ཕྱོགས་ཕྱོགས་ནས་གཡུག་ཡོང་བའི་རླུང་བུ
ཐག་རིང་ནས་ཁུར་ཡོང་བའི་ལོ་མ
གཙང་བོས་ཁྱེར་ཡོང་བའི་གད་སྙིགས་ཀྱི་ཕུང་བོ
གང་ལ་བལྟས་ཀྱང་ཁྱོད་ཀྱིས་ང་ལ་སྦྱིན་པའི་ལྡེ་མིག་དེ་ཡིན་མི་སྲིད

བྲག་གོག་དེའི་སྟེང་གི་གསལ་ལ་མི་གསལ་བའི་སྡེར་ཤུལ
རྩྭ་ཐང་དུ་ལུས་པའི་འབྲོང་མགོ་སྐམ་པོ
རི་རྩེ་ན་སྐྱོད་བཞིན་པའི་དར་ལྕོག་རལ་བོ
དེའི་མཐའ་འཁོར་དུ་ཡོད་པའི་གཞི་བདག་གི་ཚོགས
ཁྱོད་ཀྱིས་ང་ལ་སྦྱིན་པའི་ལྡེ་མིག་དེ་ཨེ་ཡིན

ལྷ་སའི་ཁྲོམ་གྱི་ནང་མ་ཁང་དག་གི་ཕྱི་ཤུན
བར་སྐོར་གྱི་འཚང་ཁ་ཤིག་ཤིག་གི་མི་ཚོགས
ཁ་དོག་མི་མཚུངས་པའི་ཕྱོགས་བཞི་མཚམས་བརྒྱད་ཀྱི་ཚོང་རྫས
རྒྱ་གྲོང་སོ་སོ་ནས་འབྱོར་བའི་སྨད་ཚོང་བའི་རུ་དཔུང་
མཇལ་ས་སྐོར་ས་མང་བའི་སེ་འབྲས་དགེ་གསུམ་གྱི་མཐའ་འཁོར
ཁྱོད་ཀྱིས་ང་ལ་སྦྱིན་པའི་ལྡེ་མིག་དེ་ཨེ་ཡིན

ཉི་མའི་དྲོད་ཁོལ་མི་རྟོགས་པའི་བྱ་དང་བྱིའུ
ནམ་ཟླའི་འགྱུར་ལྡོག་མི་ཚོར་བའི་འབུ་དང་གྲོག་མ
གཉའ་ཁྲི་བཙན་པོའི་ཤུལ་གྱི་རྩྭ་ཐང་དང་དང་སྤང་གཤོང་
ནོར་གནག་དང་དེའི་འགྲམ་གྱི་རྫི་བོ་ཁེར་རྐྱང་
ཁྱོད་ཀྱིས་ང་ལ་སྦྱིན་པའི་ལྡེ་མིག་དེ་ཨེ་ཡིན

ཁོད་ཡངས་པའི་ནམ་མཁའ་དང་སྤྲིན་དཀར
དེ་ལས་ཟགས་འོང་བའི་ཆར་ཆུའི་ཐིགས་པ་རེ
རླུང་གིས་སྐྱོར་བཞིན་པའི་སྦྲ་ནག
མེ་འོད་ལམ་ལམ་གི་ས་སྒྱེད
ཁྱོད་ཀྱིས་ང་ལ་སྦྱིན་པའི་ཁ་དོག་དེ་ཨེ་ཡིན

པར་ཆས་ཐོགས་པའི་སྐྲ་སེར་མིག་ལྗང་དག
ཁོང་ཚོ་སོང་ཤུལ་གྱི་ཕ་ཡུལ་གྱི་གཞིས་ཀ
ཁྱོན་ཡངས་པོར་འཁོར་འོང་བའི་དམ་བུ
ཤོལ་བུ རྐང་རྗེས་རབ་རུབ
ལག་པས་སྙོབ་ཐབས་བྲལ་བའི་ཁྱོད་ཀྱི་རང་གཟུགས
ཁྱོད་ཀྱིས་ང་ལ་བཞག་པའི་ལྗོངས་རྒྱུ་བྱེད་ས་དེ་ཨེ་ཡིན

ཐག་ཉེ་རིང་གང་ནས་བལྟས་རྗེས
ཁྱོད་ཀྱི་རང་གཟུགས་ངོ་མ་དེ་ག་པར་མཆིས
ཁྱོད་ཀྱིས་གོམ་པ་སྤོ་སའི་ས་གཞི་གོར་མོ
ཅི་ཞིག་གིས་མཚོན་པར་བྱེད་ཆོག 
      ༢༠༠༧.༡༢.༡༥དགོང་མོ་རང་ཤག་ཏུ་སྦྱར།

རྩོམ་ཁུངས། ངེད་དྲ་བ།