____མུ་གེ་ཐང་ནི་བདག་གི་མི་ལོ་ཉི་ཤུའི་དགའ་སྐྱོ་ཡི་གོམ་པ་རེ་རེ་ཤུགས་ཀྱིས་སྤོ་ས་ཡིན་སྲིད་ལ། ཁ་སང་རྐང་ཐང་གི་
འགྲུལ་བཞུད་ལས་མཐོང་བའི་བྱེ་མའི་ཐང་ཆེན་དེ་ཡང་ཡིན་སྲིད།

                                       དང་བོ། མུ་གེ་ཐང་གི་ནམ་མཁའ།
ཚ་ཟེར་སྟོང་ཕྲག་ལྡོག་འཕྲོ་བྱེད་སའི་རྩིག་སྡེབས་སྒོར་མོ
རེས་གསལ་རེས་མོག་གི་བར་སྣང་ཁེར་རྐྱང་དེ
བྱ་རྒོད་གང་གི་གཤོག་རྩེར་ཡང་འཕྲད་མ་མྱོང་བའི་སྟོང་དབྱིངས་ཉིད

ཆུ་ཡི་མངལ་དང་མི་ལྡན་པའི་སྤྲིན་པ་ཡང་མོ་འགས
ཚོད་ཚོད་ལ་ཁྱོད་ཀྱི་དབྱིངས་རིམ་ནས་ལྡིང་བསྐོར་རྒྱག་དུས
མེ་ལྕེ་ལས་ཀྱང་ཚ་བའི་ཚ་རླབས་དག་གིས
བདག་གི་ལམ་གྲོགས་ཀྱི་ཟུངས་ཁྲག་བཞིབས་སོང
བདག་གི་ལུས་ཕུང་གི་རྔུལ་ཆུ་བཙག་སོང

ལྷོ་ཕྱོགས་སུ་ཆས་པའི་རྒོད་པོ་དེས་ཀྱང
ཏག་ཏག་ཁྱོད་ཀྱི་མཁའ་དབྱིངས་བྱོལ་ནས་བུད་སོང་སྟེ
བསིལ་རླུང་གི་གཡབ་མོ་མེད་ས་ནས
རླུང་ཤུགས་ལ་བརྟེན་པའི་གཤོག་ཟུང་ཇི་ལྟར་བཀོལ

རེད་དེ ཁྱོད་ནི་མུ་གེ་ཐང་གི་ནམ་མཁའོ

                             གཉིས་པ། མུ་གེ་ཐང་གི་ས་གཞི།
ལུས་ཟུངས་ཡོངས་སུ་ཟད་པའི་རྒས་འཁོགས་ཤིག་གི་གཟུཊ་གཞིའམ
ཡོས་ཁྲ་རྔོད་བྱེད་ཀྱི་ཡོས་ས་ཚ་བོ
རྐང་རྗེན་ཚོའི་རྐང་བ་སྲེག་པའི་བྱེད་ནུས་དེས
གཏིང་རུམ་ན་ཡིབས་པའི་ས་བརླན་དེ་ལ་ཡང་བདེན་ཁ་མ་བྱིན

ཁྱོད་ཀྱིས་སྔ་མོ་ནས
སྐྱེ་དངོས་མང་བོ་ཞིག་གི་རྐང་བ་སྲེག་པས
ཁོ་ཚོས་ཚོར་བས་བཟུང་བའི་བགྲོད་བྱེད་དག
རྩྭ་ཐང་དང་གཙང་བོའི་ཕང་བར་མི་འཇོག་ཐབས་མེད་བྱུང

ཆེས་གསལ་ལ་ཆེས་ལྐོག་ཏུ་གྱུར་བའི་གནས་ལུགས་དེའི་དབང་གིས
ཁྱོད་རང་ཁེར་རྐྱང་དུ་ལུས་པའང་ཉེས་ཆད་ཅི་ལ་མིན
དེ་རིང་སྟེ བརྗེད་དུ་མི་བཏུབཔའི་ཉིན་མོ་འདིར
ང་ཁྱོད་ཀྱི་པང་དུ་འགྲེང་ནས་ཁྱོད་ལ་འདྲི་རྒྱུ་ནི
དཔའ་བོའི་གྲི་རྩེ་རྡུལ་དམར་གྱི་ཀློང་ན་འཁྱུག་པའི
བདག་གི་སྐྱ་དམག་དཔའ་རྒོད་དེ་ཚོ་གང་ན་ཡོད

འབྲི་མོའི་བཞོ་དབྱངས་སྦྲ་ནག་གི་གོང་ཁར་འཕུར་བའི
བདག་གི་ཨ་ཅེ་མཛངས་མ་དེ་ཚོ་གང་ན་ཡོད
ད་དུང བདག་གི་རྩྭ་ཐང བདག་གི་གཙང་བོ

                                    གསུམ་པ། མུ་གེ་ཐང་གི་སྤྱང་ཀི

རྐང་སྣུམ་མེད་པའི་རྒན་པོ་ཞིག་ཉི་མར་ལྡེ་བའམ
གཉིད་ཀྱིས་བཀུག་པའི་བྱིས་པ་ཞིག་ལྟ་བུའི
ད་དུང་དཔོན་པོ་རྒྱུ་རྔམ་ཅན་ཞིག་གི་གྲིབ་མ་ལྟ་བུའི
ནག་རོག་རོག་གམ སྐྱ་གག་གག་གི་སྲོག་ལྡན་དེ་ནི
བྱ་རྒོད་ཀྱི་རོགས་རམ་ཐོབ་མ་མྱོང་བའི
མུ་གེ་ཐང་གི་སྤྱང་ཀིའོ

ནོག་མེད་པའི་རྔ་མོང་ལོ་ལོན་དེས
བྱེ་རླུང་གི་དྲག་རྩུབ་དང་བྱེ་སྒང་གི་འཕོ་འགྱུར
གསར་འགྱུར་གྱི་ཚུལ་དུ་བསྒྲགས་ནའང
ཁྱོད་ཀྱི་སུ་ཡང་རང་ལ་རློམ་མི་རུང་བའི་འདོད་བློ་དེས
ཁྱོད་ཀྱི་གཞན་ལ་རློམ་འདོད་ཀྱི་ཀུན་སློང་བཅོམ་སོང

རྫ་རྩྭ་དང་རྫ་ཆུའི་ངར་ཤུགས་ཀྱི་དབང་གིས
མིག་འོད་དང་ཧུར་སྒྲས་རི་ལུང་འགེངས་པའི་འབྲོང་རྒོད་ཅིག
སྟབས་མ་ལེགས་པར་གཡང་ལ་ལྷུང་བའི་ཚུལ་མཐོང་བའི་རྒོད་པོ་དེ
མུ་གེ་ཐང་གི་མཁའ་དབྱིངས་བརྒྱུད་ནས་བུད་མ་སོང་ཚེ
མུ་གེ་ཐང་གི་སྤྱང་ཀི་ནི་སྔར་བཞིན་མུ་གེ་ཐང་གི་སྤྱང་ཀིའོ

                             བཞི་བ། མུ་གེ་ཐང་གི་རྩངས་པ།
མུ་མེད་པའི་བྱང་ཐང་དང་བྱེ་སྒང་སྣ་ཚོགས
རང་ཉིད་ཀྱི་ཆེས་མཐོ་བའི་མངའ་ཐང་དུ་བསམས་ནས
བྱེ་རླུང་གི་དྲག་རྩུབ་ལའང་བསམ་བློ་བཏང་མ་མྱོང

མུ་གེ་ཐང་གི་རྩངས་པ་ཚོས
ཁ་ཟས་འཚོལ་རྒྱུ་དེ་བྱ་བ་ཡོད་ཚད་ཀྱི་གཙོ་བོར་བྱེད་དེ
ཁོ་ཚོས་དཀའ་སྡུག་དང་ངལ་དུབ་རིང་དུ་སྤངས་ནས
མིག་གིས་མཐོང་ཚད་ན་ཡོད་པའི་རྡེའུའི་ཚོགས་ཀྱང
རང་ཉིད་ཀྱི་ཁ་ཟས་ཡིན་མིན་རྩད་ཞིབ་བགྱིད་ཅིང
བདག་གི་གྲོགས་པོས་ཀུ་རེའི་ཚུལ་དུ
བྱེ་ངོས་སུ་འགྲིལ་བའི་རིལ་མ་དེ་ཡང
མུ་གེ་ཐང་གི་རྩངས་པ་ཚོས
ལུས་སྲོག་འབེན་དུ་བཙུགས་ནས་བདའ་ཞིང་འདེད

མུ་གེ་ཐང་གི་རྩངས་པ་ཚོ
མཚམས་མཚམས་སུ་རྒན་པོ་བསམ་ཤེས་ཤིག་དང་འདྲ་ལ
ལན་ལན་རེར་བྱིས་པ་བསམ་མེད་ཅིག་དང་ཡང་འདྲ

ལྟོས་དང ལྟོས་དང
ཕ་གི་ན་རྩངས་པ་ཆུང་ཆུང་ཞིག་གིས་རིལ་མ་བདའ་གིན་འདུག
དེ་ཡི་ཉེ་ལོགས་ན་ཐང་ཆད་པའི་རྩངས་པ་རྒན་པ་ཞིག་ཉི་མར་ལྡེ་འདུག

                                        ལྔ་བ། མུ་གེ་ཐང་གི་ཚོར་འདུ།
མགོ་བོ་བཏེགས་ཤིང་ལག་ཟུང་བརྐྱངས་ནས
ཀི་རིང་ཞིག་ཤུགས་ཀྱིས་འདེབས་འདོད་པའམ
གཞོན་ནུ་མའི་ཁ་རླངས་ཕོག་མ་མྱོང་བའི་བྲང་གཞུང་འདི་ཡང
ཁྱོད་ཀྱི་རིལ་བོ་དེར་ཀུན་ནས་སྦྱོར་འདོད

སྔོན་ཆད་ཀྱི་སྔོན་ཆད་ཅིག་ལ
རྔ་མོང་དང་འགྲོགས་པའི་ཚོང་བ་དེ་ཚོ
མེ་མདའ་དང་འདྲིས་པའི་འབྲོག་པ་དེ་ཚོ
ཁྱོད་ཀྱི་ཕང་བར་ངལ་བས་གཙེས་མྱོང་ཟེར་བ
ལོ་རྒྱུས་མ་ཡིན་པའི་གཏམ་རྒྱུད་ཡིན་ནམ

སྔོན་ཆད་ཀྱི་སྔོན་ཆད་ཅིག་ལ
དཔུང་ཁག་ཅིག་གི་རུ་མཚོན་བསྒྲེངས་མྱོང་བའི་གནས་འདིར
དེ་རིང་ངས་མཐོང་བ་ནི
འགྲོ་རོགས་མེད་པའི་སྤྱང་ཀི་ཞིག་དང
འགྲན་རྩོད་ཀྱི་འདུ་ཤེས་མེད་པའི་རྩངས་པ་འགའ་རེད

མུ་མེད་པའི་བྱེ་ཐང་ཆེན་མོ་ཨང
སྐོམ་གདུང་གིས་གཟིར་བའི་ང་དང་ངའི་གྲོགས་པོ་ཚོ
ཆུ་དང་བྲལ་བའི་ཉ་མོ་ཇི་བཞིན
ཁྱོད་ཀྱི་ཕང་བར་དབུགས་ཀྱི་རྒྱུ་བ་འགག་ལ་ཉེ་དུས
བསིལ་ཆུ་ཕོར་བ་གང་གི་རོགས་རམ་ཡང་མེད་པ་ཅི་རེད
ད་ལྟ ངས་ཁྱོད་རང་རྒས་འཁོགས་ཀྱི་སྡོང་བོ་ཞིག་གམ
བྱེ་མས་ཁེངས་པའི་གྲམ་པ་ཞིག་རེད་ཅེས་སྨྲ་འདོད

རྩོམ་ཁུངས། ངེད་དྲ་བ།