དཔལ་དང་འབྱོར་པས་གླིང་ལྔ་འགུག་ཅེས་དུང་གི་སྒྲ་དབྱངས་རྒྱུན་མི་ཆད།།

མཐོ་དང་དམའ་ཡི་མི་ལུས་ཀུན་ལ་སྙོམས་པོར་སྤྱོད་ཅེས་འུར་གྱིས་འདོན།།

བདེན་དང་རྫུན་པའི་ཁ་ཚོན་གཅོད་པར་ཁྲིམས་ཀྱི་ར་བ་མི་དགོས་ཀྱང༌།།

འུར་འུར་ལྡང་བའི་སྐད་སྒྲ་འདི་ཡིས་ཉམ་ཆུང་མི་ཡི་སྙིང་རྩ་གཅོད།།

ཐལ་རྡུལ་རླབས་ཀྱི་ཟེགས་མ་འདི་འོག་རང་རིགས་སྤུན་ཟླ་གྲངས་མེད་སོང༌།།

ཁང་བརྩེགས་ཞིག་རོའི་བར་དང་གསེང་ནས་ངུ་ངག་སྐྱེན་པོ་སྒྲོག་ཐེངས་རེར།།

དུས་ཀྱི་འགྱུར་བག་སྣང་མུན་ཇི་བཞིན་གཡས་ནས་ནུབ་ཀྱང་གཡོན་དུ་འཆར།།

མི་ཡི་སྐྱིད་སྡུག་དུས་ཀྱི་འགྲོས་བཞིན་རྟག་བརྟན་ཐེར་ཟུག་གང་ན་ཡོད།།

ཤུལ་དུ་ལུས་པའི་སྤུན་ཟླ་རྣམས་ཀྱང་སྐྱོ་གནས་འདི་ལས་མྱུར་གྲོལ་ཆེད།།

ཁྲག་དང་མིག་ཆུ་ལྷན་དུ་བཞུར་གྱིན་ལྷ་དང་བླ་མར་གསོལ་འདེབས་ཀྱིན།།

མེ་དང་དུད་པ་དགུང་དུ་འཕྱུར་གྱིན་ཆོས་ལུགས་ཆོ་གའི་གདུང་དབྱངས་ཁྲོད།།

འདི་དང་ཕྱི་མའི་ལམ་ཞིག་ཡོད་ན་དག་པའི་ཞིང་ཞེས་གནས་མཆོག་ན།།

རྒྱུ་འབྲས་རློམ་པའི་སེམས་པ་འདི་ཀོ་སྐད་ཅིག་ཉིད་དུ་འདྲེན་པར་ཤོག།

༢༠༡༠ ༤ ༢༣