ཉེར་གཅིག་དུས་རབས་བུ་མོ་མཁའ་ནས་འཛུམ།།

ཚན་རྩལ་རིག་པའི་འཕེལ་ཁ་ཕྱོགས་སུ་རྒྱས།།

གངས་དཀར་མུ་ཁྱུད་བཀྲ་བའི་མཁའ་གྲོང་ན།།

སྲོལ་རྒྱུན་མུན་པ་ནག་པོའི་བཙན་རྫོང་སྟུག།

ཨ་ཇོ་རི་ལུང་སྙེག་པའི་མལ་ནས་རྒས།།

ཨ་ཅེ་གནས་ཡུལ་འགྲིམ་པའི་སྲོལ་དུ་ལྷགས།།

རིག་ལྡན་དུས་ཀྱི་ལང་ཚོ་རླུང་གིས་ཟོས།།

ཕ་གཞིས་གོར་མོའི་ལྟེ་བ་མུན་པས་བསྟིམས།།

ཨ་ཕས་བུ་མོ་བཙོང་བའི་ཐབས་ཤིག་གཉེར།།

ཨ་མས་ཁྱིམ་ཐབ་སྲུང་བའི་ལས་ཤིག་བསྐྱངས།།

མཐའ་བྲལ་ཁོམ་མེད་སྲིད་པའི་གྲོང་ཚོ་ནས།།

མི་ཚེ་རྨོངས་ཞེན་ལྟ་བའི་ཁུར་གྱིས་མནན།།

ནུ་བོའི་མདུན་ལམ་ཨ་ཕའི་བཀའ་ལ་ཐོགས།།

ཕ་ཡི་བཀའ་ལ་རྡོག་བརྫིས་བྱེད་མ་ཕོད།།

གཅུང་མོའི་ཕུགས་རེ་ཨ་མའི་འགྲམ་དུ་ལྷགས།།

བརྩེ་ཆེན་མ་ལོར་རེ་འདུན་སློང་མ་ནུས།།

རིགས་ཞེན་ལ་རྒྱའི་ཕུགས་བསམ་མ་སྨིན་ཏེ།།

འཇག་མའི་རྩྭ་རྐང་རྩོད་པའི་གཡུལ་དུ་ཞུགས།།

ཁྱོད་ཤི་ང་གསོན་རྒྱལ་ཕམ་འདུ་ལོང་ཁྲོད།།

རང་མགོ་རང་གིས་གཅོད་པས་ཨ་རཻ་གླེན།།

གསར་བྱུང་འཕྲུལ་གྱིས་གོ་ལ་བདག་ཏུ་བཟུང༌།།

རྙིང་ཞེན་ལྟ་བའི་ཚིལ་དྲེགས་བོད་ལ་འགོས།།

རྡུལ་ཕྲན་དུས་རབས་འབོད་པའི་སྤྱི་ཚོགས་ནང༌།།

སུག་བཞིའི་འགྲོས་དང་བསྡོངས་པ་འོས་སམ་ཅི།།

གཞན་རིགས་མཁའ་གྲུར་ཞུགས་ཏེ་ལྗོངས་རྒྱུར་ཆས།།

རང་རིགས་གཡག་རོག་ཞོན་ཏེ་རྫོང་མཁར་སྙེགས།།

ཤེས་རིག་འགྲན་རྩོད་འཕྱུར་བའི་ཚ་་རླབས་ཁྲོད།།

མདུན་སྐྱོད་བསམ་བློ་མེད་པ་ཅི་ཡིས་ལན།།

གནའ་བོའི་སྲོལ་ལས་བརྒལ་བར་ལྷ་ལ་དོགས།།

ལྷ་ཆེན་ཁྲོས་པའི་འཇིགས་པ་བཟློག་མི་ནུས།།

གསར་བའི་ལྟ་གྲུབ་སྒྲོག་པར་མི་ལ་དོགས།།

མི་ཁ་ནག་པོས་མགོ་བོ་ཚོད་མེད་བརྡུང༌།།

མཁའ་ཡི་ལྷ་ལ་མཐུ་ནུས་བཙན་པོ་ཞིག།

འོག་གི་ཀླུ་ལ་གནོད་འཚེ་དྲག་པོ་ཞིག།

བར་གྱི་འདྲེ་ལ་ཆོ་འཕྲུལ་ཐན་ཐུན་ཞིག།

གངས་ཅན་བོད་པ་ལྷ་འདྲེས་བདག་གིར་བཟུང༌།།

བོད་སྐྱོབ་ཁས་སུ་འཆེ་བའི་ལྷ་སྲུང་དག།

བདེ་མོའི་མལ་དུ་གཟིམ་པའི་ཁོམ་མེད་དེ།།

བོད་པའི་རླུང་རྟ་མར་ལ་འགྲིབ་བྱས་ཤིང༌།།

རྗེས་ལུས་འདམ་དུ་བྱིང་བ་བཟོད་ལགས་སམ།།

                              ༢༠༠༤།༡༢།༢ཉིན།

རྩོམ་ཁུངས། ངེད་དྲ་བ།