སེམས་ཀྱི་རེ་སྒུག
བྱ་ཁུ་ལོ།
ཀླུ་འགྲམ་གྱི་ཤེས་རིག་གི་སྐྱེད་ཚལ་ན།
མཚོ་ཉིན་ནས་འཛུམ་པའི་ཡིད་འོང་གི་པདྨ་རྐང་གཅིག
ཡིད་ཆེས་དང་མཛེས་སྡུག་གིས་འཁྲུངས་འདུག་པ་ནི།
ཁྱེད་རང་ལས་གཞན་སུ།
བྱ་ཁུ་ལོ
ཁེར་རྐྱང་གི་ཁོ་བོས།
ཁྱེད་ཀྱི་གཉོམ་དུང་དུང་གི་སེམས་ནང་དུ།
བརྗེད་དཀའ་བའི་རྨ་ཁ་ཅིག་བཟོས་པ་དྲན་ཨེ་བྱུང༌།
འདས་སོང་བའི་ལོ་ཟླ་ཕྱིར་མིག་གིས་སྐྱེལ་བཞིན།
སང་ཉིན་གྱི་རེ་བའི་འོད་ཟེར་ལ་འཛུམ་དམུལ་དམུལ་གྱི་བསུ་མ་དང༌།
དགའ་ལྷང་ལྷང་གིས་ལམ་རྒྱགས་ཐེངས་གཅིག་བསྒྲིགས་ན་ཡང༌།
ཅིས་ཀྱང་ཁྱེད་དང་འུ་གཉིས་ལ།
ལས་དབང་བཙན་པོའི་བཀོད་སྒྲིག་ཅིག་གིས།
གྱེས་བྲལ་གྱི་ལོ་ཟླ་མོད་ལ།
ལྷན་འཛོམས་ཀྱི་ཞག་མ་ཕྲ།
གང་ལྟར།
སེམས་ཁོང་གི་དམ་བཅར་རྒས་པ་མེད་ན།
ནམ་ཡང༌།
ལས་སྐལ་ལ་ཟླ་ཟེར་གྱིས་མཛུབ་སྟོན་གནང་བཞིན་བཞུད་ཆོག
བྱ་ཁུ་ལོ
ཡུན་རིང་སེམས་སུ་ཉར་བའི་དྲན་གདུང་དོར་ཏེ།
འདུ་འཛོམས་ཀྱི་དགོད་སྒྲར་རོལ་ཞིང༌།
ལྷད་མེད་ཀྱི་སྙིང་གཏམ་གླེང་ཡ།
ཁྱེད་ཀྱི་མཛེས་སྡུག་ནི་གངས་ལྷ་མེ་ཏོག་ལས་ལྷག་ལ།
ཁྱེད་ཀྱི་སྐད་ངག་ནི་འདོད་པའི་ཕོ་ཉ་ལས་སྙན་པས།
ཁེར་རྐྱང་གི་བུ་ཆུང་ངས།
རྒྱང་རིང་རྒྱང་རིང་གི་གནམ་མཐའ་ནས།
ཁྱེད་ལ་ཡིད་སྨོན་གྱི་རེ་ལྟོས་བགྱིད་ངེས།
བྱ་ཁུ་ལོ
ཁོ་བོའི་རྨི་ལམ་གྱི་ཞིང་བཀོད་ན།
རྟག་པར་རེ་སྨོན་གྱི་བརྩེ་བས་འཁྱུད་པ་ནི།
ཡིད་ཆེས་དང་རེ་སྒུག་གི་འབྲས་བུའམ།
དུངས་ཞེན་དང་བྱམས་སེམས་ཀྱིས་འགྲུབ་པའི།
རྒྱུན་རིང་གི་ལེ་ཚན་ཞིག་ཡིན་ངེས།
བྱ་ཁུ་ལོ
རེ་ལྟོས་ཀྱི་འཕྲིན་ལན་འབྱོར་རྒྱུ་མེད་པས།
སེམས་ཀྱི་རེ་སྒུག ཇེ་ཆེ་ནས་ཇེ་ཆེ།
བརྩེ་འདང་གི་འབྲས་བུ་སྨིན་དུས་དབེན་པས།
སེམས་ཀྱི་རེ་སྒུག ཇེ་ལྕི་ནས་ཇེ་ལྕི།
ལྷུག་བརྗོད་ཀྱི་སྙིང་གཏམ་བཤད་ཐབས་བྲལ་བས།
སེམས་ཀྱི་རེ་སྒུག ཇེ་རིང་ནས་ཇེ་རིང༌།།
༢༠༠༨ལོའི་ཟླ༧པའི་ཚེས༨ཉིན།
རྩོམ་ཁུངས། ངེད་དྲ་བ།