རྒྱལ་ཀུན་འཕྲིན་ལས་བཻཌཱུར་ཞུམ་མའི་ཁམས།།
ངོ་མཚར་ཏ་ཡིག་ལྗང་ཁུའི་འཕྲོ་འདུ་ལས།།
ཡིད་འཕྲོག་མཛེས་སྡུག་ལྷ་མོའི་ཟློས་གར་ཅན།།
འཇིགས་པ་བརྒྱད་ལས་སྒྲོལ་མཛད་དེ་ཡིས་སྐྱོངས།།
ཀ་དག་གདོད་ནས་ས་བཅུ་མཐར་སོན་མ།།
ཁ་བ་ཅན་གྱི་ལྷག་ལྷ་ཁྱད་འཕགས་མ།།
ག་སར་འགྲོ་དོན་ཐུགས་ལས་མི་གཏོང་མ།།
ང་ཅག་བྱམས་བརྩེའི་ཀློང་ནས་འདོར་མེད་མ།།
ཅ་ནེ་ཕོར་བ་ཙམ་གྱིས་ཆོག་སྙམ་མ།།
ཆ་རྐྱེན་ཞན་ན་ཐུགས་རྗེས་ལྷག་སྐྱོང་མ།།
ཇ་ནོམ་རྫས་ཀྱི་ལྕགས་སྒྲོག་མྱུར་གཅོད་མ།།
ཉ་གང་ཟླ་བའི་དཔལ་འཁུ་མཛེས་ལྡན་མ།།
ཏ་ལའི་ཤིང་གི་འདབ་གྱོན་དཀའ་ཐུབ་མ།།
ཐ་གྲུ་ཡངས་པོའི་སྡུག་བསྔལ་ཀུན་སེལ་མ།།
ད་ལྟའི་སྐལ་དམན་འགྲོ་ལ་ལྷག་གཟིགས་མ།།
ན་རྒ་འཆི་བ་དང་བྲལ་རྟག་བཞུགས་མ།།
པཱ་ར་མི་ཏཱའི་གསུང་ལ་བློ་ཡངས་མ།།
ཕ་རོལ་དགྲ་བགེགས་འཇོམས་པའི་མཐུ་ལྡན་མ།།
མ་ལང་ལྟར་རྨོངས་འགྲོ་བའི་ས་མཁན་མ།།
མ་རུ་མ་གྱུར་སེམས་ཅན་མེད་བསམས་མ།།
ཙ་རི་སྨྱུག་མའི་མདའ་ལྟར་གཞུང་དྲང་མ།།
ཚ་གྲང་དུམ་ཁ་ལས་སྐྱོབ་ནུས་ལྡན་མ།།
ཛ་ཡས་གང་གསུང་འཕྲིན་ལས་མྱུར་སྒྲུབ་མ།།
ཝ་ལེར་ཚུལ་ཀུན་རྟོགས་པའི་བློ་གྲོས་མ།།
ཞྭ་སེར་བསྟན་འཛིན་ཀུན་གྱི་སྡོངས་གྲོགས་མ།།
ཟ་མ་ངན་ངོན་བསྟན་པའི་དཔུང་གཉེན་མ།།
འ་ཅག་འགྲོ་བ་ཡོངས་ཀྱི་གདུང་སེལ་མ།།
ཡ་མཚན་བློ་སྣ་ཆོས་ལ་བཀྲི་བྱེད་མ།།
ར་བ་གངས་རིའི་ཡུལ་གྱི་ལྷ་གཅིག་མ།།
ལ་ལས་ལྟོ་གོས་དོན་ལ་རྒྱུན་འབོད་མ།།
ཤ་ཞེན་དུང་དུང་སེམས་པའི་བརྩེ་གཏེར་མ།།
ས་ཕྱོགས་ཀུན་ཏུ་འཕྲིན་ལས་རླབས་འཕྱུར་མ།།
ཧ་ཅང་བྱ་དཀའི་མཛད་སྤྱོད་རླབས་ཆེན་མ།།
ཨ་ཏི་ཤ་ཡི་རྗེས་སྐྱོང་ཁྱད་འཕགས་མར།།
ཧ་ཅང་ལྷག་བསམ་དཀར་པོའི་མགྲིན་པའི་རྒྱན།།
ཨ་སྡུག་བུ་ལ་བརྩེ་བ་ཟབ་པའི་ཕྱིར།།
ཀ་ཕྲེང་བྱུ་རུ་དམར་པོའི་འཕྱང་འཕྲུལ་འདི།།
ཁ་བཏོན་ཙམ་ཡང་མེད་པའི་ཡ་མ་བརླ།།
ག་ལེར་དགེ་སྦྱོང་ཞིག་གི་གཟུགས་འཛིན་པ།།
ང་ཡི་སོར་རྩེའི་གར་གྱི་རི་མོར་འཁྱུག།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་གཉིས་པ།