སེམས་ཀྱི་བཞུར་རྒྱུན།(སྙན་ཚོམ)
གླེང་གཞི།
ད་ནངས་ནམ་ལངས་དུས་ཀྱི་དང་པོ་ལ།།
སེམས་ཀྱི་འཆར་སྒོ་སྣ་ཚོགས་རྒྱུད་མར་བྱུང་།།
ཅི་ཞིག་འབྲི་འདོད་གློ་བུར་སོར་རྩེ་འཚབ།།
གང་དྲན་ཡི་གེའི་ཕྲེང་བར་སྤེལ་བ་དགེ།
ཁེར་རྐྱང་།
འཇིག་རྟེན་ཕྱི་མ་གང་གི་གང་ཞིག་རེད།།
ད་དུང་དེ་ལ་དུས་ཀྱིས་བསྐལ་ལོ་སྙམ།།
གྲོགས་དག་སྔ་ཕྱིར་ཤི་བའི་ཚུལ་མཐོང་ནས།།
གློ་བུར་སྐྲག་སྣང་དང་བཅས་ཤ་འདར་བརྒྱབ།།
མདུན་གྱི་དངུལ་དཀར་ཆང་ཕོར་བདུད་རྩིས་བཀང་།།
རང་ཤག་དྲོན་མོར་དྲི་མ་གཞན་ཞིག་འཁོར།།
དྲན་ཤེས་འཁྲུལ་ཞིང་གཞི་ནས་ཉོབ་པར་གྱུར།།
ཧུབ་གསུམ་བཏུང་རྗེས་སླར་ཡང་འདང་གསུམ་བརྒྱབ།།
ད་ནི་ཕལ་ཆེར་ཅུང་ཙམ་རྒས་རྟགས་རེད།།
ནམ་མཁའ་མཐོན་པོར་བལྟས་ན་སྔོན་པོར་མཐོང་།།
གཞོན་དུས་ལང་ཚོའི་འགྱུར་བག་སྟོང་ལྡན་པའི།།
སྤྲིན་དཀར་གཡེམ་མའི་འཛུམ་དཀར་གང་ལ་སོང་།།
དུར་ས་འཚོལ་བ།
མཐའ་བཞི་གངས་ཀྱིས་བསྐོར་བའི་ཁ་བའི་ཡུལ།།
དུར་སར་བྱས་ན་ཅུང་ཙམ་གྲང་གི་བསམ།།
དམའ་བ་རྒྱ་མཚོའི་འགྲམ་གྱི་སྐྱེད་ཚལ་དག།
དུར་སར་བྱས་ན་རུལ་ནས་འདག་པར་འགྱུར།།
མ་ཤི་གསོན་པོར་འགྲོ་སའི་དག་ཞིང་ཞིག།
ཕལ་ཆེར་འཇིག་རྟེན་འདི་ན་མེད་ཚོད་རེད།།
ཤི་ཡང་ཕྱི་མའི་མཐའ་ལ་མི་དམིགས་པའི།།
སྣང་སྐྱིད་དེ་འདྲ་ང་འདྲས་ག་ལ་ཡོང་།།
ཚོད་དཔག
འདི་ཡི་སྒེའུ་ཁུང་ནང་ནས་ཕར་བལྟས་པའི།།
ཁང་རྩེགས་དེ་ཡི་བརྗིད་ཉམས་མཚར་བ་ལ།།
དེ་ཡི་ནང་དུ་སུ་ལ་བསྒུག་ཡོད་པའི།།
ཉམ་ཆུང་དུས་ཀྱི་མགྲོན་པོ་ག་ཚོད་བཞུགས།།
དམ་བཅའ།
སྐྱེས་པའི་ཉི་མ་ནས་བཟུང་དེ་རིང་བར།།
དཀར་པོའི་ལྷ་དེ་ང་ཡིས་ཕར་མ་བཙོང་།།
ནག་པོའི་འདྲེ་དེ་རིན་གྱིས་ཚུར་མ་ཉོས།།
དེ་རིང་གློ་བུར་སེམས་འཚུབ་སྙིང་གཡུག་པ།།
ལྷ་ངོ་ཁྱི་ཡིས་བརྫིས་པ་ཡིན་ནམ་ཅི།།
དེ་རིང་ཉི་མ་འདི་ཡི་ཕན་ཆད་ནས།།
སྲོག་གི་རིན་ཆེན་ཀ་བ་མ་ཆག་བར།།
དཀར་པོའི་ཆོས་དང་ནམ་ཡང་མི་འབྲལ་ཞེས།།
རང་གིས་རང་ལ་མི་འགྱུར་དམ་བཅས་པའི།།
རང་སེམས་འདི་ལ་གནོང་འདི་གང་ནས་བྱུང་།།
མཇུག་བྱང་།
ཁ་ལ་མ་ཎི་དྲི་ཙམ་མི་བྲོ་བའི།།
བདག་ལ་ངེས་འབྱུང་སྐྱེས་པ་མ་ཡིན་མོད།།
སེམས་ཀྱི་བདག་མེད་རྟ་ཕོ་མཐུར་མེད་འདི།།
དེ་རིང་གློ་བུར་རྒྱུག་ཚུལ་འདི་འདྲ་ལགས།།
བདེ་ཆེན་ཐང་ལ་རྒྱུག་པའི་རྟ་ཕོ་འདི།།
དོན་མེད་ཁེར་རྒྱུག་ཡིན་ན་སྐྱིད་པ་ལ།།
ལས་ཀྱི་ལྕག་ཚན་ནག་པོས་དེད་པ་ཡི།།
བཙན་གྱི་བདའ་འདེད་ཡིན་ན་ཨ་ཙ་མ།།
༢༠༢༠ ༦ ༡༤ ཉིན།
རྩོམ་སྒྲིག་པ། ལྷ་སྐྱིད།
རྩོམ་ཁུངས། ངེད་དྲ་བ།