མཚན་རླུང་འཇམ་པོ་ལྷོད་ཀྱིས་ལྡང་བ་ཡིས།།
རྒྱ་ལྕང་ལོ་མ་སྒེའུ་ཁུང་འགྲམ་དུ་འཐོར།།
གློ་བུར་མཆི་མས་བརླན་པའི་སེམས་པ་ཞིག།
ཁང་མིག་གྲུ་བཞིའི་ནང་དུ་ཁོང་འདར་བྱེད།།

སྨྲེང་སེམས་ཁྲག་གིས་བརྫིས་པའི་གཞས་ཆུང་རེ།།
སྒེའུ་ཁུང་སྟོང་བའི་འཚམ་དུ་ཡང་ཡང་བླངས།།
འགྱོད་པའི་མལ་དུ་ཤུགས་རིང་འབྱིན་ཞོར་དུ།།
སྐྱོ་བའི་སྙན་ངག་བྲིས་པ་རྫོགས་མཐའ་མེད།།

དཀར་གསལ་ཟླ་བས་དུངས་སེམས་སྒོར་མོར་བསྐྱིལ།།
དགུ་ཚིགས་སྐྱ་མོས་བསམ་གཞིག་རྒྱང་དུ་བསྲིངས།།
གདུང་བའི་སེམས་པ་དགུན་གྱི་ཆུ་མོ་བཞིན།།
གྲངས་མེད་སྐར་ཚོགས་མཉམ་དུ་གཡོ་ཞིང་འདར།།

སྐྱོ་བ་སངས་ཕྱིར་རྒུན་ཆང་ཡང་ཡང་བཏུངས།།
བཟི་ཁ་བཙན་པོས་འདས་དོན་ཅི་ཡང་བསླངས།།
ལྷ་བྱ་དཀར་མོ་སྒེའུ་ཁུང་མཐོངས་ཡངས་ནས།།
མཁའ་མཐར་ཡལ་བའི་རྗེས་ལ་ཡིད་སེམས་འཁྲེང༌།།

གཞོན་པའི་ལང་ཚོ་དུས་ཀྱི་དབང་དུ་ཤོར།།
མཛེས་པའི་རྨི་ལམ་སྐར་མདའི་འགྲོས་ཀྱིས་ཡལ།།
ཀྱི་ཧུད་འཁོར་བ་རླབས་ཀྱི་རྩེ་མོ་ན།།
ལོ་མ་སེར་པོ་རང་དབང་མི་འདུག་ཨང༌།།

སྒེའུ་ཁུང་འགྲམ་དུ་བདག་གིས་ཅི་ཡང་ཤོར།།
སྒེའུ་ཁུང་སྟོང་བས་བདག་ལ་ཅི་ཞིག་བཞག།
སྒེའུ་ཁུང་སྟོང་བ་འདི་ལ་ཞེ་རེ་སྐྱོ།།
སྒེའུ་ཁུང་སྟོང་བ་འདི་ལ་འཇིགས་ཤིང་སྐྲག།

ལས་དང་སྐལ་བས་ལོ་ཟླ་ནག་པོར་བསྒྱུར།།
སེམས་ཀྱི་སྐྱོ་གདུང་རི་རབ་ལས་ཀྱང་ལྕི།།
སྡུག་གི་སྐྱེ་བ་ལན་གཅིག་མ་བརྗེས་ན།།
ཚེ་སྲོག་ཕྲ་མོ་འདིས་ཀྱང་ཐེག་པར་དཀའ།།

སྒེའུ་ཁུང་འགྲམ་དུ་ཕངས་པའི་ལུས་དང་སེམས།།
སྟོན་མཇུག་འདབ་ལོ་བཞིན་དུ་འཐོར་ཉེ་ཡང༌།།
ནམ་མཁའི་དབྱིངས་རིམ་འགྲིམས་པའི་མཚན་མོའི་མགོན།།
ཁྱོད་ནི་དེ་འདྲའི་ལྷིང་འཇགས་ཡིན་དོན་ཅི།།
                               ༢༠༠༢ལོའི་ཟླ༧པའི་ཚེས༢༡ལ་ཕ་ཡུལ་དུ།

རྩོམ་ཁུངས། ཀུ་ཤུ་དམར་པོ།