ཀ་དག་གཏམ་ཞིག་འཆད་རྒྱུ་ཁྱོད་ལ་མེད་ན།།

ཁ་བ་ཅན་གྱི་མི་རུ་གཏོགས་རབས་མི་འདུག།

ག་དུས་ཤིག་ལ་རང་ངོས་ཟིན་པ་བྱུང་ན།།

ང་ཡི་གམ་དུ་ཡོང་བའི་ཆོག་མཆན་བཀོད་ཆོག།

ཅ་ཅོ་མང་བའི་ཕོ་བྲང་དམར་པོའི་གམ་ན།།

ཆ་ལུགས་མི་གཅིག་མི་ཚོགས་བརྒྱ་མ་སྟོང་ཡོད།།

ཇ་ཆང་མཉམ་དུ་འཐུང་བའི་གྲོགས་ཤིག་མེད་ན།།

ཉྭ་ཤ་འདར་བཞིན་འགྲོ་དགོས་ཐེངས་མང་བྱུང་མྱོང༌།།

ཏ་ཐ་ག་ཏའི་གླེགས་བམ་དོ་ལ་བརྩེགས་ནས།།

ཐ་མ་མི་ཡི་མཛད་པ་སྐྱོང་དགོས་ཟེར་ན།།

ད་ལྟའི་ང་ལ་དོ་ཟླ་ཁྱོད་འདྲ་ཡོང་ན།།

ན་གཞོན་ངས་ཀྱང་དགོངས་དག་ཞུ་དགོས་མི་འདུག།

པ་མགོ་ལབ་ཀྱང་སྤོབས་པ་ཉམས་རྒྱུ་མི་འདུག།

ཕ་རོལ་མི་དེས་སྐད་ངན་ང་ལ་བཞག་ན།།

བ་གླང་མཛད་པ་སྐྱོང་ནས་འདུག་འདོད་མི་འདུག།

མ་གུས་གཏམ་གྱིས་འབོད་པ་ཁྱོད་ལ་གཏོང་ཆོག།

ཙ་རི་སྐོར་ནས་གཞན་ཡུལ་འགྲིམས་པའི་དུས་སུ།།

ཚ་སྡུག་མྱངས་པའི་གཏམ་དེ་ཁྱོད་ལ་བཤད་ན།།

ཛ་དྲག་ལམ་གྱི་ཁུར་བའི་ངལ་བ་འདི་དག།

ཝ་མོ་ཁྱོད་ཀྱིས་ཐོས་ན་དྲན་པ་འཆོར་སྲིད།།

ཞ་ར་མེད་པོ་མང་བའི་རྒྱ་གར་ཕྱོགས་ནས།།

ཟ་རྒྱུ་འཐུང་རྒྱུ་མེད་ཀྱང་ལོ་གསུམ་བསྡད་ནས།།

འ་ཅག་མི་རབས་འདི་ལ་ལྟོ་ཆས་བསྒྲིགས་ཏེ།།

ཡ་མེད་གཅིག་པུར་རང་ཡུལ་ཕྱོགས་སུ་ཐོན་ཡོད།།

ར་ལུག་སྐད་བརྡ་བསྒྱུར་པའི་ཁ་བ་ཅན་ནས།།

ལ་ལུང་མི་ཡིས་ང་ལ་སྡིགས་དམོད་བྱེད་ཀི།

ཤ་དང་ཁྲག་ལ་རྔན་པའི་ཡུལ་མི་འདི་དག།

ས་ཕྱོགས་འདི་ལ་གཏོགས་མིན་ཐེ་ཚོམ་སྐྱེས་ཡོང༌།།

ཧ་ལས་ཧང་སང་དགོས་པའི་དོན་ཞིག་མེད་ན།།

ཨ་ཇོ་འགྲོ་བའི་ཕྱོགས་སུ་མྱི་ཁ་མ་གཏོང༌།།

༢༠༠༧． ༡༢ ．༡༣དགོང་མོ་རང་ཤག་ཏུ་སྦྱར།

རྩོམ་ཁུངས། ངེད་དྲ་བ།