རི་བརྟན།།
ཉེར་གཅིག་དུས་རབས་འདི་ཡི་ལོགས་ཤིག་ན།།
ང་ཡི་འགྲོ་འདུག་རང་དབང་གོ་སྐབས་ཕྲ།།

ཡོན་ཏན་བཅུ་དང་ལྡན་པའི་བླ་མ་མེད།།
སྐྱོན་བྲལ་སྣོད་དུ་རུང་བའི་སློབ་མ་མེད།།
ཕྱི་ནང་གཞུང་ལུགས་སློབ་པའི་སྐལ་བཟང་མེད།།
མེད་དང་མི་ཤེས་མང་བ་ང་ཚོའི་ལས།།

དབེན་པར་གནས་ཀྱང་ཕྱི་ཡི་སྐྱིད་སྣང་དྲན།།
ཕྱི་རུ་ཉུལ་དུས་ནང་གི་དྲོད་ལ་ཆགས།།
ལོ་ཟླའི་ཆུ་ཐིགས་དོན་མེད་སར་ཟགས་ནས།།
ཐར་བའི་ཞིང་དུ་བགྲོད་པའི་ཐེམས་སྐས་ཆད།།

གཞན་ལ་གཡར་བའི་རང་ཤོང་ཁང་རྙིང་ནས།།
སྟོང་སྣང་དགོད་སྒྲ་མིག་གིས་འཚོལ་བཞིན་དུ།།
རང་དབང་གཤོག་རྩལ་རྒྱས་པའི་གླག་ཕྲུག་གིས།།
མཐའ་བྲལ་མཁའ་ལམ་ཉུལ་བར་ཞེ་རེ་འཁྲེང་།།

རྣམ་དག་ཆོས་པའི་གཟུགས་ཀྱི་ཕྱི་ཚུལ་འདིས།།
རང་དབང་འདོད་པའི་སྒོ་མོ་ཡོངས་སུ་བརྒྱབ།།
མི་སྡིག་རྒས་གཉེར་ཐོད་ལ་བབས་ནའང་།།
ད་དུང་འཇིག་རྟེན་འདི་ལ་ཞེན་ཅིང་ཆགས།།

མི་ཡི་ཚེ་འདི་མི་རྟག་ནམ་མཁའི་གློག།
སུ་ཡང་འཆི་བདག་རལ་གྲིས་མི་གཏོང་ན།།
རྟག་འཛིན་སེམས་ཀྱི་བསླུ་བྲིད་མཚར་བོ་དེས།།
མཁའ་མཉམས་འགྲོ་རྣམས་འཁོར་ལོ་བཞིན་དུ་བསྐོར།།

དབང་བོ་སྒོ་ལྔ་ཚང་བའི་མི་ལུས་ལ།།
ཁྲག་དང་རླུང་གི་རྒྱུ་བ་མ་འཇགས་ན།།
འདོད་ཡོན་སྲིད་པའི་རོ་ལ་མ་བརྟེན་པར།།
བྱ་བྱེད་སྣ་ཁ་མང་བ་རང་མཚང་ཡིན།།

ཡུན་རིང་མི་ཚེ་གཅིག་ལ་མ་རྙེད་པའི།།
ཟག་མེད་བདེ་བའི་གོ་འཕང་ཐོབ་འདོད་ཀྱིས།།
སྟོང་གསུམ་གསེར་གྱི་ཟླ་བ་མི་རུང་བ།།
རང་གི་འདོད་པའི་སྒོ་མོ་བཙན་གྱིས་བརྒྱབ།།

གནག་སྣུམ་སྐྲ་ཡི་ཉག་མ་རྩད་ནས་བྲེགས།།
ཆོས་གོས་རྣམ་གསུམ་རྒྱན་གྱིས་ལུས་ལ་མཛེས།།
འདུལ་བའི་བསླབ་ཁྲིམས་སྲུང་བའི་དགེ་སློང་ཡང་།།
རྐང་གཉིས་མི་ཡི་གྲལ་ལས་འདས་པ་མིན།།

དཔྲལ་གཉེར་གྱ་གྱུའི་རི་མོ་གདོང་ལ་གསལ།།
གཞོན་ནུའི་ལང་ཚོ་རྒ་བས་བཅོམ་གྱུར་ཀྱང་།།
ད་དུང་དུག་གསུམ་ནད་ཀྱིས་མི་གཏོང་ན།།
ནང་སེམས་བཙན་གྱིས་འགོག་པ་དོན་རེ་ཆུང་།།

སྐབས་རེར་དད་སེམས་བརྟན་པའི་མཇལ་བ་ཞིག།
ལན་རེར་སྡིག་སེམས་ཁོལ་བའི་སྨྱོན་པ་ཞིག།
ད་ལྟ་ང་དང་འགྲོགས་པའི་ཉེས་ཅན་ཞིག།
ཀུན་རྟོག་སེམས་ཁྱོད་ཁྲེལ་མེད་བདུད་ཀྱི་གཤིས།།
                    ༢༠༠༢         ༡      ༢༣ཉིན།

རྩོམ་ཁུངས། ༢༠༠༢ལོའི་གངས་རྒྱན་མེ་ཏོག་དེབ་བཞི་བ།