སྣང་བ་བདེ་ཆེན་གྱིས་བྲོ་གར་འཁྲབ་ས།
རྩོད་མེད་རིག་འཛིན་ཚོས་སྤྱན་མིག་སྐོར་ས།།
མཁའ་འགྲོའི་མྱོས་བུམ་གྱི་ཟེའུ་འབྲུ་སྣུམ་པོ།།
ཟབ་ཞི་སྤྲོས་བྲལ་གྱི་ཀློང་དུ་མ་ཁུག།
མིག་ལ་མིག་སྨན་གྱི་རྩི་ཞིག་མ་བསྒོས།།
ལུས་ལ་དྲི་ཞིམ་གྱི་ཆང་ཡང་མ་བྱུགས།།
སྣང་སྟོང་གཉིས་མེད་ཀྱི་ལྷ་མོ་ཁྱོད་རང༌།།
རྟེན་འབྲེལ་ཟུར་མིག་གིས་མགྲོན་ལ་བསུས་བྱུང༌།།
ཕྱི་གསལ་ནང་གསལ་གྱི་བརྩེ་བའི་སྡོམ་ཐག།
དྲན་ཤེས་སྤར་མོ་ཡིས་ཤོར་དུ་མ་བཅུག།
ཁྲེལ་དང་ཕྱི་ཐག་གི་གསེར་རིའི་སྤོ་ལ།།
སྐྱོ་བ་དར་དཀར་གྱི་ལབ་ཙེ་བརྩིགས་ཡོད།།
ལོ་ཟླ་ཆུ་མོ་ཡི་གཤོང་ལ་ལྷུང་བའི།།
མི་ཚེ་མེ་ཏོག་གི་འདབ་ལོ་གཉོམ་པོ།།
རེས་སྐྱིད་རེས་སྡུག་གི་རླབས་ཀྱིས་སྐྱོད་བཞིན།།
འདས་པའི་འཚོ་བ་ལ་ཞེ་ནས་འཁྲེང་འདུག།
གཡོ་མེད་ཏིང་འཛིན་གྱི་ཞལ་ཁེབ་བཀྱགས་དུས།།
སེམས་ཀྱི་ལྷ་མོ་དེ་སྒྲོལ་མར་འཁྲུལ་འོང༌།།
འདི་ཕྱིའི་སྐྱབས་གནས་ལ་སྙིང་ནས་རེ་འང༌།།
གསོལ་འདེབས་ཚིག་གཅིག་ཀྱང་འབྲི་ལོང་མ་བྱུང༌།།
རྣལ་འབྱོར་ཚངས་དབྱངས་པའི་མགུར་གླུ་ཞིག་གིས།།
བརྩེ་བའི་རྒྱལ་ཁམས་དེ་མཚོན་པར་བྱས་ཤིང༌།།
སྙན་ངག་མེ་ཏོག་གི་མཆོད་པའི་ཕུང་པོ།།
ཟག་མེད་སྒྱུ་འཕྲུལ་གྱི་རོལ་བར་བསྐུར་ཡོད།།
སྔོན་བསགས་ལས་འཕྲོ་ཡི་ཤིང་རྟ་འདེད་མཁན།།
སུ་ཡིན་འདི་ཡིན་ལ་གསལ་ཁ་མེད་རུང༌།།
དུངས་པ་གསེར་དངུལ་གྱི་ལེགས་སྐྱེས་འདི་ཀོ།
སྙིང་གི་དཀྱིལ་འཁོར་ནས་འབུལ་མཁན་ང་ཡིན།།
ཕན་ཚུན་ལྷན་འཛོམས་ཀྱི་དགའ་བའི་འཁོར་ལོ།།
གཡས་སྐོར་གཡོན་སྐོར་ལ་བྲེལ་བའི་མི་ཚེ།།
གཞི་མེད་རྩ་བྲལ་གྱི་སྒོམ་ལ་ཞུགས་དུས།།
སྲིད་ཞི་མཉམ་ཉིད་ཀྱི་བདེ་བ་རེག་འོང༌།།
ཀུན་རྫོབ་པྲ་མཁན་གྱི་ཐག་པའི་སྣེ་ན།།
ལྷ་མོའི་ཞལ་རས་དེ་གཡུ་ཆུང་དྲུག་དཀར།།
སྐྱེ་བ་ཐེངས་གཅིག་ལ་རྙེད་འདོད་ཆེ་འང༌།།
དམ་ཚིག་ལྕགས་རི་ཞིག་མཐའ་ན་བསྐོར་ཡོད།།
ལས་དང་སྨོན་ལམ་གྱི་མར་མེ་དམར་པོ།།
མཆོག་གསུམ་བདེན་པ་ཡི་མདུན་དུ་བཤམས་ནས།།
འགྱུར་མེད་གཉུག་སེམས་ཀྱི་དཀྱིལ་འཁོར་ངོས་ལ།།
ཚེ་རབས་ལས་འཕྲོ་དེའི་ཕྱག་རྒྱ་འབྲི་དགོས།།
རྟོག་པའི་དྲ་བ་ཡི་ཕ་རོལ་ཞིག་ན།།
བློས་ཐུབ་ཡིད་བཞིན་གྱི་ནོར་བུ་གསོན་པོ།།
ཞི་དུལ་བག་ཡོད་ཀྱི་གླང་བོར་བཅིབས་ནས།།
ཀུན་ཏུ་རྒྱུ་བ་ དེའི་ངང་ཚུལ་དྲན་ནོ།།
མཁའ་འགྲོའི་འཁོར་ཚོགས་ཀྱི་སྐེད་སྐབས་བར་ནས།།
འཇའ་ཚོན་སྣ་ལྔ་ཡི་ལྡ་ལྡི་བྲེས་ཤིང༌།།
སྒེག་པའི་ཉམས་འགྱུར་གྱི་རི་མོ་བྲིས་ཀྱང༌།།
སེམས་ཀྱི་ལྷ་མོ་དེར་འགྲན་དུ་མ་དམིགས།།
རྡོ་རྗེའི་ཤུགས་གླུ་འདིའི་དབྱངས་རྟ་སྙན་མོ།།
སྲིད་གསུམ་ཟིལ་གནོན་གྱི་མགྲོན་པོར་ཆས་ན།།
དགའ་བ་བརྒྱ་ལྡན་གྱི་བརྩེ་བའི་དྭངས་མ།།
ཟུང་འཇུག་བདེ་ཆེན་གྱི་ཐབས་སུ་བསྔོ་འོ།།

རྩོམ་ཁུངས། ངེད་དྲ་བ།