བཙན་པོའི་ཕྲེང་བ་དོག་མོའི་འོབས་སུ་འཐོར།།

རྗེ་བོའི་མངའ་ཐང་ཟིན་མེད་འཇའ་རུ་གྲུབ།།

དཔའ་བོའི་གད་རྒྱངས་རླུང་དང་བསེར་བུས་ཁུར།།

ང་དང་མེས་པོའི་བར་ཐག་འཁྱུག་རིས་ཤིག།

གངས་ཀྱི་གློ་མཆིན་འཕྲུལ་གྱི་འཁོར་ལོས་བྲེགས།།

གཙང་གསུམ་ཆུ་བོ་ལྕགས་ཀྱི་སྦུ་གུར་དྲངས།།

ཡུལ་གྱི་རྩྭ་ཐང་བྱེ་མའི་རླབས་ཀྱིས་མནན།།

ང་དང་ཕ་སའི་བར་ཐག་འཁྱུག་རིས་ཤིག།

དབྱངས་གསལ་སོ་བཞིར་མི་སྡུག་མཚོན་རྩི་བསྒོས།།

ངག་གི་གདངས་ལ་བསླད་མའི་དྲི་ཞིག་འཐུལ།།

རྒྱབ་ཀྱི་སློག་པ་འགྱིག་གི་ལྭ་བར་བརྗེས།།

ང་དང་བོད་མིའི་བར་ཐག་འཁྱུག་རིས་ཤིག།

དབུས་ཀྱི་ཇོ་བོ་ལྷ་སའི་ཚོང་རྫས་རེད།།

ཙོང་ཁའི་སྐུ་འབུམ་ཨ་མདོའི་རྒྱ་སྡེ་རེད།།

མདོ་སྨད་བླ་བྲང་མདོ་ལྷོའི་དཀོར་མཛོད་རེད།།

ང་དང་བོད་ཀྱི་བར་ཐག་འཁྱུག་རིས་ཤིག།

བོད་ཀྱི་དཔོན་པོ་ཕལ་ཆེར་ལོང་བ་ཡིན།།

བོད་ཀྱི་ལས་བྱེད་ཕོ་མོ་གླང་ཞོན་ཡིན།།

བོད་ཀྱི་བླ་སྤྲུལ་མང་ཤས་ས་རྡོ་ཡིན།།

ང་དང་སློབ་གསོའི་བར་ཐག་འཁྱུག་རིས་ཤིག།

ཁྱེད་ཀྱི་འདོད་པ་གསེར་གྱི་ཁྲི་ཞིག་རེད།།

ང་ལ་མཁོ་བ་དམའ་མོའི་གདན་ཞིག་ཡིན།།

འུ་གཉིས་བསམ་བློ་མེ་ཆུ་རང་འཕྲད་རེད།།

ཁྱོད་དང་ང་ཡི་བར་ཐག་འཁྱུག་རིས་ཤིག།

སྤྲུལ་སྐུའི་མཛད་པ་སྐྱ་བོའི་གྲོང་ན་ཡོད།།

སྤྲུལ་སྐུའི་ཉམས་ལེན་འཁོར་བའི་མཚོ་ན་ཡོད།།

སྤྲུལ་སྐུའི་གསང་རྣམ་རིག་མའི་རུམ་ན་ཡོད།།

ང་དང་སྤྲུལ་སྐུའི་བར་ཐག་འཁྱུག་རིས་ཤིག།

གྲོགས་ཀྱི་དྭངས་མ་ཐོབ་དང་སྙན་གྱིས་བསླུས།།

ལུག་ཆུང་འཚོ་རོགས་དངུལ་ལོར་བརྩེགས་མས་བསླུས།།

ཁ་ཡ་ན་ཟླ་ངོ་ཆེན་ནོར་གྱིས་བསླུས།།

ང་དང་བརྩེ་བའི་བར་ཐག་འཁྱུག་རིས་ཤིག།

2010-3-4

རྩོམ་ཁུངས། མཚན་རྨ་རིང་མོ།