ཐམས་ཅད་ལ་ཇི་ལྟར་འགྲེལ་བཤད་རྒྱག
དུས་ཚོད་ཀྱི་རུམ་ཁ་ནས།
གང་ཞིག་གི་མིག་ཟུང་དང་ཁ་དོག་འཚོལ་དུས།
ངས། བྱེའུ་ཆུང་གི་འཕུར་སྟངས་བསམ་བཞིན།
ངས། ལྗང་མདོག་གི་རེ་བལྟོས་ལྡད་ཀྱིན།
མི་ཡུལ་དུ་སླེབས་བྱུང་།
དུག་རླངས་ཀྱི་རྔམས་ཁ་མཐུག་པའི་མི་ཚོགས་འདི་རུ།
རོལ་དབྱངས་དང་མེ་ཏོག་སྣ་ཚོགས།
དུར་ས་ན་རླུང་གིས་བསྐྱོད་པའི་ཚེ་སྲོག་དེའི་མགུལ་རྒྱན་དུ་གྱུར།
སྨྲེང་སེམས་དང་ན་ཟུག་ཡོད་ཚད།
འཚོལ་བསྙེགས་དང་བསམ་གཞིག་གྲངས་མེད།
མཛེས་པའི་རྨི་ལམ། སུ་ཞིག་གི་རྣམ་ཤེས་འཁོར་སའི་བུ་སྣོད་དེ་ཡིན།
མོག་མོག་གི་ལོ་ཟླ་གཙང་བོ་དང་འདྲེས།
སེམས་པ་འདིའི་ཐེག་ཚད་རླུང་གིས་བཅོམ།
ཐག་རིང་གི་གླུ་སྒྲ། ཁྲུང་ཁྲུང་གི་གཤོག་འགྱུར་ལ་རློམ།
འོད་སྣང་དང་ཁ་དོག་འཚོ་བ་དེའི་དབུ་ཁྱུད་ལ་མཐོང་ཚེ།
ངས། ཐམས་ཅད་ལ་ཇི་ལྟར་འགྲེལ་བཤད་རྒྱག
ལམ་ཁ་ན་བཤམས་པའི་ཆང་སྣོད།
ལག་ཟུང་གིས་མཁའ་རུ་བཏེགས་ཏེ།
གང་དེ་རང་གི་སྐྱབས་མགོན་ཡིན་པར་ཡིད་ཆེས་བཅངས་དུས།
ཨ། སྤྱི་ཚོགས་འདིའི་སྒོ་ཁ་ན་ཡོད་པ།
མི་ལུས་ཀྱི་ཤ་ཁྲག་འཇིབས་མཁན་ཞིག
ཆུང་ཆུང་གི་ང་ལ།
བདེ་སྐྱིད་ཀྱི་མལ་ས་དྲོན་མོ་ཞིག་གང་དུ་ཡོད་དམ།
ཕྲག་དོག་དང་གནོད་སེམས། ཞེ་སྡང་དང་སྡིགས་དམོད།
མི་ཡུལ་འདི། དུག་སྦྲུལ་གྱི་ཚང་ཁ་ན་ཆགས་ཡོད་འདུག
༢༠༠༩ ལོའི་ཟླ ༡༡ ཚེས་༡༣ ཉིན།
རྩོམ་ཁུངས། ངེད་དྲ་བ།