ཀ་ལ་པིང་ཀའི་མགྲིན་རྔ་ཇི་བཞིན་དུ།།
ཀ་མ་ལ་ལྟར་མཛེས་པའི་ལུས་དཀར་མ།།
ཀ་ལི་དགོངས་དོན་རིག་པའི་གནས་མཐའ་དག།
ཀ་ཡེ་ཆགས་བྲལ་མཁྱེན་པའི་ངག་སྦྱིན་མཛོད།།
ཀ་ནི་ཀ་ཡི་རྒྱལ་བོ་ཇི་བཞིན་དུ།།
ཀ་མ་རུ་ལྟར་རབ་མཛེས་གངས་རིའི་ལྗོངས།།
ཀ་མད་སུམ་ཅུའི་སྦྱོར་བ་རྒྱ་ཆེར་མཛད།།
ཀ་དག་ཡི་གེའི་བྱེད་པོ་ཨ་ནུ་དྲན།།
ཀ་ཅོག་ཞང་གསུམ་ལ་སོགས་ལོ་ཙཱའི་ཁྲོད།།
ཀ་རྣི་ཀ་ཡི་མཛེས་བྱེད་ཇི་བཞིན་དུ།།
ཀྭ་ཡེ་གངས་རིའི་ལྗོངས་འདིར་ཡོད་མིན་ཞེས།།
ཀ་ཁོལ་མ་ཡི་བྱེད་པོ་སྲོང་བཙན་སྨྲ།།
ཀ་ཁའི་སྦྱོར་བ་ཐོག་མར་མཛད་པའི་མགོན།།
ཀ་མ་ལ་ལྟར་དཀར་བའི་ལྗོངས་འདི་ན།།
ཀ་ལ་པིང་ཀའི་མགྲིན་སྙན་ཇི་བཞིན་དུ།།
ཀ་ཡེ་ཐོན་མིའི་བཀའ་དྲིན་སུ་ཡིས་གཞལ།།
ཀ་མིན་ཁ་མིན་ང་རྒྱལ་མཐོ་བ་འགས།།
ཀ་མད་སྦྱོར་བ་ཨ་ནུས་མ་མཛད་ཅེས།།
ཀ་ཁ་ཤེས་པའི་ཁུལ་གྱིས་རློམ་སེམས་བཅས།།
ཀ་སྒྲོགས་སྐད་ལྟར་རྣ་བར་འཛེར་ནས་འོང༌།།
ཀ་ཡེ་ཁ་བ་ཅན་གྱི་མཁས་དབང་འབུམ།།
ཀ་དག་ཐུགས་ཀློང་དབྱིངས་ནས་མགྲིན་གཅིག་ཏུ།།
ཀ་ལིའི་བྱེད་པོ་སམ་བྷོ་ཊ་ཡི་མཚན།།
ཀ་བ་ལི་ཡི་སྣོད་ན་ཅིས་མི་གསལ།།
ཀ་རྡོ་བོད་ཀྱི་ཡིན་པར་ཤེས་བཞིན་དུ།།
ཀ་བ་མེད་ཅེས་མུ་ཅོར་སྨྲ་བ་འདི།།
ཀ་བཤད་མཁན་པོ་ཅི་ལྟར་རློམ་ན་ཡང༌།།
ཀ་གཉིས་པ་ཡི་དཔེ་རུ་མི་འགྱུར་གྲང༌།།
ཀ་ཁ་སུམ་ཅུའི་བྱེད་པོ་མ་མཆིས་ན།།
ཀ་ཡེ་རང་རེའི་ཡི་གེའི་བསྟན་བཅོས་འདི།།
ཀ་མིན་རྡོ་མིན་མགོ་མེད་མཇུག་རྡུམ་དུ།།
ཀ་ཞེས་མཛུབ་མོ་སྟོན་ཡུལ་རྙེད་རེ་སྐན།།
ཀ་བཞི་གདུང་བརྒྱད་བོད་ཀྱི་གྲུབ་མཐའ་ཀུན།།
ཀ་དག་རིས་སུ་མ་ཆད་སམ་བྷོ་ཊ།།
ཀ་ལི་ཨ་ལིའི་བློ་ཕམ་ཡི་མུགད་པོ་ཡི་གེའི་འཕྲུལ།།
ཀ་ནས་དག་པས་སེམས་ཀྱིས་འདུད་ལ་ལྟོས།།
ཀྭ་ཡེ་ཁ་བ་ཅན་གྱི་གཞོན་ནུ་ཚོ།།
ཀ་མིན་ཁ་མིན་ཕྱོགས་ལ་མ་བརྒྱུགས་པར།།
ཀ་བ་གདུང་ལྕམ་བཀྲ་བའི་ཁང་མིག་ཏུ།།
ཀ་ཁའི་སྦྱོར་བ་ཞིབ་ཏུ་སྦྱོང་བྱོས་ཤིག།
ཀ་ཡེ་མཁས་པའི་གྲལ་དུ་འཚངས་ན་ཡང༌།།
ཀ་ཡིག་ནོར་གྱིས་དབུལ་ན་ངོ་རེ་ནོངས།།
ཀ་ལི་ཡི་གེའི་བྱེད་པོ་ཨ་ནུའི་དྲིན།།
བསྐལ་བའི་བར་དུ་བརྗེད་པར་མ་ཇུག་ཨང༌།།
ལྔ་རིག་ཤེས་བྱའི་མཁའ་དབྱིངས་དག་པའི་ཀློང༌།།
བརྩོན་འགྲུས་དར་དཀར་གཤོག་འདབ་རབ་བརྐྱངས་ནས།།
སྙན་ཚིག་མགྲིན་པའི་གླིང་བུ་བསྒྱུར་བཞིན་དུ།།
ཨེ་མ་བློ་གསལ་མཚོ་ཡི་ངོགས་སུ་འཕུར།།

རྩོམ་ཁུངས། ༢༠༠༠ལོའི་གངས་རྒྱན་མེ་ཏོག་དེབ་བཞི་བ།