རང་གཞན་ཆགས་སྡང་གི་བདུད་དཔུང༌།།
བྱམས་བརྩེ་ལྷག་བསམ་གྱིས་བཅིལ་བའི།།
དབྱངས་ལྡན་མཚོ་བྱུང་གི་ལྷ་མོས།།
འཕྲལ་ཡུན་སྨྲེང་བ་འདི་སོལ་ཅིག།
ཀུན་རྟོག་རྣོ་དབལ་དེ་འབར་བའི།།
མྱུར་འཁྱུག་གློག་ཞགས་ཀྱི་འགྱུ་བ།།
སྨྱུ་གུའི་རྩེ་མོ་རུ་འཁྱུད་པས།།
སེམས་རྩ་ཐེངས་ཤིག་ལ་བསྔགས་པ།།
སྟོང་བསམ་ཆུ་གཏེར་གྱི་ཀློང་ནས།།
མི་ཚེ་འདུན་མ་ཡི་བརྗེད་བྱང༌།།
བག་མེད་རྡོག་ཁྲེས་དང་བསྡེབས་ནས།།
གཅིག་རྗེས་གཉིས་མཐུད་ཀྱིས་འདས་སོང༌།།
སྔར་བྱུང་ལྷན་འདུས་ཀྱི་ཉ་ཆུ།།
བར་བྱས་འདུ་འབྲལ་གྱི་གདུང་བ།།
མཐའ་མར་ཐོབ་ཤོར་གྱི་མཆི་མ།།
འདི་དག་ཆོས་ཉིད་ཀྱི་གཤིས་ཀ།
བརྗེད་དཀའི་བརྩེ་ཞེན་དེ་བརྡོལ་ནས།།
བསམ་མནོའི་དྲ་རྒྱ་ལ་རྒོལ་ཚེ།།
དྲན་གཞིས་དམར་པོ་ཡི་ལོ་ཟླ།།
སྨྲེང་གཞས་སྐྱུར་མི་ཡིས་ཁེངས་པ།།
རང་སེམས་དར་ལྕོག་ལ་གཏད་པས།།
སྒྱུ་མའི་འོབས་དོང་དུ་དྲངས་སོང༌།།
འཇིགས་སྐྲག་ཨག་སྐད་དེ་འཁོར་ཡང༌།།
སྐྱོབ་པའི་ལྷ་ཆེན་ཞིག་མ་མཐོང༌།།
སྡུག་ཡུས་སྨྱུག་རྩེ་རུ་ཕུད་ནས།།
ལོ་ཟླའི་ཆག་གྲུམ་དེ་བསྐྱལ་ཡང༌།།
བསམ་བློ་མུན་པ་ཡིས་བཟུང་ནས།།
ཁོར་ཡུག་དོག་པོ་རུ་སྣང་བྱུང༌།།
ཟང་ཟིང་འཇིག་རྟེན་གྱི་འཁོར་བ།།
ཁབ་ཀྱི་རྩེ་མོ་དང་འདྲ་བས།།
སྐྱིད་པའི་ལོག་མལ་དེ་བཙལ་ཡང༌།།
བདེ་བའི་གོ་སྐབས་ཤིག་མ་རྙེད།།
འབྱོར་ཚེ་ཉེ་འཁོར་གྱི་གཙོ་བོ།།
རྒུད་ཚེ་རྟིང་མ་རུ་བརྩི་བ།།
མི་ཡི་གཤིས་ཀ་ལ་བསམ་ན།།
བློ་ཕམ་རེ་ཐག་དེ་ཆད་འགྲོ།།
ཕྱི་ཡི་མཛེས་ཆ་དེ་རྒོད་པས།།
ནང་གི་ལྷིང་འཇགས་དེ་དཀྲོགས་པ།།
བརྩེ་བའི་འཛུམ་མདངས་ཀྱི་ཞགས་པས།།
དམར་པོ་སྙིང་ཆུང་དེ་བསྡམས་སོང༌།།
མཛེས་ལྡན་བརྒྱ་བྱིན་གྱི་གཞུ་མོ།།
བཤམས་པའི་གུར་ཁྱིམ་གྱི་ནང་དུ།།
སྤྲོ་སྐྱིད་འོ་མཚོ་ཡི་ཟིལ་མངར།།
སྤྱོད་པའི་ལས་སྐལ་དེ་ཕྲ་བ།།
འཁྲུལ་སྣང་སྣ་ཚོགས་ཀྱི་འཇིག་རྟེན།།
རྟོག་བཏགས་སེམས་འགྱུ་ཡིས་བཟུང་བ།།
བསམ་གཞིགས་ལྕོ་མོ་ཡི་བར་གསེང༌།།
ཤུགས་རིང་འགུམ་བརྩེགས་ཀྱིས་གཙེས་པ།།
རྣམ་རྟོག་དགུ་མདུད་ཀྱི་སེམས་རྩ།།
བགྲོད་ལམ་དོག་ཡི་ཡིས་བསླུས་པ། །
མགོ་བོ་ལྷགས་རླུང་གིས་གཏུབས་པས།།
ཉམ་ངའི་འཁུན་སྒྲ་ཞིག་ཤོར་འོང༌།།
རེ་སྨོན་ཁྲི་འབུམ་གྱི་ངོགས་སུ།།
འོད་ཟེར་ལམ་ཕྲན་དེ་སྙེག་པའི།།
གསར་བྱུང་སྔོན་ཐོན་གྱི་གྲས་སུ།།
བསྐྱོད་པའི་དམ་བཅའ་དེ་བརྟན་པ།།

རྩོམ་ཁུངས། ༢༠༠༤ལོའི་གངས་རྒྱན་མེ་ཏོག་དེབ་གཉིས་པ།