གང་ལ་བསྟེན་ན་ལེགས་པའི་ལམ་སྟོན་ཅིང༌།།
སྡུག་ཀུན་ཉེས་བརྒྱའི་དུག་མཚོ་ལས་འབྱིན་པ།།
ཟབ་ཡངས་ཤེས་བྱའི་སོ་ཕྲེང་རྒོད་པ་ཅན།།
ཐོས་བསམ་པདྨོའི་ལང་ཚོ་མཛེས་གྱུར་ཅིག།

ལེགས་བྱས་སྣང་བ་ཟ་བའི་སྙིང་ཁམས་ཅན།།
རྣམ་ཀུན་རྨོངས་པའི་མལ་ན་གནས་བཅས་པའི།།
གཏི་མུག་སྨག་རུམ་གཞོམ་པའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

ཇི་སྙེད་ཤེས་བྱའི་དེ་ཉིད་འབྱེད་པ་ལ།།
རྨོངས་པའི་མུན་པ་འཐིབས་པའི་དྲ་བ་ཅན།།
ཐེ་ཚོམ་ཚང་ཚིང་སྲེག་པའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

མ་འོངས་མཇུག་འབྲས་སྟོངས་བྱེད་གདོན་འདྲེ་དང༌།།
མི་ཚེ་རླུང་ལ་བསྐུར་བའི་ནུས་རྩལ་ཅན།།
ལེ་ལོ་རྣམ་བཞི་གཞོམ་པའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

ཆེ་བའི་མི་ལ་སྙན་པའི་གྲགས་པ་དང༌།།
སྐལ་ལྡན་བུ་ལ་རིག་པའི་རྣམ་དཔྱོད་དང༌།།
བསླབ་བྱའི་གནས་ལ་མཁས་པའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

མི་འཇིགས་གདོང་ལྔས་བཏེགས་པའི་ཁྲི་འཕང་རྩེར།།
ཞབས་ཟུང་འཁོར་ལོས་མཛེས་པ་རབ་བྱིན་ནས།།
ལེགས་བཤད་དྲིལ་ཆུང་དཀྲོལ་བའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

གཞུང་བཟང་སྟོང་གི་སྒོ་བརྒྱ་དབྱེ་བ་ལ།།
ཟབ་ཡངས་རྣམ་དཔྱོད་གསེར་གྱི་ལྡེ་མིག་མཆོག།
བདེ་བླག་བདག་གིར་འབྱོར་བའི་དཔལ་རེ་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

རིན་ཆེན་སྣ་བདུན་ཁེ་ཚོང་བྲིན་ལགས་ཀྱང༌།།
རྣམ་དག་ཀློག་པ་ཐོས་བསམ་འཁོར་ལོ་ནི།།
གསེར་དངུལ་གཡུ་བྱུར་ཀུན་ལས་བྲིན་པས་ན།།
ཐོས་བསམ་སྒྲོན་མེ་རང་གི་རྒྱན་དུ་བསྟེན།།

རྣམ་མཁྱེན་གོ་འཕང་མ་འཐོབ་དེ་སྲིད་དུ།།
ཟབ་ཡངས་ཤེས་བྱ་འོ་མའི་རྒྱ་མཚོ་ཆེར།།
རྣམ་དཔྱོད་གསེར་གྱི་གྲུ་རྫིངས་ལ་བསྟེན་ནས།།
འགྲོ་མང་ཐར་བའི་ལམ་སྣ་ཟིན་པར་ཤོག།

རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག