སྟོན་དང་བསྟན་འཛིན་སྡེ་བཅས་ལ།།
སྙིམ་ཟུང་པདྨས་ཕྱག་བྱས་ཏེ།།
སྙིགས་མའི་རང་མཚང་རྒྱ་མཚོའི་རྡུལ།།
སྐྲ་རྩེར་བླངས་ནས་གསོང་བོར་སྨྲ།།

སེམས་ཀྱི་སྡིག་ཅན་རྒྱལ་བོ་དེས།།
ལུས་ངག་དབང་མེད་བྲན་བསྒྱུར་ཏེ།།
བཅས་བྱུང་ཉེས་ལྷུང་མ་ལུས་པའི།།
གཟེང་རིང་ཚེར་མ་ཆར་དུ་འབབ།།

འཇིག་རྟེན་བདུད་མོ་ཁྲོས་སྟབས་སུ།།
མི་རྟག་མཛེས་མས་བསླུས་གྱུར་པས།།
ཐུབ་བསྟན་ནེའུ་གསིང་ཚལ་ཡངས་པོ།།
འཇིགས་རུང་གཡུལ་ས་ལྟ་བུར་བསྒྱུར།།

ལུས་ཀྱི་མ་རུང་ཁྲིམས་དཔོན་ལ།།
འཚོ་བའི་དཔྱ་ཁྲལ་འཇལ་དགོས་ཀྱང་།།
མི་བཟད་འཆི་བདག་གཤིན་རྗེ་ཡིས།།
ལས་ཀྱི་བྱ་ར་གཡེལ་མེད་སྒྲུབ།།

ཕྲལ་སྐྱིད་ཉི་མའི་གུར་ཁྱིམ་ནས།།
བདེ་བའི་འགྲེ་ལོག་བརྒྱབ་པ་ལ།།
ལས་ཀྱི་བསྡུས་པའི་གྲིབ་སོ་ནི།།
ངང་གིས་སླེབས་པ་མ་ཚོར་རམ།།

ཕྱུགས་ཀྱིས་བསྒྲུབ་ན་ཆེས་སླ་བའི།།
མལ་སྟན་བདེ་དང་ཟས་གོས་ནོར།།
འདི་ནི་བདེ་བའི་མཆོག་ཡིན་ཞེས།།
བདེན་གསུང་བཀའ་ལས་བྱུང་མ་གྱུར།།

མདོ་སྔགས་ཆུ་གཏེར་མ་བརྒལ་ཞིང་།།
བསོད་ནམས་གྲུ་ལ་མ་ཞུགས་པར།།
ཟ་འཚོལ་མཁན་པོའི་རྫིགས་ཉམས་དེས།།
ཆོས་གོས་སྙིལ་ལེར་མཛེས་ཆོས་ཙམ།།

བསླབ་ཁྲིམས་གཙང་མར་མི་སྡོམ་པར།།
ཤ་ཁྲག་དུ་ཆང་བག་མེད་སྤྱོད།།
སྒོ་གསུམ་དྲན་ཤེས་མ་བསྟེན་པས།།
རྩིང་སྤྱོད་ཧྲལ་བོས་ས་འདི་གང་།།

ཀུན་རྟོག་གླང་ཆེན་སྨྱོན་པ་དེ།།
ཆོས་བསམ་ལྕགས་ཀྱུས་མ་བཏུལ་ན།།
རྣམ་དཀར་དགེ་བའི་པད་ཚལ་ཀུན།།
སྐད་ཅིག་གཞོམ་པར་གདོན་མི་ཟ།།

འཁོར་ལོ་གསུམ་དང་ཆོས་བསམ་ལ།།
ཐབས་ཀྱིས་འབྲོ་བའི་ཉེར་བསྡོགས་རྩོམ།།
ཤོ་འཕེན་མིག་མང་རྣམ་གཡེང་ལས།།
ཉམས་སུ་ལེན་ཚེ་ངང་གིས་འདུ།།

རྒྱལ་བ་དངོས་ཀྱིས་མ་གསུངས་ཤིང་།།
ཉེ་བར་འཁོར་གྱིས་མ་བསྡུས་པའི།།
སྔར་མེད་འདུལ་བའི་བཅས་པ་མཁན།།
སངས་རྒྱས་གཉིས་པ་ཡིན་ནོ་ལོ།།

བཀའ་པོད་ལྔ་ཡི་སྒྲ་ཙམ་ཡང་།།
རྣ་བའི་བུ་གར་མ་སོན་པའི།།
ཆོས་བརྒྱད་དོན་གཉེར་ཟོལ་རྫུན་མཁན།།
སྙིགས་མའི་ཀློང་འདིར་མཚོ་ལྟར་བརྡོལ།།

ཐུབ་བསྟན་ཉི་མའི་འོད་འཚེར་བས།།
ཆོས་པའི་དྲན་རྟོག་པདྨའི་སྦུབས།།
ཅེ་རེ་ལོང་དུ་ཟུང་གྱུར་ན།།
ལོག་སྤྱོད་འབྱུང་བྱས་སྨྲོས་ཅི་འཚལ།།

རང་སྐལ་ཁ་ཤ་བོར་ནས་སུ།།
གཞན་ལུགས་ཉ་ཤ་ལེན་འདོད་པའི།།
གཡོ་སྒྱུ་ཝ་སྐྱེས་གཤིས་ཀ་ཡིས།།
གྲགས་འདོད་འབྲུག་སྒྲའི་བྲག་སྐད་འཆའ།།

ཉམས་དགའི་སྒྱུ་ལུས་གཞལ་མེད་ཁང་།།
བསྐྱུར་ནས་རྣམ་ཤེས་གཞན་བཞུད་ཚེ།།
གང་བསམ་ལས་ཀྱི་རང་གྲིབ་ནི།།
མི་འབྲལ་རང་གི་རྗེས་སུ་བསྙེགས།།

དེའི་ཕྱིར་ཚུལ་ཁྲིམས་ཞིང་ས་ནས།།
རྣམ་གྲོལ་མྱུ་གུ་འཁྲུངས་དགོས་ན།།
བག་ཡོད་ཆུ་ལུད་མ་ཚོགས་པར།།
དངོས་གྲུབ་འབྲས་བཟང་ཡོད་རེ་སྐན།།

རྩོམ་ཁུངས། ༢༠༠༢ལོའི་གངས་རྒྱན་མེ་ཏོག་དེབ་བཞི་བ།