འདུ་འཛི་ལང་ལིང་གི་གཞིས་ཀ་བསྐྱུར་ནས།།

རྡོག་པའི་འཁོར་ལོ་དེ་རི་ལ་བསྒྱུར་ནས།།

སྣལ་མ་སེར་པོ་ཡི་བྱིན་རླབས་འོག་ནས     །།

འདུན་པའི་སྣང་ཤས་དེ་ཆོས་ལ་ཕྱོགས་ཡོད།།

གནག་སྣུམ་གཙུག་སྐྱེས་ཀྱི་ཟར་བུ་བྲེགས་ཤིང་།།

བརྩེ་བ་དུངས་དུངས་ཀྱི་སྒོ་མོ་གཏན་ཞིང་།།

ལྟོ་སྐྱ་གོས་ཧྲུལ་གྱི་འཚོ་བའི་གསེབ་ནས།།

འཚེ་མེད་ཞི་བ་ཡི་བཙན་ས་བཟུང་ཡོད།།

ལྕང་དཀར་སྡོང་པོ་ཡི་བསིལ་གྲིབ་བརྟེན་ཞིང་།།

རྫ་ཆབ་དྭངས་མ་ཡི་བཅུད་ལ་རོལ་བའི།།

རང་བྱུང་ཕུག་པ་ཡི་སྤྲང་པོ་ཁེར་འདུག།

ཆོག་ཤེས་ཚོང་ཟོང་གིས་ཕྱུག་པོར་གྱུར་ཡོད།།

ཟིལ་བ་ཁྲོམ་ཁྲོམ་གྱིས་རྩི་ཤིང་གཡོག་དུས།།

ལྷགས་རླུང་འུར་འུར་གྱིས་ས་གཞི་གཙེས་དུས།།

ཕྱི་དབེན་ནང་དབེན་གྱི་སྒོམ་ཤག་ནང་དུ།།

དགའ་བ་བརྒྱ་ལྡན་གྱི་དྲོད་རླབས་འཕྱུར་ཡོད།།

རིག་འཛིན་ཞིག་པོ་ཡི་ཚོགས་གྲྭལ་འགྲིམ་ཞིང་།།

གཞི་མེད་འཛིན་བྲལ་གྱི་སྒོམ་གཞས་གྱེར་ནས།།

བདེ་ནས་བདེ་བ་ཡི་ཐེམ་སྐས་སྙེག་པའི།།

མགོ་རྗེན་ལུས་རྗེན་གྱི་བྱ་བྲལ་སྐྱིད་དོ།།

འཁྲིས་ན་ལན་ཆགས་ཀྱི་བུ་ཕྲུག་མ་འཁོར།།

ཡིད་ལ་འདོད་གདུང་གི་ན་ཟུག་མ་སྐྱེས།།

ཏིང་འཛིན་མལ་ས་རུ་ལྷོད་དེ་བཞུགས་པའི།།

དབེན་པའི་རི་སུལ་གྱི་ཆོས་པ་སྐྱིད་དོ།།

རང་བྱུང་ཉམས་དགའ་ཡི་བྲག་སྐྱིབས་དབུས་ནས།།

གཡོ་མེད་ཏིང་འཛིན་གྱི་བདུད་རྩི་འཐུང་ན།།

ཀྱག་ཀྱོག་ལམ་བུ་རུ་འགྲིམས་དགོས་མི་འདུག།

འབྲལ་དཀའི་གདུང་བ་ཡང་མྱོང་དགོས་མི་འདུག།

འདུ་འབྲལ་མིག་ཆུ་ཡི་ཕྲེང་ཐག་ཆད་དུས།།

འཁོར་བའི་སྣང་བརྙན་ལ་སྐྱོ་ཉམས་མངོན་དུས།།

གནས་ལུགས་ཟབ་མོ་ཡིས་སེམས་པ་བཟི་བའི།།

གྲྭ་རྐྱང་འཚོ་བ་འདིས་ཡིད་དབང་བཀུག་འགྲོ།

སྒྱུ་མའི་འཇིག་རྟེན་ན་ལས་ཀྱིས་སྤྱུགས་པའི།།

མི་སྡུག་འཁོར་བ་ཡི་མགྲོན་པོ་ཆུང་ཆུང་།།

རྟག་འཛིན་འཆིང་ཐག་གི་མདུད་པ་ཁྲོལ་དང་།།

རྣམ་དཀར་སྙིང་པོ་ལ་བརྩོན་དུ་ཐལ་འགྲོ།།

རྩོམ་ཁུངས། ངེད་དྲ་བ།