ད་ནངས་ཞོགས་པར་ཁ་བ་བབས་སོང་བ་ཡིན་ནམ
ངས་རང་ཉིད་ཀྱི་སྙིང་ཉེ་ལ་འཛིང་བའི་བྱ་སྤྱོད་དག་ལ་བསམ་གཞིགས་གནང་བཞིན
གྲང་འཁྱག་གི་ནངས་མོར་ཕྱི་རོལ་ལ་ཁ་བ་བབས་པའང་བརྗེད་སོང་
ཡིན་ཡང་
བདག་གིས་ཁ་བ་འདི་ཅི་ནས་ཀྱང་བརྗེད་མི་རུང་སྟེ
ཁ་དོག་ཆེས་དཀར་ཞིང་རྩུབ་རེག་བྲལ་བའི་ཁ་བ་འདི་བརྗེད་ཚེ
བདག་གིས་རང་སེམས་ན་རྟག་ཏུ་སྒོམ་པའི
ཡིད་འོང་གི་སྙིང་ཉེ་འདི་གཏན་དུ་བརྗེད་སོང་བ་མ་ཡིན་ནམ
ཁྱེད་ཀྱིས་ང་ལ་ལེ་བདའ་མ་གནང་དང་
ཞེན་ཆགས་དང་སྐྱོ་གདུང་གིས་སྤོས་པའི་ཞབས་རྗེས་དང་
གསལ་ཞིང་དྲུད་དྲུད་ཀྱིས་སྤོས་པའི་ཁ་བའི་ཁྲོད་ཀྱི་ཞབས་རྗེས་འདི་མཐོང་ན
བདག་གི་མིག་ཆུ་ལ་རང་དབང་མི་འདུག
ཁ་བ་འདི་ནི་བདག་ལ་ཆེད་དུ་བཏང་བའི་ཁྱེད་ཀྱི་ལྷག་བསམ་དང་རེ་སྨོན་ཡིན་ནམ
ག་ལ་མིན
ཆེས་དལ་ལྷོད་ལྷོད་ཀྱི་ངང་ནས་འབབ་ཅིང་
བདག་གི་ཁོར་ཡུག་མཐའ་དག་དཀར་བོང་བོང་དུ་བྱས་པར་བསམ་ན
ཁ་བ་འདི་དངོས་ནས་ཁྱེད་ཀྱི་བརྩེ་འདང་དང་མིག་ཆུ་ཡིན་འདུག
སྤྱིར་ཁ་བ་ཙམ་གྱིས་བདག་གི་ཁོང་ཁྲོ་ཞུ་བར་མ་ནུས་ནའང་
ཁ་བའི་ཁྲོད་ཀྱི་གོམ་རྗེས་དེ་དག་གིས
བདག་རྩ་མི་ཚང་བ་ལྟ་བུ་ཞིག་ཏུ་བཏང་སོང་ཨང་
ཁྱེད་ལ་དགོངས་དག་ཞུ སེམས་པའི་གཏིང་ནས་དགོངས་དག་ཞུ
གལ་སྲིད བདག་ལ་སླར་ཡང་བརྩེ་བ་སྐྱོང་བའི་གོ་སྐབས་ཤིག་སྟེར་ན
བདག་གིས་རང་ཉིད་ཀྱི་ཚེ་སྲོག་འཇུག་པའི་བར་དུ
ཁྱེད་ལ་གང་ནུས་ཀྱི་ཞབས་འདེགས་དང་འཛུམ་ཞལ་ཁོ་ན་སྟོན་ངེས
འདི་ནི་ཁྱེད་ཀྱི་འགག་ཕྲེང་གི་གདམས་ཀ་ཡིན་པས
ཅིས་ཀྱང་རང་ཉིད་མི་ནོར་བ་བྱེད་རོགས

རྩོམ་ཁུངས། ངེད་དྲ་བ།