སློབ་སྐུལ་ཨོ་ཡིག་སུམ་ཅུ་བ།
སྟོང་ལྡན་གསེར་གྱི་དར་སྐུད་ཕྲ་མོ་ཡང༌།།
ཟབ་རྒྱས་ཆོས་ཀྱི་གདངས་སྙན་འབུམ་རྫོགས་པ།།
ཟླ་གཞོན་མཛེས་པ་འཕྲོག་པའི་ཚངས་སྲས་མས།།
ངག་རིག་མཛོད་ཀྱི་སྒོ་བརྒྱ་ཧར་གྱིས་ཕྱེས།།
ཀོ་ཀུའི་གསུང་སྙན་སྒྲོག་ས་པའི་བསིལ་ལྗོངས་ནས།།
ཁོ་ཚོ་རྣམ་གཡེང་རྒྱ་ལ་ཚུད་མིན་པར།།
གོ་ལའི་སྤོ་ན་འགྱིང་བའི་རིག་གཞུང་ལ།།
ངོ་མ་ཕུ་ཐག་ཆོད་པར་སྦྱངས་ན་ལེགས།།
ཅོ་ཀའི་གདངས་ལ་འགྲན་པའི་སྙན་ངག་ལ།།
ཆོ་འཕྲུལ་སྟོང་གི་ཉམས་འགྱུར་མཐའ་ཀླས་པས།།
ཇོ་བོའི་དྲུང་ནས་ཤ་རུས་རྡོ་ཐུག་གིས།།
ཉོ་ཚོང་སྤངས་ཏེ་སྦྱངས་པ་གནད་དུ་ཆེ།།
ཏོ་ཀེར་ཇི་བཞིན་གཙུག་ཏུ་བཀུར་འདོད་ན།།
ཐོ་ཅོ་རྩུབ་མོའི་ཀུན་སྤྱོད་སྤངས་པ་དགོས།།
དོ་ཟླ་དབེན་པའི་མཁས་དབང་ལ་རེ་ན།།
ནོ་བསམ་རིག་པའི་གནས་ལ་འཁོར་བ་གཅེས།།
པོ་ཏི་མང་བོའི་དེ་ཉིད་རྟོགས་འདོད་ན།།
ཕོ་ཚོད་ཨུ་ཚུགས་བྱས་པས་ག་ལ་རྟོགས།།
བོ་དོང་བ་བ་ཞིན་བརྟུན་པ་རབ་བསྐྱེད་དེ།།
མོ་གཤམ་བུ་ལྟར་ལེ་ལོ་བྲལ་པ་དགོས།།
ཙོ་རས་ནོར་ལ་སྲེད་པ་ལས་ལྡོག་སྟེ།།
ཚོ་པོ་ཤ་མར་བསྲེལ་ལ་མི་སྤྲོ་བར།།
ཛོ་ཀི་དམ་པའི་ཀུན་སྤྱོད་ཕྲ་མོ་ཡང༌།།
ཝོ་བརྒྱལ་མ་སེམས་བརྩོན་པ་བསྟེན་ན་འཚེངས།།
ཞོ་དང་ཉ་ཟླ་རྒྱས་པའི་དཀྱིལ་འཁོར་བཞིན།།
ཟོ་མདོག་མཛེས་པའི་ལང་ཚོ་འཛོམས་ན་ཡང༌།།
འོ་སྐོལ་རིག་གཞུང་དང་དུ་མ་བླངས་ན།།
ཡོ་ལེ་ཕྱོད་ཀྱིས་མི་ཚེ་འདའ་ཉེན་ཆེ།།
རོ་མངར་ཁྱད་དུ་འཕགས་པའི་གཞུང་ལུགས་ལ།།
ལོ་མང་སྦྱངས་པ་བྱས་པའི་དཀའ་སྤྱད་འཕྲོ།།
ཤོ་དང་དུ་ཆང་ལས་ལ་མ་འབྱམས་པར།།
སོ་དཀར་གཞོན་པའི་དུས་འདིར་འབད་པ་དགོས།།
ཧོ་ཧོ་སློབ་སྐུལ་ཨོ་ཡིག་སུམ་ཅུ་བ།།
ཨོ་ཡིག་བྱ་དཀའི་ལམ་ལས་ཉེར་དྲངས་ཏེ།།
ཀུན་ད་དུང་ལྟར་དཀར་བའི་ལྷག་བསམ་གྱིས།།
བཙུན་ཆུང་མགོ་རིལ་ཞིག་གི་ངག་ལས་ཐལ།།
རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག