ཐབ་ཚང་གི་ཕྱི་སྒོ་ཕྱེ་ཐེངས་རེ་རེར།
ཁ་གཏད་ཀྱི་ཁང་པ་དེར་བསྡད་ཡོད་པའི་བགྲེས་མོ་ཁེར་འདུག་དེར་གྲགས་འགུལ་ཅི་ཡང་མེད་པ་རྒྱུན་ལྡན་ཡིན།
འདི་ལོའི་སྟོན་མཇུག་ནས་བཟུང་།
ངས་མོ་རང་ཚར་གཅིག་ཀྱང་མཐོང་མ་སོང་།
མོ་གྲོངས་ཟིན་པ་ཡིན་ནམ།
ཡང་ན་རང་གི་བུ་ཕྲུག་དང་ཚ་བོ་ཚ་མོ་གང་རུང་ཞིག་གི་ཁྱིམ་དུ་ནང་མི་ལྷན་འཛོམ་གྱི་ཆེད་དུ་སོང་བ་ཡིན།
ཡང་ན། སྨན་ཁང་ཞིག་ཏུ་ཆེས་མཐའ་མཇུག་གི་མཁའ་དབུགས་དེ་རྔུབ་ཏུ་སོང་བ་ཡིན།
ངས་མི་ཤེས། ངས་ངོ་མ་མི་ཤེས།

ཁྱིམ་མཚེས་གཉིས་པ་སྟེ།
བཟའ་ཟླ་གཉིས་དང་བྱིས་པ་གཉིས།
ད་དུང་བྱིས་གཉོར་མ་དབྱིན་སྐད་འཁྱར་འཁྱོར་བཤད་མཁན་དེ།
བྱིས་པ་དེ་གཉིས་ངའི་མིག་མདུན་ནས་སྐྱེས་ཤིང་ཆེ་རུ་འཚར།
བྱིས་པ་དེ་གཉིས་ངའི་མིག་མདུན་ནས་ཞོགས་པ་སྔ་བོར་སློབ་གྲྭར་འགྲོ་བཞིན་ཡོད།
ཁྱིམ་ཚང་ཕྱུག་པོ་ཞིག་ཡིན་མིན་མི་ཤེས་ཀྱང་།
ལྗོངས་རྒྱུར་འགྲོ་ཐེངས་ཅུང་མང་བས།
བཟའ་ཟླ་གཉིས་ཀར་ལས་ཀ་ཡག་པོ་རེ་ཡོད་པ་ཡིན་ནམ།
ཡང་ན།
ཕ་མ་གང་ཞིག་གི་ཤུལ་བཞག་རྒྱུ་ནོར་འབོར་ཆེན་ཞིག་རག་ཡོད་པ་འདྲ།

ཁྱིམ་མཚེས་གསུམ་པ་སྟེ།
ལས་འཁྱུར་ངལ་གསོ་བྱས་ཟིན་པའི་བཟའ་ཟླ་གཉིས།
ཁྱོ་བོ་དེ་ཞོགས་པ་སྔ་བོར་ཡར་ལངས་ནས་མེ་འབུད་ཇ་སྐོལ་བྱེད་ཅིང་།
རྒན་མོ་དེ་ཉི་མ་སུམ་བརྒྱ་དྲུག་ཅུར་ཕྱི་ལོགས་སུ་མི་འགྲོ་བར་ནང་ལས་གང་ཞིག་ལ་མགོ་འཁོར་ནས་སྡོད།
ཁོ་ཚང་གི་མེ་ཏོག་ལྡུམ་ར་ཆེ་རྒྱུ་མེད་པ་དེའི་ནང་དུ།
ཁྱོ་བོ་དེས་བདག་སྐྱོང་ལེགས་པོ་བྱས་པའི་མེ་ཏོག་སྣ་ཚོགས།
དཔྱིད་ཀ་དང་དབྱར་ཁར་དྲི་ཞིམ་འཐུལ་བཞིན་མཛེས་སྡུག་གིས་བཞད་ཡོང་།
ཁྱོ་བོ་དེས་ད་དུང་ལོ་ལོན་ཁེར་འདུག་མ་འདིའི་ཁང་པར་གཙང་སྦྲ་དང་།
ཁང་པའི་གཡས་གཡོན་གྱི་རྩྭ་ངན་བཀོག་ཅིང་ཤིང་ཕྲན་གཏུབ་པ་ཡང་རྒྱུན་ལྡན་ཞིག་ཡིན།

ཁྱིམ་མཚེས་བཞི་པ་ཚང་སྟེ།
གདོང་མདོག་ཉེས་ཤིང་གཟུགས་པོ་རིང་བའི་མི་རྒན་སྐོར་ལོག་ཅིག
བེད་སྤྱོད་མེད་པའི་རླངས་འཁོར་རྙིང་ཧྲུལ་དྲུག་བདུན་ཞིག
ཕྱི་རོལ་གྱི་ལམ་ཁ་དང་སྒོ་རའི་ནང་དུ་ཆེས་མི་སྡུག་པའི་ཚུལ་དུ་འཇོག
ཁང་པ་སྙིང་རྗེ་བོ་དེའི་ཕྱི་རོལ་གྱི་རྩྭ་ལྡུམ་ཚང་མ་བདག་མེད་དུ་འཇོག་པས།
སྐབས་རེར་ཁྱིམ་མཚེས་ཇུས་གཏོགས་ཚ་བོ་ཚོས་ཉེན་རྟོག་པ་སྐད་བཏང་ནས་གྱོད་གཏུགས་ཀྱང་བྱེད།

རིག་གཞུང་དང་ཁོར་ཡུག་མི་འདྲ་བའི་ནང་འཚར་ལོངས་བྱུང་བའི་རྐྱེན་གྱིས།
ང་དང་ངའི་ཁྱིམ་མཚེས་ཚོར་མི་འདྲ་ས་མང་ཞིང་།
ལོ་ངོ་བདུན་གྱི་རིང་།
ཕན་ཚུན་བར་སྐད་ཆ་ཚིག་གཅིག་ཀྱང་བཤད་མྱོང་མེད།
ཡིན་ན་ཡང་འདྲ་ས་གཅིག་རང་ཡོད་པ་ནི།
ལོ་རེ་རེ་བཞིན།
ཉི་འོད་ཀྱི་ཡོལ་བ་ལྟ་བུའི་སྤྲིན་པ་མཐུག་པོ་ཞིག་གི་འོག་ནས།
དགུན་ཟླ་རིང་མོ་ཞིག་ཆར་སྨུག་གི་ཁྲོད་དུ་སྐྱེལ་དགོས་པ་དེ་འོ།

རྩོམ་ཁུངས། ངེད་དྲ་བ།