གང་སྒྲུབ་ལས་སྐུལ་གྱི་དར་ཐག་དམར་པོ།།
སྣང་བ་བན་བུན་གྱི་སྨུག་རྒྱུའི་ཁྲོད་ནས།།
སེམས་གཏམ་རྡོག་རྡོག་གི་མར་ལོ་སྣུམ་པོ།།
བློས་གྲོགས་ཁྱེད་ཅག་གི་སྙན་ལ་སྒྲོན་འདོད།།

མི་བུའི་སྐྱིད་སྡུག་གི་བྲོ་གར་འཁྲབ་ས།།
མི་ཚེ་འགྲུལ་བཞུད་ཀྱི་རྐང་ལམ་ཀྱ་ཀྱུ།།
དྭངས་གསལ་དྲི་མེད་ཀྱི་མེ་ལོང་ནང་ནས།།
ཚེ་རབས་ལས་འཕྲོ་འདིའི་གསོལ་སྟོན་བགྱིས་ཤོག།

ལོ་ཟླའི་ཆུ་བོ་ལ་མཚམས་འཇོག་མེད་པར།།
དགའ་སྐྱོ་འབུམ་ལྡན་གྱི་ཐེམ་སྐས་བར་ནས།།
འཛིན་མེད་དྲི་བཞོན་གྱི་བྱེད་པོ་དེ་ཡིས།།
མཐའ་བྲལ་སྒྱུ་འཕྲུལ་གྱི་ཀློང་ལ་སྤྱུགས་སོང༌།།

གཡོ་མེད་བརྟན་བརླིང་གི་དམ་བཅའ་ཟབ་མོ།།
ཤ་ཁྲག་རུས་གསུམ་འདི་མ་ཐོར་བར་དུ།།
ཟོལ་མདོག་དགུ་སྦྲེལ་གྱི་སྣོན་མཚམས་བར་ནས།།
འགྱུར་མེད་སྙིང་སྟོབས་དེ་རྡོ་ལ་བརྐོས་ཡོད།།

མཁས་དབང་དགེ་ཆོས་ཀྱི་མི་ཚེ་རྣམ་ཐར།།
འདས་པའི་ལོ་རྒྱུས་ཀྱི་ཕྱིར་དྲན་ཐེངས་ཤིག།
མདུན་གྱི་བྱ་བཞག་འདིའི་བགོ་སྐལ་རེ་རེ།།
དཔྲལ་བ་ལེབ་མོ་འདིའི་ངོས་ན་གསལ་ལོ།།

ཐ་མག་རྐང་གཅིག་གི་ཚེ་སྲོག་དམར་པོ།།
ཝུ་ཆང་ཕོར་ཁ་ཡི་ཁྲོད་ནས་ཟད་ཀྱང༌།།
རྐྱལ་སྟོང་བུ་རུལ་ངའི་ཕུགས་བསམ་སྒོར་སྒོར།།
མ་ཡུམ་གངས་ལྗོངས་འདིའི་སྦུབས་སུ་འཁྲུངས་ཡོད།།

སློབ་ཆེན་སྒོ་ཐེམ་ལ་གོམ་ཁ་བསྒྱུར་དུས།།
འགྱུར་མེད་དམ་ཚིག་ཅིག་སྙིང་ལ་སྒོམ་ཡོད།།
ཨ་རག་དུ་ཆང་གི་རྒྱ་མཚོའི་འཇིངས་ནས།།
གཏན་གྱི་དམིགས་འབེན་འདིར་མགོ་ཡོམ་འཁོར་འགྲོ།།

འཁྲུག་སྦྱོར་ཁོ་ན་ཡིས་ཕྱི་ནང་བཙོང་བའི།།
མདོ་མེད་ཕོ་མོ་ཚོའི་ཀླད་པའི་ནང་ལ།།
འདོད་ཆགས་ནད་དུག་གི་འགོས་ནད་ཕོག་པས།།
གདོང་གི་སྐྱི་སྤགས་འདི་བྲག་ལས་སྲ་བ།།

རེ་སྨོན་ཁྲི་ཕྲག་གི་དབྱངས་རྟ་གསོན་པོ།།
མ་གསང་རྗེན་རྗེན་དུ་བརྗོད་པར་སྤོམས་པ།།
ཉམ་ཐག་བུ་ཆུང་ངའི་གཤིས་སུ་འཁུམས་པས།།
མི་ཁའི་རླུང་བུ་དེ་གཡུག་ན་གཡུག་ཤོག།

རྩོམ་ཁུངས། ངེད་དྲ་བ།