སྙན་ངག་པ།
སྐུ་ཞབས་འབྲོང་ལ་ཕུལ་བ།
སྙན་ངག་པ། སྒྱུ་རྩལ་གྱི་ཞིང་ཁམས་ནས་ལམ་ལ་ཆས།
སྙན་ངག་པ། རི་རབ་ཀྱི་མུན་ཁྲོད་ནས་ཐོལ་གྱིས་ལངས།
ཁྱོད། མཐོ་ལྗོངས་ཀྱི་རྔོན་པ་ཁེར་རྐྱང༌།
མཚན་ངོགས་ནས་འགྱེལ་ཅིང་རི་ཟོམ་ནས་ཤུགས་ཀྱིས་འགྲེང༌།
སེམས་པ་ཡོད་ཚད་ན་ཟུག་གིས་ཟས།
རེ་བ་ཐམས་ཅད་མི་ཁ་ཡིས་བལྡད།
སྙན་ངག་པ། གངས་སུལ་ནས་བཞུར་བའི་ཁྲག་གི་སྙན་ངག་རེ་རེ།
སྙན་ངག་པ། རླུང་ངོགས་ནས་གྱེར་བའི་སེམས་ཀྱི་རྐང་གླིང་རེ་རེ།
ས་ཆེན་པོའི་ཀློང་ན། ཆུ་གཙང་བོའི་འགྲམ་ན།
འཆི་མེད་རྒས་མེད་ཀྱི་འཆར་ཡན་དམར་པོ།
དུངས་པའི་གླུ་རུ་བླངས། སྐྱོ་བའི་མཆི་མར་བརྫིས།
སྙན་ངག་པ། སེམས་དོན་ཡོད་དགུ་སྙན་ངག་ལ་བཅོལ་བས།
སྙན་ངག་གིས་ད་དུང་ཁྱེད་ལ་ཕྱི་ཐག་འབྲི།
སྙན་ངག་པ། འཇིག་རྟེན་གྱི་རྒྱལ་བོ་ཡིན་ལ།
དུས་རབས་ཀྱི་ཉེས་ཅན་ཡང་ཡིན།
སྙན་ངག་པ། སེམས་པ་ཡོད་ཚད།
རེ་བ་ཐམས་ཅད།
དྲང་མོར་གཅིག་ཏུ་བསྒོམ་ནས།
མུ་མཐུད་དུ་སྙན་ངག་ཕྲིས་དང༌།
མི་ཁའི་འོག་ནས། ཁྱོད་རང་དཔའ་མི་ཞུམ་པ་ཤ་སྟག་ཡིན།
རྩོམ་ཁུངས། ངེད་དྲ་བ།