དཀར་ནག་རྟེན་གྱི་དབྱིངས་རིམ་ནས།།
    ལས་ཀྱི་མར་མེ་མངོན་ཆུང་མ།།
    དལ་གཅིག་རླུང་གིས་གཡོ་བའི་དུས།།
    སྒྱུ་མའི་མེ་ཏོག་རྡུལ་འཛིན་མས།།
    མི་འཇིགས་སྙིང་རྗེའི་འཛུམ་དཀར་གྱིས།།
    ཆུ་བུར་མིག་ལ་ས་མཁན་མཛད།།

    སྣ་ཚོགས་འཁོར་བའི་འཐབ་རྩོད་ཁྲོད།།
    ལུས་པོ་འཚང་ཁས་བརྙས་པ་དང་།།
    སེམས་པ་ག་ཞས་བསླུས་པ་ན།།
    སྒྱུ་མའི་མེ་ཏོག་རྡུལ་འཛིན་མས།།
    ཐབས་དང་བདེན་པའི་གློག་འོད་ཀྱིས།།
    རྐྱེན་གྱི་མུན་པ་སྣང་བར་བྱས།།

    འདིར་སྣང་འཚོ་བའི་དགའ་ཚལ་ནས།།
    སྣང་བ་རི་དྭགས་ཆ་གཅིག་ལ།།
    དབང་དང་དངུལ་གྱི་མདའ་ཕོག་ཚེ།།
    སྒྱུ་མའི་མེ་ཏོག་རྡུལ་འཛིན་མས།།
    བྱམས་དང་བརྩེ་བའི་གོས་དཀར་གྱིས།།
    འབྱུང་བ་སེམས་ཀྱི་རྨ་ཁ་གསོས།།

    དུས་ཀྱི་བེམ་རོའི་ཚལ་ནང་ནས།།
    ཤེས་པའི་བུ་ཆུང་འཁྱམ་པ་དང་།།
    སྨྲ་སྒོའི་མཚོན་ཆ་བོར་བའི་དུས།།
    སྒྱུ་མའི་མེ་ཏོག་རྡུལ་འཛིན་མས།།
    དབྱངས་གསལ་འཕྲུལ་གྱི་ཞགས་པ་ཡིས།།
    མི་ཤིགས་ཐབས་ཀྱི་འཕོ་བ་འདེབས།།

    སྒྱུ་མའི་མེ་ཏོག་རྡུལ་འཛིན་མས།།
    ཉི་ཟེར་སོར་མོས་ཕབ་པ་དང་།།
    ཟླ་འོད་ལན་བུས་འཁྲིད་པ་ཡི།།
    ཉིན་དང་མཚན་མོའི་སྤྲུལ་བསྒྱུར་འདིས།།
    ངག་གི་ར་རི་སེལ་བའི་ངང་།།
    རིག་བྱེད་དབྱངས་ཀྱི་བཙན་ས་ཟིན།།

    སེམས་ཀྱི་ཉོན་མོངས་ཞི་བ་དང་།།
    ལུས་ཀྱི་སྲེད་པ་དག་གྱུར་ནས།།
    སྐྱེ་འཆིའི་བཙོན་ལས་ཐར་བ་ན།།
    སྒྱུ་མའི་མེ་ཏོག་རྡུལ་འཛིན་མས།།
   ཟག་མེད་གླུ་ཡི་དགའ་སྟོན་གྱིས།།
   རྫོགས་ལྡན་ཕྱི་མའི་སྣང་བ་འགྲེམ།།

                   2019/9/18 ཕྱི་དྲོའི་ཆ་ལ།
 

རྩོམ་སྒྲིག་པ། གངས་དགའ།

(མཆོད་མེའི་པར་དབང་གཞན་གྱིས་དགོལ་མི་རུང)