སྨིན་ཐང་བུ་མོ་གླེང་བས་ཁག་ལྔ་བ།

སྲིད་པའི་ཕུན་ཚོགས་རྫ་ཁའི་ཟིལ་དང་མཚུངས།།

འདུས་པའི་གཉེན་གྲོགས་དབྱར་གྱི་མཛེས་དང་འདྲ།།

བསམ་བཞིན་སྐྱོ་བའི་སྨུག་སྤྲིན་ལང་ལོང་འཐིབ།།

ཡིན་ཡང་ཁྱེད་རང་དྲན་པའི་གདུང་བ་ཟབ།།

བུ་མོ་ཁྱེད་དང་བུ་ཆུང་བདག་གི་བར།།

རི་ཆུ་སྟོང་གི་བར་ཐག་བཅད་འདུག་མོད།།

ཡིན་ཡང་བརྩེ་བ་དམར་པོའི་དྲོད་ཁོལ་འདི།།

འཇིག་རྟེན་འདི་ན་ཆོད་པའི་ཆོས་ཤིག་མེད།།

མི་ཚེའི་བྱང་ཐང་རིང་མོའི་ཁུག་པ་ན།།

སྐྱོ་སྡུག་ཡིད་ཀྱི་ན་བུན་ལང་ལོང་འཁྲིགས།།

ཡིན་ཡང་བདག་གི་སེམས་ཀྱི་དམར་ཆུང་མ།།

དེ་ལ་སྐྱོ་བ་མ་སྐྱེ་འཁོར་བའི་གཤིས།།

ལས་དབང་གནམ་གྱི་རྒྱལ་མོས་བཀོད་སྒྲིག་གིས།།

ཁྱེད་དང་ང་གཉིས་སྐྱེ་ས་མི་གཅིག་ཀྱང༌།།

དུངས་སེམས་ལྷ་དར་དཀར་པོ་ཡུག་གཅིག་གིས།།

ང་དང་ཁྱེད་ཀྱི་སེམས་པ་གཅིག་ཏུ་བསྲེས།།

བརྡ་འཕྲིན་སྐུད་པའི་བར་ནས་ཉིན་རེ་རེར།།

སྙིང་གཏམ་སྙིང་ལ་ཟུག་པའི་སྙིང་གི་གྲོགས།།

དུངས་སེམས་འོ་མ་མཚོན་པའི་གསང་གཏམ་དེ།།

ཁྱོད་ལ་བཤད་པའི་དགའ་བ་མཚོན་ནུས་མིན།།

རྩོམ་ཁུངས། ངེད་དྲ་བ།