དགེ་ལེགས་དཔལ་གྱི་མཚན་མ་རྫོགས་དང་གཅིག།
དགེ་བའི་ལམ་སྣེ་མ་ནོར་སྟོན་དང་གཉིས།།
དགེ་མཚན་ཕན་བདེའི་དངོས་གྲུབ་སྩོལ་དང་གསུམ།།
རིན་ཆེན་རྣམ་གསུམ་སྐྱབས་ཀྱི་རྒྱན་དུ་མཐོ།།

མི་ཡུལ་འཇིག་རྟེན་ཁམས་ནས་སྐྱེས་དང་གཅིག།
མི་ཟས་སྤྱོད་བཞིན་སྐྱིད་སྡུག་མྱོང་དང་གཉིས།།
མི་ཡི་འཚོ་བ་ལད་མོས་རོལ་དང་གསུམ།།
མི་ལུས་བླངས་པའི་གོ་རིམ་ཙམ་དུ་ངེས།།

དགའ་བའི་ཚེ་ན་དགོད་སྒྲ་སྤུར་དང་གཅིག།
སྐྱོ་བའི་དུས་ན་མིག་ཆུ་ལུད་དང་གཉིས།།
དགའ་སྐྱོ་གཉིས་ཀ་རེས་མོས་འཁོར་དང་གསུམ།།
མཐོ་དམན་མི་ཡི་རྒྱུད་ན་ནམ་ཡང་གནས།།

ཁ་སང་གྲོགས་ཀྱི་དྭངས་མར་གྱུར་དང་གཅིག།
དེ་རིང་མི་མཐུན་འཁོན་འཛིང་འབྱུང་དང་གཉིས།།
སང་ཉིན་ཕན་ཚུན་སོ་སོར་གྱེས་དང་གསུམ།།
མི་གཤིས་འགྱུར་ལྡོག་ལ་ཁའི་དར་ལྕོག་འདྲ།།

རང་ལ་ཕན་ཚེ་བཟང་བོར་རྩི་དང་གཅིག།
གལ་ཏེ་གནོད་ན་ངན་པར་སྨྲ་དང་གཉིས།།
བཟང་ངན་རྣམ་དབྱེ་འོས་མཐུན་མིན་དང་གསུམ།།
རང་ཉིད་ཁོ་ན་བསམ་པའི་སྐྱེ་བོ་མང༌།།

བརྒྱད་ཟུང་ལང་ཚོའི་ཁོ་ལག་རྫོགས་དང་གཅིག།
ཤེས་རིག་སློབ་གྲྭའི་དགའ་ཚལ་འགྲིམ་དང་གཉིས།།
མདུན་སྐྱོད་བསམ་བློའི་མིག་རྒྱང་རིང་དང་གསུམ།།
དཔྱོད་ལྡན་ཡ་རབས་གཞོན་ནུར་དོན་གྱིས་ཚང༌།།

བློ་མང་བྱ་བའི་སྣེ་མོར་འཇུས་དང་གཅིག།
གང་ལའང་འཇུག་པཔར་མཐར་ཕྱིན་མེད་དང་གཉིས།།
དུས་ཚོད་དཀོན་པོ་གཡེང་དུ་ཤོར་དང་གསུམ།།
ཐ་ཚིག་ཅང་མེད་བླུན་པོ་ང་འདྲའི་སྲོལ།།

དལ་འབྱོར་རྟེན་རྙེད་དམ་པར་འཕྲད་དང་གཅིག།
མཁོ་བའི་གདམས་ངག་འཁྲུལ་མེད་ལོན་དང་གཉིས།།
བསླབ་གསུམ་ཉམས་ལེན་འབྲལ་བ་མེད་དང་གསུམ།།
ཁྲིམས་ལྡན་ངུར་སྨྲིག་འཛིན་པ་མཆོག་གི་གཤིས།།

གྲུབ་མཐའ་བརྩད་དེ་ནང་འཁྲུག་སློང་དང་གཅིག།
རྩྭ་ས་བརྩད་དེ་ནང་དམེ་བྱེད་དང་གཉིས།།
རང་རིགས་མི་མཐུན་ཕུང་ལ་སྦྱོར་དང་གསུམ།།
དམན་པའི་མི་ལ་ཚང་བའི་ཐན་ལྟས་ཉིད།།

བོད་ཡིག་བོད་སྐད་མི་མཁོ་ཟེར་དང་གཅིག།
རྒྱལ་བའི་བསྟན་ལ་ལྟ་ཚུལ་ངན་དང་གཉིས།།
གཞན་ལྟ་མཆོག་འཛིན་ཨ་གསར་ཆེ་དང་གསུམ།།
ཆུ་སྣ་གར་ཁྲིད་བུ་ལ་ངན་མཚང་འཛོམས།།

གཤིས་རྒྱུད་མི་བཟང་ཀུན་ལ་འཁོན་དང་གཅིག།
སེམས་རྒྱདུ་མ་ཐུལ་ཆོས་པའི་ཚུལ་འཆང་གཉིས།།
རང་རྒྱུད་གདོན་གྱིས་བརླམས་པའི་ལྟ་ལོག་གསུམ།།
དུས་ངན་སྙིགས་མིའེ་མཐའ་འདིར་ཤིན་ཏུ་མང༌།།

དམ་བཅའ་མི་བརྟན་གཞན་དབང་ཤོར་དང་གཅིག།
གཅེས་འོས་ལང་ཚོ་དོན་མེདབརླགས་དང་གཉིས།།
སྤང་བླང་དབྱེ་བའི་མགོ་མཇུག་ལྡོག་དང་གསུམ།།
ཤེས་དུས་འགྱོད་པ་བླུན་པོའི་ངང་ཚུལ་ཙམ།།

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག་དེབ་གསུམ་པ།