གཡོ་དང་སྒྱུ་ལ་མཁས་པའི་མི་ཚོགས་ཀྱི་ཁྲོད་དུ
ངས་ཇོ་བོ་རིན་པོ་ཆེའི་མགོ་བོ་དུད་འདུག་པ་དྲན་བྱུང
ངས་ཉིན་མོ་འདི་ལ་བཀྲུས་ཤིང་འདགས་པར་དཀའ་བའི་ངོ་གདོང་ཞིག
ཡོད་པ་དྲན་སོང
སྤྱན་ལས་ལྷུང་བའི་མིག་ཆུའང་དྲན་བྱུང

དུག་སྦྲུལ་ལྟར་འཁྱུག་འདུག་པའི་ལྕགས་ལམ་འདི་སེམས་ན
ངས་ཁ་དོག་བོར་བའི་ལྷ་ས་དྲན་བྱུང
གསེར་རྩི་མཐུག་པོ་བྱུགས་པའི་ལྷ་ཚོགས་ཀྱི་བཞིན་རས་དྲན་བྱུང
ཁ་དོག་ནག་པོར་གྱུར་བའི་ལྷ་སའི་མང་ཚོགས་དྲན་བྱུང

གྱང་ལྡེབས་སུ་རི་མོ་སྣ་ཚོགས་བྲིས་འདུག
ཀེམ་ཀེམ་གཡོ་བའི་མིག་ཟུང་གྲངས་མེད་ཀྱིས་ཆགས་སྲེད་དང་ཚོང་རྫས་ཀྱི
འདོད་པ་གནས་འདིར་སྤུངས་ནས
རང་གི་སྐོམ་གདུང་སེལ་གྱིན་ཡོད

ཡིན་ནའང༌། ངའི་ལྷ་ས་ནི་སོས་དལ་བགས་ཕེབས་ངང་
ནང་མའི་སྤྲོ་སྐྱིད་ལ་རོལ་གྱིན་འདུག