འདི་ལ་བརྩེ་བ་ཨེ་ཟེར།
ཁ་བ་ལྟ་བུའི་ཅི་ཞིག།
སེམས་སུ་སིབ་སིབ་བབས་བྱུང་།།
ཆུ་ཐིགས་འགའ་ཞིག་འཐོར་ཏེ།།
མིག་ཟུང་རབ་རིབ་བྱས་སོང་།།
སྣང་བ་སུན་པོ་བྱུང་སོང་།།
བརྩེ་བ་ལྷོད་པོ་ཆགས་སོང་།།
ང་དང་ཁྱོད་ཀྱི་ལམ་བུ།།
རྨི་ལམ་བཞིན་དུ་རིང་ངམ།།
དོན་ལ་ཡིད་སེམས་མཐུན་ཚེ།།
སྙད་ལ་མི་སྐྲག་ཟེར་ཞོར།།
གང་ཞིག་དཔང་ལ་འཇོག་མཁན།།
ཁྱོད་རང་ཡིན་ནམ་ཡིན་ནམ།།
ཚུར་ལ་མཐུན་ནམ་དྲི་དུས།།
ངོ་གདོང་དམར་པོ་ཆགས་སོང་།།
རང་ལ་ཐེན་ནོ་ཞེས་ན།།
གཏམ་ལ་ཡ་ལན་མི་འདུག།
སུ་ཞིག་ངུ་བཞིན་ངུ་བཞིན།།
ཕྱི་མིག་བལྟ་བཞིན་བལྟ་བཞིན།།
ཉིད་དང་བྲལ་ནས་འགྲོ་དུས།།
སྨྲེང་བའི་དབུགས་རིང་བཏང་ངམ།།
ཡིད་སེམས་སྐྱོ་སྐྱོ་ཆགས་ཉིན།།
གཅིག་པུ་ནང་དུ་ལྷགས་ཉིན།།
རང་ལ་བྲིས་པའི་ཡི་གེར།།
ལྟ་བཞིན་མཆི་མ་ཤོར་རམ།།
ཚིག་གསུམ་ཁྱོད་ལ་བཤད་པ།།
ཚིག་རྟིང་མནའ་ཡིས་བརྣན་པ།།
ཡིད་ལ་ཏུར་རེ་འཁོར་དུས།།
ཅུང་ཟད་འགྱོད་པ་སྐྱེ་འམ།།
དྲན་པ་རབ་རིབ་ངོས་སུ།།
རྐང་རྗེས་ཆ་གཅིག་ལྷག་འདི།།
མི་ཚེའི་ཕུ་རུ་བཏབ་པའི།།
གཏན་འདུན་ཁོ་ན་ཨེ་ཡིན།།
ལམ་འདི་ཀྱག་ཀྱོག་རེད་འདུག།
སྒོམ་འདི་མག་མོག་རེད་འདུག།
གནམ་སའི་མཚམས་སུ་རྒྱངས་པའི།།
མིག་འདི་མཆི་མས་བཀང་འདུག།
གཉུག་སེམས་དྲོད་ཤ་ཅན་པོ།།
སྡུག་གི་བྲན་ལ་མ་གཡར།།
འཇམ་པོའི་ལག་ཁུད་ལེན་དུས།།
སླར་ཡང་ལྷོག་ལྷོག་ལྡིང་བྱུང་།།
མེ་ཏོག་དམར་པོ་རྐང་གཅིག།
ཡིད་སེམས་མཚོན་པར་བསྐུར་ཡོད།།
ལོ་ཟླ་བསུབས་པའི་ཤོག་རལ།།
དེ་དང་ཐབས་ཅིག་བཞག་ཡོད།།
ཡིན་མིན་ཡག་བཙོག་མི་གཤིབ།།
ཡོད་མེད་བདེན་རྫུན་མི་བསྡུར།།
རང་བློར་བརྐོས་པའི་བྱམས་པ།།
དེ་ག་རང་གིས་ཆོག་ཨང་།།
སྐྱིད་སྡུག་མཉམ་བགོ་བྱས་ཆོག།
དགའ་སྐྱོ་ལྷན་ཏུ་ཁུར་ཆོག།
ང་ལ་ཅི་ཡིན་མ་འདྲི།།
འདི་ལ་བརྩེ་བ་ཨེ་ཟེར།།
རྩོམ་ཁུངས། ངེད་དྲ་བ།