སྣང་སྲིད་འཁོར་བའི་སྨུག་སྤྲིན་ཀློང་ལ།།
རྟག་འཛིན་སེམས་པས་ཞགས་པ་བཏབ་སྟེ།།
འཚོ་བའི་བདེན་པ་འཇའ་རིས་ཙམ་ཞིག།
རྣལ་འབྱོར་ཁོ་བོས་ཟིན་པ་འདྲ་འོ།།

སྣང་སྟོང་སྒྱུ་མའི་གཞིས་ཁྱིམ་ཞིག་ནས།།
བདག་མེད་འཕྲུལ་བའི་གཞས་ཤིག་གྱེར་ཏེ།།
འཕར་མ་ལྡིང་གི་བྱེའུ་ཁྱུ་གཅིག།
སེམས་པ་དངངས་པའི་གཡང་ལ་བཏགས་ཡོད།།

ཚོགས་གཉིས་གར་གྱི་རྟ་ཕོ་ཆིབས་ཤིང༌།།
ཐབས་ཤེས་ཟུང་གི་མདའ་གཞུ་ཐོགས་ཏེ།།
མི་འཇིགས་དཔྱོད་པའི་ཀི་སྒྲ་བསྒྲགས་ཚེ།།
ལོག་ཏོག་ཤྭ་བ་རི་ལ་བྲོས་ཐལ།།

བཀའ་བསྟན་གཉིས་ཀྱི་གླེགས་ཤིང་ངོས་སུ།།
ཆོས་དང་སྲིད་ཀྱི་གྲོས་གཞི་བྲིས་ཏེ།།
དེ་བཞིན་གཤེགས་པའི་ཕྱག་ལ་གཏོད་པར།།
རབ་འབྱོར་ཁོ་བོ་འཐད་པ་ཡོད་ལགས།།

དྭངས་གསལ་ཤེལ་གྱི་མཚོ་མོའི་ཀློང་དུ།།
དོགས་པ་སེམས་ཀྱི་མུ་ཏིག་གཏོར་ཚེ།།
གྲུ་ཆུང་བོར་བའི་ཉ་བ་ཞིག་གིས།།
སེམས་པ་སྐྱོ་བའི་ལན་ཞིག་བཏབ་ཐལ།།

དབྱངས་གསལ་སོ་བཞིའི་མཇལ་དར་རིང་མོ།།
འདི་ཕྱི་གཉིས་ཀྱི་མཚམས་ལ་འཐེན་ཡོད།།
བདག་པོའི་གྲེ་བ་སངས་རག་བར་དུ།།
བཟོ་བོ་རང་གིས་སྲུང་མ་བྱས་ཡོད།།

བདེ་སྡུག་ཚོར་བ་རྩྭ་མགོའི་ཟིལ་བ།།
རྐྱེན་གྱི་རླུང་བུ་གཡུག་ན་འཐོར་འགྲོ།།
རྣམ་རྟོག་དྲ་བ་ཆུ་མོའི་གཉེར་རིས།།
ལག་པ་བྲང་ལ་བཞག་ན་བརྗེད་འགྲོ

དུས་ཀྱི་དྲོད་ཁོལ་ཡལ་ཤུལ་ཞིག་ནས།།
མེ་ཏོག་འདམ་མ་འཐོར་ཤུལ་ཞིག་ཏུ།།
བརྩེ་བ་འཁྱག་པའི་གཡུ་སྦྲང་ཞིག་གིས།།
གཤོག་པ་རླུང་གིས་རལ་བ་དྲན་གི།།

མ་དག་འཁོར་བའི་སྒྲུབ་ཕུག་ཅིག་ནས།།
དག་པ་སེམས་ཀྱི་རང་རྩལ་སྦྱངས་ཏེ།།
སྡིག་བདེན་འཁོར་བའི་མཐོང་ཐོས་ཕྲ་རགས།།
འོད་གསལ་སྣང་བའི་མཁའ་ལ་བྲིས་ཡོད།།

རྩོམ་ཁུངས། ངེད་དྲ་བ།