རྨི་ལམ་ནི་འཁྲུལ་སྣང་ཞིག
ཆང་གིས་བཟི་བཞིན་པ་ཡིན་ནམ
འདོད་པས་མྱོས་ཟིན་ནམ
ལག་པ་ནི་དཀར་ཡོལ་གྱི་ཁ་ལ་འཐམ་སྟེ
ཨག་སྐད་བགྲང་གིས་མི་ལངས
བུ་མོའི་མིག་ཆུ་བྱིལ་གྱིན
འཇིག་རྟེན་གྱི་སྣང་བ་ཞིག་བོར་བར་སྐྲག་སྣང་སྐྱེས
ང་རང་ནི་སྨྱོས་ཟིན་ནམ
སེམས་པ་ནི་འཁྲིགས་ཐག་ཆོད་སོང
ལུས་པོ་ནི་གྲང་བས་མནར
ཕྱིར་ཡོང་མེད་པའི་བདེ་དགའ་ནི སུ་ཞིག་གིས་ཁྱེར་སོང
མཚན་གུང ང་ཡིས་སུ་ཞིག་གི་མིང་ནས་འབོད་ཀྱིན་འདུག
སྦྲ་ནག་གི་ཆོན་ཐག་འོག་ནས་འདི་འདྲའི་རྨི་ལམ་དུ་ཙམ་རྨིས་མྱོང
ཁྲོམ་སྲང་གི་མི་ཚོགས་ཁྲོད ང་རང་སུ་ཞིག་གི་རྗེས་སུ་རྒྱུག་གིན་འདུག
བོའུ་ཁྱུ་ཞིག་གིས་འདེད་ཀྱིན་པའི་རྒོ་བ་ཞིག་དང་འདྲ་བར
རྔུལ་ཆུ་ཐང་དུ་གཏོར་གྱིན་སུ་ཞིག་འཚོལ་གི་ཡོད་དམ
ཁྱིམ་གཞིས ཆུང་མ བུ་མོ
མ་འོངས་པའི་བདེ་འབྲས་རྡོག་པོ་ཞིག་གི་ཆེད་དམ
རང་གི་བདེ་སྣང་ཞིག་གི་དོན་དུ
ང་རང་ཅིའི་ཕྱིར་འདི་ལྟར་རྒྱུག་དགོས
ཅུང་ཙམ་ངལ་གསོས་ཆོག་པར་ཞུ
ང་ཡི་དཀོན་མཆོག་ལགས
༢༠༡༠ལོའི་ཟླ༧པའི་ཚེས༡༡དགོང་མོ་རང་ཤག་ཏུ་སྦྱར།
རྩོམ་ཁུངས། ངེད་དྲ་བ།