ཡུལ་གངས་ཅན་ཤེལ་གྱི་ཞིང་ཁམས། །ལྷ་བླ་མའི་ལུང་གིས་ཟིན་པའི།།
རྗེ་སྲོང་བཙན་རུས་རྒྱུད་དར་ས། །གནས་སྐྱིད་པོ་མདོ་སྨད་གཙང་པ།།
ཡུལ་ངོ་མཚར་སྨོན་ལམ་འདབ་འབྲེལ། །དཔལ་བདེ་མཆོག་ཧེ་རུ་ཀ་ཡི།།
གནས་བྱིན་རླབས་བདུད་རྩིའི་ཆུ་གཟར། །མ་འགྲོ་བའི་སྡིག་གྲིབ་རང་དག།
བྲག་དཀར་པོ་དབྱིངས་ལ་འགྱིང་བ། །དཔལ་མི་འགྱུར་ཕོ་བྲང་ལྷུན་གྲུབ།།
གནས་སྦྱིན་བདག་སྨོན་ལམ་དཀར་པོས། །ལས་དགེ་བའི་འཕྲིན་ལས་མཛད་ས།།
ཕྱིའི་ཁོར་ཡུག་རང་བྱུང་དྭངས་པས། །སྤྲིན་དཀར་པོ་ཞོ་གསར་རང་ཆགས།།
ཆར་བསིལ་མའི་དྭངས་གཙང་རྒྱུན་ལས། །ཆུ་ཡན་ལག་བརྒྱད་ལྡན་རང་བབས།།
སྤང་རི་ཀླུང་མཚོ་དང་ཆུ་མིག །གཡུ་མེ་ལོང་ཕྲེང་ཐག་འཐོར་འདྲ།།
མཛེས་མཚོ་བྱིངས་ངང་ངུར་རྒྱུ་བ། །སྤྲིན་དཀར་པོའི་འདབ་མར་རང་འཁྲུལ།།
མཐར་མེ་ཏོག་དཀར་དམར་སེར་གསུམ། །འཇའ་གུར་ཁང་མེ་ཏོག་ཕྲེང་བ།།
མ་མཛེས་ལྡན་གཡུ་ཡི་ལྷ་མོའི། །ལུས་དོ་ཤལ་རྒྱན་སྤུད་རང་འཁྲུལ།།
ནགས་རྒྱ་རྫོང་གཡུ་ལོའི་གསེང་ནས། །བྱ་ཁུ་བྱུག་གསུང་སྙན་ལྷུང་ལྷུང་།།
གནས་འཆི་མེད་དྲི་ཟའི་ཡུལ་གྱི། །མ་སྒྱུ་འཕྲུལ་དབྱངས་སྙན་རང་འཁྲུལ།།
ལས་འཚེ་མེད་འཚོ་བར་རོལ་བའི། །དེང་ཆེས་དཀོན་དོམ་ཁྲ་གནས་སའི།།
ཡུལ་ཁྱད་འཕགས་རང་གཤིས་དེ་ལ། །བློ་གཟུར་གནས་བསྟོད་བསྔགས་རང་འཐོར།།
ས་གཤིན་ས་ཆུ་མ་ཞིང་ལ། །འབྲུ་ལོ་ཏོག་འབྲས་བུ་སྣ་ཚོགས།།
བཅུད་སྨིན་ལེགས་བྱུར་བུ་གཏམས་པས། །ལས་ངལ་རྩོལ་སེམས་ཤུགས་རང་འཕར།།
རྒན་ཡ་རབས་ངང་རྒྱུད་ཕྱུག་པས། །གཞོན་རྩི་བཀུར་མེ་ཏོག་འཐོར་ལ།།
བྱིས་མིག་ལྟོས་ཡར་ལ་ཕྱོགས་པས། །ཡུལ་རྨད་བྱུང་དགེ་མཚན་རང་ཁྱབ།
ཡུལ་མདོ་སྨད་ཐེ་བོའི་སྨད་བརྒྱུད། །གནས་སྐྱིད་པོ་གཙང་པ་ཕྱོགས་ལ།།
ཡུལ་བསྐལ་བའི་ས་མཐའ་འདི་ནས། །སེམས་འཕྲེང་བའི་འདབ་མ་འཐོར་འགྲོ།།

རྩོམ་ཁུངས། ངེད་དྲ་བ།