ན་བུན་མཆེད་པའི་རི་སྒང་དེའི་ལོགས་ན
མེ་ཏོག་གད་སའི་སྤང་དཀར་དེའི་ཀླད་ན དུས་དེ་རིང
དར་ལྕོག་གི་རལ་བ་བསིག་པའི་གཡུ་སྦྲ་སྨུག་པོ་དང
ཐུལ་དཀར་འབྲི་མོ འདོ་རིགས་རྟ་ཕོ  
ད་དུང མང་པོ་མང་པོ་ཞིག་སྔར་བཞིན་རྩྭ་ཐང་དུ་ཡོད་ན  
ངས་མིག་ཆུ་འདི་གཏོར་དོན་མེད 
ངས་སྐྱོ་ཡུས་འདི་གྱེར་དོན་མེད
 
རྫ་མཐོན་པོའི་ཟོམ་ནས ཆུ་གཙང་བོའི་ངོགས་ནས
སྨན་བུ་མོའི་ལ་གཞས་འཐོར་དུས  སྟག་ཤར་རའི་ཀི་བསོ་འཕུར་དུས
ངའི་རྩྭ་ཐང་ལ་གཞོན་ཤ་ཡོད་ཀྱང
དུས་དེང་སང ཡོད་ཚད་རྨི་ལམ་བཞིན་ཡལ་ཟིན་པས
ང་སྐྱོ་བ་ཞིག་གི་ལྟེབས་ཁུག་ཏུ་མི་ལྷུང་ཐུ་མེད་རེད
 
ལོ་ཟླ་ཆུ་མོ་བཞིན་བཞུར་ཤུལ་དུ
རྒས་ཀྱིན་པའི་གངས་རི་དང་རྩྭ་ཐང
བོར་ཟིན་པའི་སྦྲ་གུར་དང་ལུག་ཁྱུ
འགྱུར་གྱིན་པའི་ཕུ་ནུ་དང་ལྕམ་སྲིང་དག
ངའི་མིག་གིས་མཐོང་ཐེངས་རེ་དང
རྣ་བས་གོ་ཐེངས་རེར ཡིད་ཀྱིས་མྱོང་ཐེངས་རེར
བཟོད་དཀའ་བའི་ན་ཟུག་རྡོག་པོ་ཞིག
ཤ་མཆིན་པའི་གསེང་དུ་འཁྱག་ཤུར་ཤུར་གྱིས་བརྡོལ་ཡོང
སེམས་བསམ་པའི་མཐིལ་དུ་ལྗིད་ཏིག་ཏིག་གིས་ལྷུང་ཡོང
 
ངའི་སེམས་པ་འདི་ཕ་ས་ལ་དུངས་དྲགས་པས
ངའི་གློ་བ་འདི་ཕ་གཞིས་ལ་ཉེ་ཆེ་བས
དུས་དེ་རིང   མེས་པོའི་གཅེས་ནོར་དག་བོར་ཟིན་པའི་ཕ་ཤུལ་སྐྱ་བོ་འདི་ནས
སྟོང་སང་སང་གི་སེམས་པ་འདི་སེམས་པས་སྐྱོར་ཏེ
སྨོན་འདུན་གཙང་མ་ཞིག་གི་ཆེད་དུ
ངས་གསོལ་འདེབས་ཁྲི་ཕྲག་གི་རླུང་རྟ་ཤུགས་ཀྱིས་སྤུར་ན་འདོད
                                       ༢༠༡༠ ༦ ༡༣ ལྷ་ས་ནས།

རྩོམ་ཁུངས། ངེད་དྲ་བ།