ཉི་ནུབ་ཀྱི་འཆར་ཀ
རྒོངས་ཀའི་ཉི་ནུབ་ཀྱི་འཆར་ཀ།
མཚམས་སྤྲིན་སིལ་ཚོམ་ལ་གྲོལ་བས།།
དམར་ཤའི་རང་མདངས་ཀྱིས་བཏབ་པའི།།
བྱད་བཞིན་ཀུ་མུད་དེ་དྲན་བྱུང༌།།
ཕུ་ཡི་སྤང་རྒྱན་གྱི་མེ་ཏཽག།
འཛུམ་རླབས་ཆིལ་ཆིལ་དུ་བཞད་རུང༌།།
སེམས་སོང་སྐལ་བཟང་གི་མེ་ཏོག།
ནམ་ཟླའི་ཟད་སར་ཡང་མི་སྙོབ།།
རེག་འཇམ་དཔྱིད་རླུང་དང་ལྷན་དུ།།
ཞི་བསིལ་སྦྲང་ཆར་ཞིག་ཕབ་ཀྱང༌།།
ལྗང་བུའི་སྔོ་སིང་གིས་དབེན་པའི།།
མྱ་ངམ་བྱེ་ཐང་དེ་སྐྱོ་བ།།
བསུང་ཞིམ་མེ་ཏོག་གི་དོ་རར།།
ལྗང་ཁྲའི་ཕྱེ་ལེབ་ཀྱིས་ལྡིང་ཡང༌།།
གཡུ་སྦྲང་གཤོག་གླུ་ཞིག་མེད་པའི།།
རྫིང་བུའི་པདྨ་ང་སྐྱོ་བ།།
དུང་ཟླ་ཁེར་འགྲོས་ཀྱི་ཀློང་ནས།།
སྐར་མདའི་མེ་སྟག་དེ་འཚུབ་སྐབས།།
སོམ་ཉིའི་སྒྲོག་ཐག་གིས་བཅིངས་པའི།།
སེམས་པའི་རྟ་རྒོད་དེ་ཤོར་སོང༌།།
ཤམ་ཆུའི་བབ་རྒྱུན་གྱི་འགྲམ་པར།།
སྟོང་འདང་ནམ་མཁའ་ལ་ཅེར་ཚེ།།
རླབས་ཀྱི་ཟེགས་མ་ཡི་རྩེ་ནས།།
ཆུ་སྐྱར་གད་མོ་རང་ཤོར་སོང༌།།
གཡུ་ལོའི་ནེའུ་སིང་གི་ཚལ་ན།།
འབུ་གོག་མཉམ་འདུག་ལ་རོལ་དུས།།
མཛའ་བརྩེའི་ཞབས་བཀོད་ཀྱིས་འཚེངས་པའི།།
སྤྱི་གླིང་ཁེར་སྣང་གིས་གཟིར་འདུག།
བདུད་རྩི་ཨ་རག་གི་མཆོད་ཀ།
ལྷ་ཡི་རྫིང་རླབས་བཞིན་སྐྱོམ་ཡང༌།།
སྙིང་བསིལ་འདོད་རྩ་ལ་སྨན་པ།།
འོ་ཆང་མངར་མོ་དེ་ཁོ་ན།།
དྲི་མེད་ཨ་སྔོན་གྱི་དབྱིངས་སུ།།
ཆུ་ཁུར་འདབ་ཚར་དེ་གཡོ་སྐབས།།
སྲབ་དཀར་སྨད་གཡོག་གི་འགབ་ནས།།
འཇམ་ཤའི་མཇལ་ཁ་དེ་དྲན་བྱུང༌།།
ཟབ་གསང་དམ་ཆོས་ཀྱི་གསུང་དབྱངས།།
མཚན་ལྡན་བླ་མ་དེས་སྒྲོག་རུང༌།།
རབ་སྙན་སྙིང་གཏམ་གྱི་རྒྱུད་སྐུད།།
དཀྲོལ་བའི་ལྷ་མོ་དེ་སུ་ཡིན།།
ལི་ཁྲིའི་གུར་ཁྱིམ་གྱི་ཀློང་ནས།།
རབ་སྨིན་ཤིང་ཏོག་དེ་མངོན་སྐབས།།
སྦྲང་རྩིའི་བྲོ་བཅུད་ལས་ལྷག་པའི།།
བྱུ་རུའི་མཆུ་འདབ་དེ་དྲན་བྱུང༌།།
རྒྱ་ཚོགས་སྟོང་འདུས་ཀྱི་ཁྲོམ་རར།།
མཛེས་མའི་འཛུམ་སྒེག་དེ་བསྐྱེད་རུང༌།།
བཅུ་དྲུག་ན་ཚོད་ཀྱིས་སྤུད་པའི།།
ལང་ཚོའི་གུར་ཀུམ་དེ་ཁྱེད་རང༌།།
མཚོ་གླིང་འདབ་ཆགས་ཀྱི་བསྟི་སར།།
སྐྱུར་སྐྱུར་གདངས་སྙན་དེ་འཁྲོལ་སྐབས།།
བརྩེ་བ་ལྷད་མེད་ཀྱི་མགུར་དབྱངས།།
གྱེར་བའི་མཁའ་འགྲོ་ཁྱེད་བདེའམ།།
བསངས་མེད་སྙིང་ཆུང་གི་ལུ་གུའི།།
འབའ་འབའི་སྐྱོ་གཞས་གཅིག་བླངས་པར།།
གཏིང་ཟབ་བྱམས་དུངས་ཀྱིས་བཟི་བའི།།
རྫི་བོ་ལྷས་འདབས་སུ་འཁོར་དང༌།།
རྩོམ་ཁུངས། ངེད་དྲ་བ།