དྲན་པའི་གཞུ་ལ་ཚིག་གི་མདའ་མོ།།
རིག་པའི་རྩལ་གྱིས་མཐེབ་ལ་མནན་ཚེ།།
ངག་རིག་ལྷ་མོའི་བྱིན་རླབས་ཉི་མ།།
སྙན་ངག་མེ་ཏོག་ཚལ་ལ་ལོས་འབབ།།
ཚེས་རིས་བཞིན་གྱི་ར་ཁ་གོར་མོ།།
བདེན་དོན་རལ་གྲིས་ཡང་ཡང་བརྡར་ནས།།
རྒས་འཁོག་ལེགས་བཤད་བཙན་རྫོང་མཐོན་པོ།།
རྡུལ་དུ་བརླག་པའི་འབྲོང་རྒོད་སུ་ཡིན།།
ཕྱི་བལྟས་རྫ་རི་སྨུག་པོའི་གསེང་གི།
ནང་བལྟས་རྫ་ཁོག་སྐམ་པོའི་བར་ལ།།
སྙན་ངག་བུ་མོའི་མིག་ཆུ་ཕོར་གང༌།།
དབང་མེད་བྱོ་བའི་ལས་འཕྲོ་ཐེམས་འདུག།
ཕྱི་ཡི་འཇིག་རྟེན་དུར་ཁྲོད་འདྲ་འདྲ།།
ནང་གི་སེམས་ཅན་ཉེས་ཅན་འདྲ་འདྲ།།
བར་གྱི་སྙན་ངག་མཁན་པོའི་སྙིང་ཁ།།
གློ་བུར་མདའ་གྲི་མདུང་གསུམ་ཟུག་ཟུག།
སྟོད་ནས་རི་ཆེན་རྒད་པོ་ཙོག་ཙོག།
སྨད་ནས་ཆུ་ཆེན་རྒན་མོ་ངུ་ངུ༌།།
སྟོད་སྨད་རྒན་རྒོན་གཉིས་ཀྱི་དཀྱིལ་ན།།
ཐང་ཆེན་གདོང་ལ་སྐྱ་མདོག་ཤར་འདུག།
མིག་ལ་ཤར་བའི་འཇིག་རྟེན་ལྟད་མོ།།
རྣ་ལ་འཛུལ་བའི་མྱ་ངན་ཐར་ཐོར།།
སེམས་ཀྱིས་དཔྱོད་པའི་མཐའ་ལ་སླེབས་ཀྱང༌།།
དྲན་པའི་དཀྱིལ་ན་རི་མོ་རབ་རིབ།།
རི་ཆེན་རྩེ་མོ་ཁ་བས་གཡོག་ཐལ།།
ཐང་ཆེན་གཞོང་བར་མིག་ཆུ་འཁྱིལ་ཡོད།།
རྒོད་པོ་ཁེར་རྐྱང་ཞིག་གི་བྲག་ཐེམ།།
རླུང་ཆེན་གཡུག་ཐེངས་གཅིག་གིས་ཁུར་འགྲོ།
བླ་མའི་བཀའ་ལུང་གཡས་སུ་གཡུག་ནས།།
མཁས་པའི་ལེགས་བཤད་གཡོན་དུ་བཞག་ནས།།
མི་རབས་ཞིག་གི་དུར་ས་འདེབས་ས།།
ཆང་དང་སྙན་ངག་མཚན་མོ་གསུམ་ཡིན།།
ཡ་རབས་བུ་མོའི་འཛུམ་ལ་མ་ཆགས།།
མ་རབས་བུ་ལོའི་འཚང་ལ་མ་འཁྲེང༌།།
རང་གཤིས་གོར་མོ་རྡོ་ལོག་འདྲ་མོ།།
ང་དང་མི་རབས་གསུམ་པའི་སྲོག་ཡིན།།
ཀྭ་ཡེ་གངས་ཆེན་དབུ་འཕངས་མཐོན་པོ།།
ཝ་ཡེ་མཚོ་ཆེན་མེ་ལོང་འཁྱིལ་མ།།
ང་དང་འབྲོང་ཆུང་དར་མའི་གླུ་འདི།།
སྟོང་གསུམ་དཀྲུག་པའི་ཕོ་ཉ་ཡིན་འདུག།　
　　　　２００６－１０－２０

རྩོམ་ཁུངས། ངེད་དྲ་བ།