ནོར་ལ་རྔམ་པ་ཆེ་བའི་མགོ་བོ་ཆེ།།
དྲི་ལ་ཞེན་ཆགས་ཆེ་བའི་སྣ་བོ་ཆེ།།
ཆང་ལ་ལྟོ་བ་ཡངས་བའི་ཁ་བོ་ཆེ།།
དཔོན་ངན་སྣང་བ་ཅན་ལ་རྣག་གིས་མཆོད།།

ཁ་ན་མེད་མུག་མང་བའི་ལོ་ལོན་ཚོ།།
ལག་ན་མཚོན་ཆ་མང་བའི་དར་མ་ཚོ།།
སྐེ་ན་གཡུ་བྱུར་མང་བའི་སྨན་ཤར་ཚོ།།
སྙིང་གཏམ་ཚིག་གིས་དྲང་མོའི་ཚིག་གིས་མཆོད།།

སྲང་ན་ཁྱིམ་ལུད་སྲེག་ནས་བདུག་སྤོས་བྱེད།།
ཁྱིམ་ན་ཆགས་གཏམ་གླེང་ནས་ཉི་མ་གཏོང༌།།
གང་སར་ཐལ་མདོག་མངོན་པའི་གཞི་རིམ་ན།།
ཁྱི་རྒན་རྒྱ་ལུའི་རླུང་རྟ་དགོང་ལ་མཉམ།།

ཁ་སང་གཞུང་དོན་ཤ་དང་རུས་པས་སྒྲུབ།།
དེ་རིང་གཞུང་ཟས་དཔོན་པོའི་འཁོར་གྱིས་ཟོས།།
དམངས་དོན་སྒྲུབ་སའི་གཞི་རིམ་སྲིད་གཞུང་ན།།
དམངས་གཡོག་བརྡ་རྒྱག་འདི་ཚོ་སྙིང་རེ་རྗེ།།

སྟོད་ཀྱི་རི་ལ་འཕྲིན་ཞིག་ད་སྐྱོལ་ཟེར།།
འགོར་འགྱངས་མ་བྱེད་དཔོན་པོའི་བཀའ་ཡིན།།
སྨད་ཀྱི་རི་ནས་མི་ཞིག་ད་བོས་ཟེར།།
ཚིག་འཇམ་སྨྲ་དགོས་དཔོན་པོའི་སྤུན་ཡིན་ཟེར།།

བསྡད་ན་མ་འདུག་རི་ལ་འགྲོ་དགོས་ཟེར།།
སོང་ན་མ་འགྲོ་གོང་རིམ་ཐོན་ཐལ་ཟེར།།
འགྲོ་འདུག་གདམ་ཀའི་བར་ནས་ལང་ཚོ་ཡལ།།
ཞང་གི་བརྡ་རྒྱག་འདི་ཚོ་སྙིང་རེ་རྗེ།།

                                  2005．12．1ཉིན་དངུལ་རྭ་ནས།

རྩོམ་ཁུངས། ངེད་དྲ་བ།