དེང་གི་ནི་སྤྱི་ཚོགས་སུ།།
བོད་པ་ཞེས་མིང་གསོན་ཞིག།
དོན་ལ་ནི་འཁུམས་འཁུམས་ཀྱིས།།
ང་རྒྱལ་ནི་སྤྱི་གཙུགས་ན།།
ཕྲ་དོག་གི་རྫི་ལངས་ཏེ།།
རང་སྐད་ཚོས་ཉོག་གཏམ་ཟ།།
བདེན་བདེན་གྱི་གྲུ་ཟུར་ནས།།
རང་ལུས་ནི་གཏོར་མ་བཞིན།།
སྟོང་སེམས་ཀྱི་རྒྱ་མཚོ་འཁྱིལ།།
ཕ་གཞིས་ནི་ཆུ་ལ་བསྐུར།།
མ་ཡིག་ལ་གཉེར་གཉེར་གྱིས།།
རྒྱུགས་ཁྱི་ཡི་ཟླ་བོ་བཙལ།།
རང་རིགས་ནི་གདོན་གདོན་ཞེས།།
ནང་དམེ་ནི་འབྲོག་ཐང་ན།།
ངུ་ངག་གིས་འཐབ་ར་གཡོ།།
མེད་མུག་ཚོའི་མར་སྒམ་སྟོང་།།
ང་ཕྱུག་ནི་ཁྱོད་སྟོང་གླུ།
རྩོད་གླེང་ནི་རི་ཁྱིམ་ན།།
མི་བུ་ཚོར་འུར་ལངས་ནས།།
སྤུན་འགའ་འདྲིལ་འདྲིལ་གདའ།།
ངོ་གཉིས་མ་ལྟོ་ལངས་ནས།།
བླ་འཚོང་ཚོས་གྲོང་ཁྱེར་ན།།
སྐད་ཡིག་ནི་ཕ་རོལ་ཅེས།།
གཞན་ཆོས་ནི་དགའ་དགའ་ཞེས།།
དྲི་ངན་གྱི་འཇིག་རྟེན་གཡོ།།
སྣ་ལ་ནི་ལག་པས་ཁོབས།།
 
སྨྲས་པ།
ན་ལུགས་ནི་བཤད་བཏང་ན།།
གཟེར་སོ་ལ་རེག་བཏང་ན།།
སེམས་པ་ནི་སྐྱིད་ལེ་འོངས།།
འདི་ལ་ནི་དོན་མེད་རུང་།།
ང་རང་ཚོའི་གནས་སྟངས་ལ།།
ཞིང་ལ་ནི་ཀླད་བལྟ་དང་།།
མོ་ལ་ནི་འོག་བལྟ་ཡིས།།
ཚིག་འཁྱོག་འགའ་ཤོར་ཤོར་ཐལ།།

རྩོམ་ཁུངས། ངེད་དྲ་བ།