དམར་པོ་སྙིང་གི་སྲོག་རྩ་བཅད་ནས་གྱེས་བྲལ་སྐྱོ་བ་ཁྲག་གིས་བྲིས།།

རེ་སྒུག་སྟོང་གི་ཉིན་མཚན་བར་ནས་བརྩེ་བའི་འོ་ཆུ་ཁྲག་ལ་འགྱུར།།

ཁྱོད་ལ་བཏབ་པའི་སྨོན་ལམ་རིང་མོར་བྱིན་རླབས་གདོན་གྱི་ཚན་ཁ་ཞུག།

འགྱོད་གདུང་སྡུག་གི་ཚོར་བ་ཟབ་མོ་ཤ་དང་རུས་པའི་གཏིང་ནས་འཕྱིར།།

ལོ་གསུམ་འགྲོགས་པ་མདང་གི་རྨི་ལམ་ནམ་མཁའི་འཇའ་ལྟར་གང་དུ་ཡལ།།

ཕྱིར་དྲན་སེམས་ན་ཡོད་ཡོད་འདྲ་བའི་ཁྱོད་ཀྱི་ཞལ་རས་སེམས་ལ་འཁོར།།

སྐྱོ་བའི་མིག་ཆུ་མཁུར་ལས་ལྷུང་དུས་གསོན་ལ་རེ་བའི་དམ་བཅའ་ལྷོད།།

ཉམས་ཆུང་དབུགས་ཀྱི་སྐྱོར་ཡ་འདིས་ཀྱང་མི་རྟག་རྒྱུ་མའི་སྐྱོ་གར་འཁྲབས།།

འཁྲེངས་ཞེན་སྡུག་གི་ཁྲིམས་ཁ་འདི་ནས་རེ་བ་ནག་པོ་ས་ལ་ཟགས།།

སྟོང་སྣང་སེམས་ཀྱི་དྲན་ཕྱོགས་རེ་ན་ཁྱོད་ལ་སྒུག་པའི་ལོ་ཟླ་དགེས།།

ཉམས་ཆུང་སེམས་པའི་ཕྱི་ནང་བར་ན་རེ་བའི་མིག་ཟུང་ཁྱོད་ལ་ཤོར།།

སྐྱིད་སྡུག་འདྲེས་མའི་ལམ་བུ་འདི་ནས་ཁྱོད་ལ་འགྲོགས་པའི་ལོ་ཟླ་ཐུང༌།།

༢༠༡༠             ༣            ༡༤

རྩོམ་ཁུངས། ངེད་དྲ་བ།