བརྩེ་ཞེན་གཏམ་མངལ་དུ་སྦྲུམ་པ་ཡིས།།
རང་སེམས་དུངས་པ་ལྡོག་མེད་ནད་ཀྱིས་གཟིར།།
སྨྲ་བརྗོད་བྲལ་བའི་སེམས་ནད་ལྕི་མོ་འདིས།།
ཉམ་ཆུང་བདག་ལ་སྲ་མོའི་ལྕགས་སྒྲོག་བརྒྱབ།།

སྒེག་འཛུམ་གར་གྱིས་མཛེས་པའི་བསླུ་བྲིད་དེ།།
བདག་གི་སེམས་སུ་ལྷུང་བའི་ནད་ཡམས་ཀྱིས།།
དུས་བཞིའི་འགྱུར་ལྡོག་སྒྱུ་མའི་འདུ་འཛིའི་ཀློང༌།།
སེམས་ཀྱི་རྨ་ཁ་གོར་མོ་རྡོ་བཞིན་སྲ།།

དགའ་བ་རང་ལ་ཐོབ་པའི་ཉིན་དུས་ནས།།
རེ་བ་འཛིན་དུ་མེད་པའི་འཇའ་ཚོན་བཞིན།།
རང་སེམས་རང་གི་གཙེས་པའི་ཆོས་ཉིད་ཁྲོད།།
ནམ་རྒྱུན་ཨ་ཐང་ཆད་པའི་དངན་པ་ཤོར།།

ཞེ་མཐུན་མཛའ་མོ་མེད་པའི་སྨག་རུམ་ན།
དྲན་པའི་གདུང་བ་སྙིང་དུ་སིམ་པ་ཡིས།།
རྨི་ལམ་གྲོང་མཐའ་ཉུལ་བའི་རོལ་རྩེད་དུ།།
ཡིད་ཀྱི་འདོདཔ་སྟོང་སྣང་གར་གྱིས་མྱོས།།

དྲན་པ་ཁྲི་ཕྲག་བརྒལ་བའི་ཕ་རོལ་ན།།
དུངས་སེམས་མིག་ཆུ་རྒྱ་མཚོའི་རླབས་སུ་རྩེན།།
ནམ་རྒྱུན་སོར་མོས་བགྲངས་པའི་རེ་སྒུག་ཁྲོད།།
རྨི་ལམ་འབའ་ཞིག་ཁོ་བོའི་གྲོགས་སུ་བསྟེན།།

མི་རེའི་སེམས་ན་སྡུག་གི་ཁུར་བོ་ཞིག།
རེ་བའི་འཇའ་ཚོན་ནམ་མཁའི་མཐོངས་སུ་ཡལ།།
ཞེན་ཆགས་གདུང་བ་ཟབ་མོའི་ངང་ཚུལ་ལས།།
འདོད་བརྩེའི་མེ་་ཏོག་བཞད་པའི་དུས་ནམ་ཞིག།

བརྩེ་སེམས་རླབས་ཕྲེང་འཕྱོ་བའི་རྩེ་མོ་ནས།།
འཇོ་སྒེག་ལང་ཚོས་ཕྱུག་པའི་མཛའ་མོ་ལ།།
སེམས་འཕྲིན་གཞས་སུ་བཏང་བའི་སྙན་ངག་འདི།།
ལྷན་འཛོམས་སྤྲོ་བ་འཛུམ་པའི་བརྡ་རུ་བཏང༌།།

ཉིན་མཚན་དྲན་པས་སྐྱོར་བའི་སྐྱོ་ངོགས་སུ།།
ལྷད་མེད་འོད་དུ་འཚེར་བའི་སེམས་པ་དེ།།
སྙིང་སྡུག་ལྷ་མོར་མཆོད་པའི་དན་རྟགས་སུ།།
རྫོགས་ལྡན་ཉི་ཟླའི་འོད་ཟེར་གྲོགས་སུ་སྦྲན།།
                                        ༢༠༠༣ལོའི་ཟླ༤པའི་ཚེས༣༠ཉིན།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་གསུམ་པ།