སྐྱེ་བའི་རྨུ་ཐག་འཐེན་སའི་ལུང་པ་རུ།།
སྤྱན་གྱི་གཙང་བོ་ཐོག་མར་འབེབས་པའི་དུས།།
ལམ་ཁའི་རྡུལ་དང་མི་ཚོགས་ཕལ་མོ་ཆེས།།
ཁྱེད་ལ་སུན་གཙེར་མཛད་པས་སྐྱོ་འམ་ཅི།།

ལས་ཀྱི་ཆུ་ཀླུང་ཆེན་པོའི་རྔམས་ཁ་ལས།།
ཡིད་ལ་སིམ་པའི་མགུར་ཞིག་བཞེངས་བའི་ཚེ།།
མི་ཁའི་གྲིབ་མ་མགོ་རུ་ལྡིང་བ་ལ།།
ཞེད་སྣང་ཨེ་བྱུང་དབྱངས་ཀྱི་སྲས་པོ་ལགས།།

ད་ནི་འཁོར་བའི་གཡུལ་ས་ཆེན་པོ་ལས།།
འཆི་བ་སྒུལ་བའི་གཞས་ཤིག་འདོན་ཞོར་དུ།།
རང་གིས་བཙལ་བའི་ཉམ་ངའི་རི་བོ་ལ།།
གོམ་པ་རྟབ་པོར་འཐེན་ནས་གང་དུ་འགྲོ།།

སུན་སྣང་ཁུད་ཀྱི་ཚེ་རབས་ད་ལྟ་བར།།
ངག་གི་བྱིན་རླབས་སྤུང་བར་བྱེད་པའི་སྒང་།།
སྲིད་པའི་རྒྱ་མཚོའི་ཁ་རུ་འཕྱན་པ་ཡི།།
བདག་ཀྱང་ཁྱོད་ཀྱི་གམ་དུ་འགྲོགས་ནས་ཡོད།།

ཀྱེ་མ་སྐྱོ་བའི་སྨུག་པ་རབ་འཐིབས་པའི།།
ང་ཚོའི་མདུན་འདི་གང་ཡིན་ཅི་ཆ་སྟེ།།
སེམས་ཀྱི་སྡིངས་ཆའི་རྗེས་སུ་འགྲོ་བ་ལ།།
ཟོལ་ཟོག་བྲལ་བའི་ལས་ཤིག་སྙེག་འགྲོ་ཨ།།

              2015  12  12    མཚན་མོ་ལ་ཤར་མར་བྲིས།

                                                        རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།