རྩམ་པ་ཟ་དུས།

ཆུ་ཀློང་གྲོག་རོང་དུ་བཤོར་ཞིང༌།

ཁ་བའི་སྐོར་བྲོ་རེ་རེས།

དྭངས་གཙང་གི་རི་ཁྱིམ་བརྩེགས་པའི།

གདོད་མའི་ཕྲེང་ཐག་ལ་བརྒྱུས་པའི་སྙན་ངག་དེ་དྲན་བྱུང༌།

རྩམ་པ་ཟ་དུས།

འཁྲེང་སྡུག་གི་རྣམ་རྟོག་མེད་ཅིང༌།

ནགས་ཚལ་དང་རི་ཕུག་ཁྲོད་ནས།

འཇིག་རྟེན་གྲང་ཤོས་ཤིག་གི་མགུར་གླུ་བསྐྱངས་ཏེ།

ཚེ་སྲོག་གི་རྐང་རྡུང་གངས་རི་ལ་བཙུགས་པའི་སྙན་ངག་དེ་དྲན་བྱུང༌།

རྩམ་པ་ཟ་དུས།

གངས་རི་ལ་ལྡིང་བའི་སྤྲིན་གསེབ་ཁྲོད་དུ།

ལོ་རྒྱུས་ཀྱི་མཆེ་བ་བསྒྲེངས་པའི་གཡུ་འབྲུག་རེ་རེས།

ནགས་ཚལ་དང་རི་ཕུག་གི་ཁ་ལོ་བསྒྱུར་བས།

འཛམ་བུའི་ཅོང་དྲིལ་བརྡུངས་བའི་སྙན་ངག་དེ་དྲན་བྱུང༌།

རྩམ་པ་ཟ་དུས།

མི་ལོ་ཁྲི་ཁྲག་གིས་དེད་པའི་རྣམ་ཤེས།

ཞོགས་པ་རེ་རེའི་དེ་ཕོའི་སྐད་སྒྲ་ལ་འདྲེན་འོང་ཞིང༌།

མཚན་མོ་རེ་རེའི་ཁྱི་མོའི་ཟུག་སྐད་ལ་བསྐྱོན་འོང་དུས།

ངོ་གདོང་གཉེར་མ་ཅན་གྱི་སྙན་ངག་དེ་དྲན་བྱུང༌།

རྩོམ་ཁུངས། ངེད་དྲ་བ།