རྒྱན་དང་ཤོ་ལ་འཐམ་པའི་སྐུ་རྩེད་གཡེང་བས།།
གནམ་སའི་ལེའུ་སྒུལ་བའི་གོད་ཆག་མ་ཚོར།།
ཉི་ཟླའི་ཟིལ་ཤུགས་རྒུད་པའི་ལོ་ཟླའི་གཞོང་ནས།།
ས་ཆེན་སྨག་གིས་བཟུང་བ་ལས་ལ་བཅོལ་ཡོད།།

ཨོཾ་ཆེན་ཀ་བ་འགྱེལ་བའི་དུས་ཚིགས་སྐྱ་བོས།།
ཁྱིམ་གྱི་ལྷིང་འཇགས་རླུང་ཁའི་ཙག་ལ་བསྒྲེས་ཀྱང་།།
གསོན་པོའི་དབུགས་སྐད་ཆད་པའི་མུ་གེ་ཐང་དུ།།
བདེན་དོན་རུས་པ་འཐོར་བའི་ལོ་རྒྱུས་ལྷག་ཡོད།།

ས་གཞིར་བརྡབ་གསིག་ཐེབས་པའི་བྱུང་བ་སྡུག་པོ།།
ཁ་བའི་སེམས་རྩར་མིག་ཆུའི་རྡོ་རུ་གྲུབ་ཡོད།།
ཨ་ཇོ་ས་མཐར་ལྷགས་པའི་དྲན་གདུང་རིང་མོས།།
རི་དང་ལུང་བའི་མཚམས་ཚིགས་དམ་པོར་སྦྲེལ་ཡོད།།

འོད་ཀྱི་སྣང་བ་ཆད་པའི་མ་ཎི་ལུང་བ།།
རི་བོའི་ལྟོ་བ་ཕྲལ་བའི་འཕྲུལ་གྱིས་བཟུང་ཞིང་།།
གྲོག་མའི་མཁར་རྫོང་རྩིག་པའི་ཇུས་གཞི་བསྟར་བས།།
བདག་པོའི་ཞེ་ལ་འཁོན་པའི་ན་ཟུག་བཏབ་ཡོད།།

རྟོགས་སད་ལོ་ཟླའི་མེ་སོན་གཞི་ནས་འཁྲུངས་པས།།
ས་གཞི་བཙོན་ལ་ཤོར་བའི་གནས་ལུགས་རྟོགས་ཤིང་།།
སྲོག་གི་སྐུད་པ་ཆད་པའི་མྱ་ངན་ནག་པོ།།
མི་རབས་ཤིག་གི་སྙིང་ལ་རྡོག་པོར་གྲུབ་ཡོད།།

མེ་ལྕེའི་འཕྱུར་ཐེངས་ཤིག་གི་ཚ་རླབས་དྲོན་མོས།།
གོ་ལའི་ཟེ་བ་སྒུལ་བའི་གཏམ་རྒྱུད་བྲིས་ཤིང་།།
བདེན་པའི་དབྱངས་ལ་ཞེན་པའི་མིག་དང་རྣ་བར།།
རེ་འདུན་ཁྲག་ལ་བསྒྲེས་པའི་བདེན་དཔང་བྱས་ཡོད།།

རྒྱ་མཚོའི་མཐའ་རུ་གྱར་བའི་མེས་པོའི་བུ་རྒྱུད།།
འབྲོང་གི་གཤིས་ལ་འཁུ་བའི་རང་ཚུགས་བརླག་ཀྱང་།།
སྐྲ་ལོའི་ཁ་དོག་འགྱུར་བའི་དུས་ཀྱི་སུལ་ནས།།
སྦྲ་ནག་དྲོད་ཁོལ་གསོ་བར་རམ་འདེགས་མཛོད་ཅིག།                                    
                   2008  12   16

རྩོམ་ཁུངས། ངེད་དྲ་བ།