རེབ་ཀོང་གསེར་མོ་ལྗོངས།
རྡོ་དང་གཡའ་མའི་སྟེང་དུ་ཉལ་བའི་
སངས་རྒྱས་དང་སྟོང་འཁོར་
ཤིང་དང་གསོམ་པའི་སྟེང་དུ་ཟུག་པའི་
མཁས་དབང་དང་ལོ་ཙཱ་བ་རིམ་བྱོན་
རེབ་ཀོང་གསེར་མོ་ལྗོངས
མགར་རྩེའི་ཞོ་འོ་དང་
རྩེ་ཁོག་གི་སྐམས་ཤ་བྲིན་པའི་
ཟ་ཁང་དང་ཆང་ཁང་ཆུང་ཆུང་དང་
དེ་འཚོང་བར་བཞེངས་འདྲའི་
རེ་སྐོང་བ་ཕོ་མོའི་ཁ་འཇམ་ཚིག་ཡག་
དགེ་འདུན་ཆོས་འཕེལ་གྱི་སྙན་ཚིག་བཞིན་
སུ་ལ་བཟློགས་ཐབས་མཆིས་
སྲང་ལམ་དང་བཞི་མདོ་གང་མང་དུ་བརྩངས་པའི་
ས་སྐུ་དང་རྡོ་སྐུ་དག་གི་
དད་ལྡན་ཉོ་བདག་ཅིག་ལ་ཅེར་ཅེར་བའི་སྤྱན་ཟུང་
ཐང་ཆད་པའི་ཉམས་ཀྱིས་དལ་མོར་བཙུམས་མོད་
བདག་པོས་ད་རུང་དེའི་སྟེང་དུ་
ཨུ་ཚུགས་དང་རིན་གོང་གང་མང་ཞིག་སྤུངས་ནས་
ནམ་ཞིག་བར་དུ་འདི་ལྟར་
དམག་མི་ཞིག་ལྟར་ལངས་སུ་འཇུག་འདོད་ཡོད་ཨང་
རེབ་ཀོང་གསེར་མོ་ལྗོངས
འདི་རུ་སྒོར་སུམ་ཅུ་ཅན་གྱི་སྨད་བཙོང་གི་བརྩེ་དུང་བཞིན་
ལྷ་སྐུ་ཅི་ཙམ་གྱི་བྱིན་རླབས་བཙོང་རྒྱུ་ཡོད་
༢༠༡༠ལོའི་ཟླ་༣ཚེས་༢༨ཉིན་རེ་སྐོང་གསེར་མོ་ལྗོངས་ནས།
རྩོམ་ཁུངས། ངེད་དྲ་བ།