མིག་གི་ལམ་ནས་མི་ངོམ་པའི།།
ཡིད་ཀྱི་ངོས་ནས་མི་རྟོགས་པའི།།
ལུས་ངག་ཡིད་ནས་མི་ཚོར་བས།།
མི་ལའི་གསང་གསུམ་རྒོད་པ་ལ།།
 
རྐང་པ་བརྒྱབ་ནས་བཙལ་ན་འང་།།
མིང་གིས་བོས་ནས་འབོད་ན་ཡང་།།
ཨ་ལན་གཅིག་ཀྱང་མི་སྟེར་བས།།
མི་ལའི་ངག་སྡོམ་བཙུན་པ་ལ།།
 
སེམས་ནས་ཁྱོད་རང་དྲན་དྲན་ཡང་།།
ཡིད་ཀྱིས་ཁྱོད་ལ་མཆོད་མཆོད་ཀྱང་།།
སྐུ་གཟུགས་ཙམ་ཡང་མི་མཐོང་བས།།
མི་ལའི་ལུས་སྡོམ་གཙང་བ་ལ།།
 
གུང་ཐང་ཡུལ་ནས་བསྒུག་ན་ཡང་།།
རྔ་སྐྱ་སྡེ་རུ་མི་བཞུགས་པའི།།
དབེན་གནས་འགྲིམས་པའི་སྡིག་ཆེན་འདི།།
གར་འདུག་གར་སོང་ལྟོགས་སྐོམ་མྱང་།།
 
སྒོམ་ཆེན་གྲས་ཀྱི་མི་ལ་འདི།།
མགུར་གླུ་གྱེར་བའི་ཐོག་མར་གྱུར།།
འཆི་སྡུག་ཟད་པའི་ཐོས་པ་འདི།།
འདྲེ་སྲིན་འདུལ་བའི་སྔ་མ་ཡིན།།
 
བསྟན་པའི་ཁུར་ཆེན་སྒང་ནས་བཟུང་།།
མར་གྱུར་སེམས་ཅན་རི་ནས་སྒོམ།།
འཁོར་བའི་སྡུག་བསྔལ་དེ་ནས་རྟོགས།།
མཐའ་མར་སངས་རྒྱས་ས་དེར་བརྙེད།།
 
ཁྱོད་ནི་མི་ལུས་གྲུབ་ན་ཡང་།།
ཁྱོད་ཀྱི་བྱ་བྱེད་མི་ལས་བརྒལ།།
སྟོན་མཆོག་ཡིན་ཡང་ཧ་ལས་ངེས།།
གདོན་འདྲེ་ཡིན་ཡང་སྐྱི་གཡའ་ངེས།།
 

རྩོམ་ཁུངས། ངེད་དྲ་བ།