འཁོར་བར་སྙེག་པ།

འཚོ་བའི་རྩི་སྨན་བྲལ་བ་ཡི།།
བས་མཐའི་གནས་མལ་སྐྱ་བོ་ནས།།
ཆར་དང་རླུང་བས་ཟོས་པ་ཡི།།
མི་ཚེའི་དར་ཤིང་སྙིང་པོ་མེད།།
འཁོར་བའི་རི་རྩེ་སྨུག་པོ་ཡི།།
རྩི་མགོར་ཆགས་པའི་ཟིལ་བ་ཡིས།།
སྣང་བའི་ལོ་མར་མདངས་བྲིས་པའི།།
སྐྱེ་བོ་དག་གི་དབྱར་ཁ་རིང་།།

              དངན་པ་ཤོར་བ།

སྟོན་ཀའི་མཚན་མོར་ཤར་བའི།།
ཟླ་བ་ཅི་འདྲའི་མཛེས་སོང་།།
མཛེས་ཀྱང་གྲོགས་མེད་ཡིན་པས།།
ཟླ་བས་སྐྱོ་བ་ཁུར་འདུག།
གནག་སྣུམ་སྐྲ་ཡི་ལན་བུ།།
གཙང་པོའི་གཞུང་ལ་སྐུར་བའི།།
ལང་ཚོ་སྨིན་པའི་བཙུན་མ།།
ཟླ་བ་དེ་དང་མཚུངས་ཨང་།།

            འཇིགས་པའི་རྨི་ལམ།

ང་ནི་རྟ་ཕོའི་གོང་ནས་གནམ་ལ་འཕུར།།
རྟ་ཕོ་ལྕག་གིས་བྲབས་ཏེ་གནམ་ལ་འཕུར།།
གནམ་གྱི་བྱི་འུའི་ཁྱུ་ཞིག་འུར་སེར་དཀྲོགས།།
སྐར་མའི་ཕ་བོང་འགའ་ཞིག་ས་རུ་སྒྲིལ།།
དེ་ཚེ་དགུ་ཚིགས་བྲུག་ཏེ་མི་རྟ་གཉིས།།
ལྷ་མིན་གནས་སུ་ཀྱེ་མ་ཁུར་སོང་ངོ་།།

             དོ་ནུབ།

ཟླ་འོད་ནད་པ་ཞིག།
སིབ་སིབ་ངུས་སོང་ངོ་།།
རླུང་བུ་པྲ་ཆལ་ཞིག།
ཚག་ཚག་བགད་བྱུང་ངོ་།།
གཅིན་པ་སེར་པོ་ཞིག།
ཤག་ཤག་ཤོར་སོང་ངོ་།།
སེམས་ཀྱི་ལྕང་མ་ཡང་།།
ལྕུག་ལྕུག་འདར་བྱུང་ངོ་།།

             བུམ་པ་རྙིང་བ་ཞིག

བུམ་པ་འདི་ཡི་ཞབས་བརྡོལ་འདུག།
བུམ་པ་འདི་ཡི་མཆུ་ཆད་འདུག།
འདི་ལ་བུམ་པའི་མིང་ཡོད་ཀྱང་།།
བུམ་པའི་མཚན་ཉིད་འདི་ལ་མེད།།
རྨ་བྱའི་སྒྲོ་ཡི་ཁ་རྒྱན་དང་།།
དར་གྱི་སྐེ་དཀྲིས་ཡོད་ན་ཡང་།།
བདུད་རྩི་བླུགས་ས་མི་ལོ་བས།།
བུམ་པ་འདི་ནི་ང་མི་དགོས།།
བྱིས་པའི་རྩེད་ཆས་མི་མཛའ་ཞིང་།།
རྒན་པོའི་གཅིན་རྫ་མི་ཉན་པའི།།
སུ་ལ་ཡང་ནི་མི་མཁོ་བའི།།
བུམ་པ་འདི་ནི་གཅོག་རྒྱུ་ཡིན།།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།