ཐད་ཀར་གྱེན་ལ་འགྲེང་བ་གངས་དཀར་གྱི་ལྷུན་པོ།།
སྦྲང་བོའི་སྐྲ་ལྟར་གཟེངས་པ་ནགས་ཚུལ་གྱི་ཡལ་ག།
ལུང་ཀྱོག་འོབ་དོང་ཟབ་མོའི་གཏིང་རིམ་དུ་དཔྱངས་ནས།།
ལོ་བརྒྱད་ངང་སྒུག་བྱས་པར་ཨ་ཐང་རང་ཆད་སོང་།།
 
ཕྱུག་པོས་གསེར་ནག་བརྩི་བའི་བྲེལ་ཟིང་གི་ཁྲོད་ནས།།
བླུན་པོས་ཆོ་ལོ་རྩོད་པའི་རྩེད་མཚར་གྱི་ཀློང་ནས།།
དབུལ་བོས་མེད་མུག་ཟློ་བའི་སྨྲེ་ངག་གི་ནང་ནས།།
སྲིད་ཀྱི་ཀ་ཆེན་བསླང་བའི་ཁོམ་ལོང་ཡང་མ་བྱུང་།།
 
དབྱར་དགུན་གང་ཡིན་མི་རྟོག་གནམ་གཤིས་ཀྱི་འགྱུར་ལྡོག།
ཡག་བཙོག་གང་ཡིན་མ་ངེས་མི་གཤིས་ཀྱི་སྙིགས་ལུད།།
ཤར་ནུབ་སྐད་རིགས་འདྲེས་པའི་གཡུལ་འཐབ་ཀྱི་སོ་ཁ།
གང་ལ་བལྟས་ཀྱང་རང་སེམས་སྐྱོ་སྐྱོ་ལས་མི་འདུག།
 
སྒང་གཤོང་མི་སྙོམ་གནའ་བོའི་རྡོ་སྟེགས་ཀྱི་བགྲོད་ལམ།།
ས་རྒྱ་མི་ཆེ་མི་ཆེན་རྐུབ་སྟེགས་ཀྱི་ངང་ཚུལ།།
བྱེས་གྱུར་ལོ་ཟླ་རིང་མོར་དགུ་མདུད་ཅིག་བརྒྱབ་ན།།
ད་ནི་འདི་ལྟར་སྡོད་ལ་བྲེལ་ཤ་ཞིག་ལངས་བྱུང་།།
 
མིག་ཟུང་ཁྲག་གིས་ཚོས་པའི་ན་ཟུག་ལ་ཁེན་ནས།།
ཀུན་རྟོགས་ཚོར་བའི་མེ་དཔུང་སེམས་ངོས་ནས་སྦར་ཡང་།།
འཇིག་རྟེན་གཤིས་ལུགས་འགྱུར་བའི་གདོང་འབག་ལ་བལྟས་ན།།
ད་དུང་ཞེ་བློ་ཚིམས་པའི་ངལ་གསོ་ཞིག་མ་བྱུང་།།
 
ཕྱི་རུ་འཁྱམས་ཏེ་སྤྱི་བའི་ལས་དོན་ལ་མ་ཕན།།
ནང་དུ་བསྡད་ནས་རང་གི་སྒེར་དོན་ཡང་མ་འགྲུབ།།
བརྩེ་ཆེན་དབྱངས་ཅན་ལྷ་མོའི་དགྱེས་འཛུམ་གྱི་ཀློང་ནས།།
རང་སེམས་གཅེར་བུར་ལུས་པའི་ངང་ཚུལ་འདིར་ལྟོས་དང་།།
      ༢༠༠༩ལོའི་སྤྱི་ཟླ༥ཚེས་༡༡ཉིན་བྲིས།

རྩོམ་ཁུངས། ངེད་དྲ་བ།